Komenaingako ne Kuyilako Palutwe

BYO mwatendekele kwingijisha mafunde a mu Baibolo, milanguluko, ñambilo ne byubilo byenu byatendekele kwaluka pachepache. Mwatendekele kuba bino saka mukyangyetu ne kunembesha mu Sukulu wa Mwingilo wa Lesa. Kampe pa kino kimye mwayilako bingi palutwe kufika ne pa kipimo kya kwipana kwi Yehoba. Nanchi kino kibena kulumbulula’mba pano kyapwa kafwako kuyilako palutwe nenyi? Ine. Lubatizhilo lwenu ke ntendekelotu.

Mwana wa bwanga aye Timoti wajinga mukulumpe wa bwina Kilishitu mu kipwilo kimye Paulo kyo amubujile ‘kubisha’ nangwa’mba kulangulukishapo pa mafunde o bamufunjileko ne pa mashuko a mwingilo o bamupele kabiji ne ‘kwikala mwi abyo’ kuba’mba ‘kuyilako kwanji palutwe kumweke ku bonse.’ (1 Timo. 4:12-15) Kana po po mwatendekatu kwenda mu jishinda ja bukine nangwa mwaikalamo myaka yavula mu bwikalo bwa bwina Kilishitu, mwafwainwa kuteshako muchima kuyilako palutwe.

Kuyuka Bintu ne Kwaluluka

Mu Efisesa 3:14-19 tutangamo kuba’mba mutumwa Paulo walombele’mba bakwabo ba mu lwitabilo ‘bakakonshe kukwatakanya pamo . . . bula, bwipi, ne kimino’ kya bukine. Pa kuba’mba kino kyubiwe, Yesu wapaine bya bupe ku bantu kuba’mba bafunjishe, kolola ne kukomesha kipwilo. Kulanguluka languluka kimye kyonse pa Mambo a Lesa anembelwe na lutangijilo lwa mupashi, ne na bukwasho bwa bafunjishi bayuka byavula, kwakonsha kwitukwasha ‘kukoma’ ku mupashi.—Efi. 4:11-15.

Kuno kukoma kwavwangamo ne ‘kusangulwa ke bapya mu mupashi wa michima yenu.’ Kabiji kwavwangamo ne kwikala na milanguluko yakosa mwayila ya Lesa ne ya Kilishitu. Kino kikebewa kimye kyonse kuyukisha ndangulukilo yabo pa kuba’mba ‘tuvwale bumuntu bupya.’ (Efi. 4:23, 24) Umvwe ke mufunde Mambo awama, nanchi mumona ano mashimikila a bwikalo bwa Kilishitu kwikala bwikalo bo mwafwainwa kulondela nyi? Nanchi mwesekesha kumonapo byubilo bimo byamwesheshe Yesu kabiji ne kwibikishako kwibilondela mu bwikalo bwenu nyi?—1 Pe. 2:21.

Bintu byo mwisambapo byakonsha kwikala kayukilo ka kumwesha kipimo kyo mwafikapo kya kuyilako palutwe. Aba bavwala bumuntu bupya kechi besamba misambo ya bubela, ya mwenga, ya bumvu nangwa yabula kufwainwa ne. Misambo yabo ikala ‘ya byonka byawama bikomesha . . . amba bibaletele bibusa abo bebyumvwa.’ (Efi. 4:25, 26, 29, 31; 5:3, 4; Yuda 16) Bintu byo bamba ku mbaji ne pa kupwila kwa kipwilo bimwesha’mba bukine bubena kupimpula bwikalo bwabo.

Umvwe kechi ‘mukikumpaulwa ne kulelaulwa na luvula lonse lwa mafunjisho’ ne, kino nakyo ke kimwesho kya kuyilako palutwe. (Efi. 4:14) Kya kumwenako, muba byepi umvwe bapanopantanda baletapo mashinda akatataka a mwa kubila bintu, byubilo nangwa bintu bya kisangajimbwe? Nanchi mwesekwa kwingijisha kimye kyafwainwa kubilamo bintu bya ku mupashi kuba’mba mubilemo bino bintu nyi? Kuba bino kwakonsha kutozha muntu kubula kuyilako palutwe ku mupashi. Byo kyanemapo kupulushako bimye bya kubilamo bintu bya ku mupashi!—Efi. 5:15, 16.

