Milukuchi ya Bumulwila Ntanda—Baibolo Waambapo’mba Ka?

Kuvujilako kwa milukuchi ya bumulwila ntanda kubena kulengela bantu bavula kwikala na bijikila.

• Bantu mu kyalo kya Mexico baakamwa pa bunsaji bwa ndamakyalo bwa mu 2023-2024 na mambo a bamulwila ntanda 39 bo baipaya ne milukuchi ikwabo ibena kubiwa mu kyalo.

• Mu Europe mwamweka milukuchi ya bumulwila ntanda yavula bingi. Pa 15 May 2024, ndamakyalo wa ku kyalo kya Slovakia bakebelenga kumwipaya.

• Bantu ba mu kyalo kya United States baakamwa pa byo bakebelenga kwipaya wajinga ndamakyalo aye Donald Trump pa 13 July 2024.

Mambo ka milukuchi ya bumulwila ntanda kyo yavujila? Nanchi ikapwa nyi? Baibolo waambapo’mba ka?

Baibolo waambijile jimo pa kupusenamo kwa bantu pa bya bumulwila ntanda

Baibolo waambijile jimo kuba’mba mu ano moba atelwa’mba “moba a kupelako,” bantu bakekala na byubilo bitundaika milukuchi ne mabano.

• “Mu moba a kupelako kukeya bimye byakatazha. Mambo bantu bakekala . . . babula kusanta, babula bukishinka, . . . babula kukeba kumvwañana, . . . bashinta, . . . basolola bakwabo, babula kumvwa, betota.”—2 Timoti 3:1-4.

Kabiji Baibolo waambijile jimo ne kuba’mba bantu bakasatukilanga kafulumende ne malwañano akavula bingi mu ano moba. (Luka 21:9) Nangwa byonkabyo, milukuchi ya bumulwila ntanda ne malwañano kechi bikatwajijila ne.

Milukuchi ya bumulwila ntanda ikapwa

Baibolo waamba’mba Lesa ukafumyapo makafulumende a bantu onse ne kupingizhapo kafulumende wa mwiulu.

• “Lesa wa mwiulu ukaleta bufumu . . . bukavingakanya ne kupwisha buno bufumu bonse kabiji abo bukekala myaka ne myaka.”—Danyela 2:44.

Bufumu bwa Lesa bukakwatankanya bantu ne kuleta mutende pano pa ntanda ponse.

• Kalama wa buno Bufumu aye Yesu Kilishitu utelwa’mba ‘Mfumu wa Mutende, . . . ne mutende ye akaleta kechi ukapwa ne.’—Isaya 9:6, 7.

• Pa kino kimye bangikazhi ba mu buno Bufumu babena kufunda bya kwikala mu mutende. Baibolo waamba’mba: “Bakabundanga mapoko abo ne kwialula ke bya kujimako ne mafumo abo bakealula ke a kukopawilako misampi. Kisaka kya bantu kechi kikasuntwila mpoko kisaka kikwabo ne, kabiji kechi bakafunda kulwa nkondo jibiji ne.”—Isaya 2:3, 4.

Pa kuba’mba mufunjilepo byavula tangai kibaaba kya kuba’mba “Ñanyi Bintu Bikoba Bufumu bwa Lesa?” ne kutamba vidyo wa kuba’mba Bufumu Bwa Lesa bo bu Ka?