Lufuunjisho 11

Lwiitabilo ne Bisho Bifiichisha Lesa Pamuchima

Ñanyi mitundu yatama ya lwiitabilo ne bisho? (1)

Nanchi Benakilishitu bafwainwa kwitabila’mba kuji ba Lesa Basatu nyi (2)

Mambo ka Benakilishitu bakiine kyobabujila kusekelela Kiminshiminshi, Ishita, nangwa mooba a kusemwa? (3, 4)

Nanchi bafu bakonsha kukozha boomi nyi? (5)

Nanchi Yesu wafwijile pa musalaba nyi? (6)

Nanchi kyanemenaka kutookesha Lesa pa muchima? (7)

1. Kechi lwiitabilo lonse ne bisho byatama ne. Bino Lesa kechi bimusekeshane inge abyo byafuma ku bupopweshi bwa bubela nangwa byapusana ne bifuunjisha Baibolo.—Mateo 15:6.

2. BaLesa Basatu: Nanchi Yehoba BaLesa basatu—bantu basatu mu umo nyi? Ine! Yehoba, Taata, ye “Lesa yenka wa kine.” (Yoano 17:3; Mako 12:29) Yesu ye Mwaananji wabubeji, kabiji unekenena Lesa. (1 Kolinda 11:3) Taata wakila Mwaana. (Yoano 14:28) Mupashi wazhila kechi muntu ne; ayo ke ngovu ya Lesa yoengijisha.—Ntendekelo 1:2; Byubilo 2:18.

3. Kiminshiminshi ne Ishita: Yesu kechi wasemenwe pa December 25 ne. Wasemenwe pepi nobe October 1, kimye kya mwaka bakafuunga kyobalaminenga matanga abo bufuku. (Luka 2:8-12) Yesu kechi wakambizhepo Benakilishitu kusekelela kusemwa kwanji ne. Pano bino, wabujile baana banji ba bwanga kusunga, nangwa ’mba kuvuluka lufu lwanji. (Luka 22:19, 20) Kiminshiminshi ne bisho byakyo, byafumine ku bupopweshi bwakala bwa bubela. Pamotu ne bisho bya Ishita, kwingijisha kwa make ne tululu. Benakilishitu batanshi kechi basekejilenga Kiminshiminshi nangwa Ishitane, kabiji ne Benakilishitu bakiine kechi basekelela bino lelo ne.

4. Mooba Akusemwa: Pajitu kusekelela kubiji kwa mooba akusemwa kuji mu Baibolo kwajinga na bantu babulanga kupopwela Yehoba. (Ntendekelo 40:20-22; Mako 6:21, 22, 24-27) Benakilishitu batanshi kechi basekejilenga mooba akusemwane. Kisela kya kusekelela mooba akusemwa kyafumine ku bupopweshi bwa bubela bwa kala. Benakilishitu bakiine bapana bupe ne kusangalela pamo na bakwabo pa bimye byapusanapusana mu mwaka.

5. Kuchiina Bafu: Bafu kechi bakonsha kuba nangwa kumvwapo kintu ne. Kechi twakonsha kwiba kwasha ne, kabiji ne abo kechi bakonsha kwitukozha ne. (Masalamo 146:4; Musapwishi 9:5, 10) Mweo ufwa; kechi wikalako panyuma ya lufu ne. (Ezikyo 18:4) Bino kimye kimo bamalaika batama, batelwa mba bandemona, bobealula kwikala nobe yomipashi ya bafu. Bisho byonse byalamata ku bya kuchiina nangwa kupopwela bafu byatama.—Isaya 8:19.

6. Musalaba: Yesu kechi wafwijile pa musalaba ne. Wafwijile pa kichi kya mulumbulumbu, nangwa kisomo. Kyambo kya Kingiliki kyatuntululwa “musalaba” mu maBaibolo avula kyalumbulwile kichi kimotu. Kiyukilo kya musalaba kyafumine ku bupopweshi bwakala bwabubela. Musalaba kechi bamwingijishenga nangwa ku mupopwela ku Benakilishitu batanshi ne. Byonkabyo, nanchi mwalanguluka kuba mba kyawama kwingijisha musalaba pa kupopwela nyi?—Mpitulukilo ya mu Mizhilo 7:26; 1 Kolinda 10:14.

7. Kyakonsha kushupa bingi kuleka lwiitabilo ne bisho bya uno mutundu. Balongo ne bakwenu bakonsha kwimukanya kupimpula lwiitabilo lwenu. Pano bino kutookesha Lesa pamuchima kwakila kusekesha bantu.—Byambo bya Mana 29:25; Mateo 10:36, 37.

[Kipikichala pa peja 22]

Lesa kechi BaLesa Basatu ne

[Kipikichala pa peja 23]

Kiminshiminshi ne Ishita byafuma ku bupopweshi bwakala bwa bubela

[Kipikichala pa peja 23]

Kafwako kine kintu kyotwafwainwa kupopwela bafu nangwa kwibachiina ne