Kabiji byo muba na bakwenu nabyo byakonsha kumwesha byo mwayilako palutwe ku mupashi. Nanchi mwafunda ‘kwikala na muchima wanekena, ne kulekela mambo’ balongo ne banyenga yenu nyi?—Efi. 4:32.

Kuyilako kwenu palutwe kubila bintu mwayila bikeba Yehoba kwafwainwa kumwekela mu kipwilo ne mu nzubo yenu. Kwafwainwa ne kumwekela pa sukulu, mu mapunzha mutanwa bantu bavula, kabiji ne ku nkito. (Efi. 5:21–6:9) Umvwe mu ino mbaji yonse mubena kumwesha pakatampe byubilo bitokesha Lesa pa muchima, ko kuba’mba kuyilako kwenu palutwe kubena kumweka ku bantu.

Ingijishainga kya Bupe Kyenu

Yehoba witupa atweba bonse bya bupe byapusana pusana. Ukeba atweba kwingijisha bino bya bupe kukwasha bakwetu kya kuba’mba amweshe bupe bwanji kupichila mwi atweba. Pa mambo a kino mutumwa Petelo wanembele’mba: “Monka mo mwatambwila kya bupe pa muntu pa muntu, mo monka mo mwiingijilanga anwe bene na bene, mwikale bakalama bawama ba bupe bwa Lesa.” (1 Pe. 4:10) Mubena kwibwingijisha byepi bukalama bwenu?

Petelo watwajijila’mba: “Umvwe muntu wamba, ambe kyafwainwa byambo bya Lesa.” (1 Pe. 4:11) Kino kyepelo kyaambisha pa mutembo wa kwamba mwayila Mambo a Lesa kuba’mba Lesa atumbijikwe. Jishinda jibena kwambiwamo byambo jafwainwa kutumbijika Yehoba. Lufunjisho lo bafunjisha mu Sukulu wa Mwingilo wa Lesa lwakonsha kwimukwasha kwingijisha kya bupe kyenu kutumbijikilamo Lesa kupichila mu byo mukwasha bakwenu. Umvwe ino yo nkebelo yenu, mwafwainwa kuyuka byepi amba mubena kuyilako palutwe mu sukulu?

Mu kifulo kya kulangulukatu pa mafunde o mwaingijilapo kala aji pa pepala wa kufunjilwapo, nangwa pa majashi o mwaambapo kala, langulukai pa lufunjisho byo lwimukwasha kuyilako palutwe mu kupana bitapisho byenu bya lutotelo. Sukulu witukwasha kwingila bulongo mu mwingilo wa mu bujimi. Onkao mambo ishikishai anwe bene’mba: ‘Nanchi nnengezha kya kine kine bya kuya na kwamba mu mwingilo wa mu bujimi nyi? Nanchi nafunda kumwesha lusekelo ku bo nsapwilako nyi? Abya ngala kitendekesho kya kukabwelako kupichila mu kushila bantu bwipuzho bwa kukeya kukesamba pa mwisambo ukalondelapo nyi? Umvwe mbena kufunjisha muntu Baibolo, abya mbena kwingijila pa kwikala mufunjishi ufika pa muchima wa muntu nyi?’

Kange mumonenga mashuko a mwingilo o bemupa’mba ko kukomenako ne. Kuyilako kwenu palutwe kechi kumwekela mu mwingilo ye bemupa ne, kumwekela mu byo mumwingila. Umvwe bemupa mwingilo wa kufunjisha, ishikishai anwe bene’mba: ‘Nanchi naji kufunjisha bulongo nyi? Abya naji kwamba byambo mu jishinda ja kulengela bantu kumvwa bishinka bya kwibakwasha mu bwikalo bwabo nyi?’

Kwingijisha kya bupe kyenu kukebewa anweba yenka kwikala batanshi kuba bintu. Nanchi mwambila bakwenu kuba’mba mukengileko nabo mu mwingilo wa mu bujimi nyi? Nanchi mukebapo bimye bya kukwashishamo balongo benu ba mu kipwilo bakatataka, bakyanyike, nangwa bakolwakolwa nyi? Abya mwipana kuwamisha Nzubo ya Bufumu nangwa kukwashako mu mingilo yapusana pusana pa kushonkena kwa nkambi ne pa kubuñana kwa mwanzo nyi? Nanchi mwakonsha pa kimye pa kimye kunembeshako bupainiya bwa kukwasha nyi? Abya mwakonsha kwingilako bupainiya bwa kimye kyonse nangwa kukwashako kipwilo kyakajilwa pakatampe nyi? Umvwe mwi mulongo, nanchi mubena kukanamina kufikizha bikebewa bya mu Binembelo bya kwikala nkwasho nangwa mukulumpe mu kipwilo nyi? Kwipana kwenu kwa kukeba kukwasha ne kuswa kwingila mingilo, ke kiyukilo kya kuyilako palutwe.—Sala. 110:3.

Kuyuka Byavula byo Kwingila

Umvwe mwiumvwa bapelelela na mambo a kubula kuyuka byavula mu bwikalo bwa bwina Kilishitu, kwakamwa ne. Mambo a Lesa ‘apana maana ku bantutu.’ (Sala. 19:7; 119:130; Mana. 1:1-4) Kwingijisha mafunde a mu Baibolo kwitulengela kumwenamo mu maana alumbuluka a Yehoba anemesha kukila kyonse kyo twafunda kupichila mu byo twapitamo mu bwikalo. Nangwa byonkabyo, byo tuyilako palutwe mu mwingilo wa kwingijila Yehoba, tuyukilako byavula. Twakonsha kwibingijisha byepi kuba’mba mufume byawama?

Na mambo a kuba’mba muntu wapitamo mu bintu byapusana pusana, wakonsha kulanguluka’mba: ‘Napitamo kala mu kikye. Nayuka bya kuba.’ Nanchi kyawama kulanguluka bibye nyi? Byambo bya Mana 3:7 byajimuna’mba: ‘Kechi wilanguluke obe mwine amba: Ne wa maana ne.’ Bintu byo twayuka byafwainwa kwitulengela kuyuka mashinda apusana pusana mwa kubila na bintu mu bwikalo. Pano bino umvwe tubena kukomenako ku mupashi, bintu byo twayuka byafwainwa kwitulengela kulanguluka mu michima yetu kuba’mba tukeba bibusa bya Yehoba pa kuba’mba tubenga bintu bulongo. Onkao mambo, kuyilako kwetu palutwe kechi kumwekela mu kwiketekela atwe bene pa kuba bintu ne, kumwekela mu kuketekela mwi Yehoba kwitutangijila mu bwikalo bwetu. Kumwekela ne mu kuketekela kuba’mba kafwako kyakonsha kumweka kwa kubula aye kwikitabizha ne, kabiji ne kupichila mu kutwajijila kuketekela ne kwikala balunda na Shetu wa mwiulu.

Kanaminainga

Mutumwa Paulo nangwa kya kuba wajinga wakoma ku mupashi, kabiji mwina Kilishitu washingwa, wamwene kuba’mba wafwainwe kutwajijila na ‘kukanamina’ kuba’mba afikizhe bikonkwanyi bya mu bwikalo. (Fili. 3:13-16) Nanchi ne anweba byo byo mulanguluka nyi?

Mwakomenako kufika pepi? Mwakonsha kuyuka amba mwakomenako kupichila mu byo mwavwala bumuntu bupya, byo mubena kukokela bumfumu bwa Yehoba, kabiji ne byo mubena kwingijisha na mukoyo bya bupe byenu kunemekelamo Yehoba. Byo musakumwenangamo mu Sukulu wa Lufunjisho lwa Mwingilo wa Lesa, byubilo byaambiwa mu Mambo a Lesa byafwainwa kumwekanga kimye kyonse mu ñambilo ne mu mfunjishisho yenu. Twajijilai kutesha muchima ku ino mbaji ya kukomenako kwenu. Ee kine, sekelai monka, kabiji kuyilako kwenu palutwe kukamweka.