BUTALA BWA MABUKU BWA PA INTANETI
Kyamba kya Usopa
BUTALA BWA PA INTANETI
Kikaonde
Pa kukebela
  • Bisopelo
  • BAIBOLO
  • MABUKU
  • KUPWILA
  • wt Kitango 7 pp. 60-69
  • Kyotufunda kwi Lesa Kyoaswishisha Bubi

Vidyo ufwamo.

Yakana kushinkuka.

  • Kyotufunda kwi Lesa Kyoaswishisha Bubi
  • Popwelai Lesa Yenka wa Kine
  • Tumitwe tucheche
  • Byambo Bipashako
  • Mambo a Jizhina Janji Jikatampe
  • ‘Mama byo Byazhika Maana a Lesa!’
  • Jishinda Motwakonsha Kumweshesha Kwipana Kwetu
  • Twakonsha Kumwenamo Byawama Umvwe Twachinchika Mu Buyanji
    Kyamba kya Usopa—2007
  • Nanchi Mambo ka Lesa o Aswishisha Buyanji?
    Kuyuka Kutangijila ku Bumi Bwa Myaka
  • Yehoba ke Lesa Wakokamuchima
    Kyamba kya Usopa—2001
  • Lesa wa Kine Ye Ñanyi?
    Kuyuka Kutangijila ku Bumi Bwa Myaka
Monai Bikwabo
Popwelai Lesa Yenka wa Kine
wt Kitango 7 pp. 60-69

KITANGO 7

Kyotufunda kwi Lesa Kyoaswishisha Bubi

1, 2. (a) Umvwe Yehoba wafikenejiletu ponkapo konauna boba bansatuki basatukile mu Edena, umvwe kino kitulamata byepi? (b) Lunengezho ka Yehoba loetunengezhezha?

MUSHAKULU Yakoba waambile’mba: “Myaka ya mweo wami yakepa ne kutama.” (Ntendekelo 47:9) Yoba naye waambile’mba, muntu ye “wa moba acheche ne ao nao onka a malwa.” (Yoba 14:1) Byonka byajinga bano bantu, ne atweba bavula tupita mu makatazho, kwitumanyika, ne mu bya bulanda. Pano bino, Lesa kechi watamishe pa kwitupa bumi kuba’mba tusemwe ne. Kyakine, kechi tuji na milanguluko nangwa mibiji yalumbuluka ne, kabiji kechi twikala mu muzhi wa Paladisa wajingamo ba Adama ne Evwa mu ntendekelo ne. Pano umvwe kyakuba Yehoba wafikenejiletu ponkapo kwibepaya aku basatukatu inge kotuji nyi? Nangwa kyakuba inge kechi kuji bikola, bulanda, ne lufu ne, inge kechi kuji bantu ne. Umvwe kechi twasemwa ne. Pano mu lusa lwanji, Lesa wapele ba Adama ne Evwa kimye kya kusemenamo baana, nangwa kyakuba bano baana baishile kuswana bumbulwakoloka. Kabiji kupichila mwi Yesu Kilishitu Yehoba witunengezhejile lunengezho lwa kukekala na bumi bwa myaka ne myaka mu paladisa panopantanda bwalushile Adama.—Yoano 10:10; Loma 5:12.

2 Byo kibena kwitukoseshapo kukeba kwikala myaka ne myaka mu ntanda ipya yawamisha ya Paladisa, motukabulanga kukolwa, kumvwa bulanda, misongo, ne lufu, kabiji mukabula ne bantu batama! (Byambo bya Mana 2:21, 22; Lumwekesho 21:4, 5) Pano bino mu binembelo bya mu Baibolo tufundamo kuba’mba nangwa kyakuba lupulukilo lwetu lwanema kwi atweba ne kwi Yehoba, kuji kintu kikwabo kyakilamo kunema kyakwatankana na kino.

Mambo a Jizhina Janji Jikatampe

3. Kika kiji mu kufikizhiwa kwa kyaswa muchima wa Yehoba ku ino ntanda ne bantu?

3 Jizhina ja Lesa najo mojiji mu kufikizhiwa kwa kyaswa muchima wanji ku ino ntanda ne ku bantu. Jino jizhina ja kuba’mba, Yehoba, jilumbulula’mba “Wikela monse Moasakila.” Onkao mambo, mu jizhina janji muji ne nkuwa yanji ya byoaji Nkambo Walengele bintu byonse, aye mwine Mukatampe ufuukula bintu ne kwibyuba, kabiji Lesa wa bukine. Na mambo a kifulo kya Yehoba kikatampe kyoajipo, pa kuba’mba bilengwa byonse bikale bulongo mu mutende byafwainwa kunemeka jizhina janji ne byo jalumbulula kabiji ne kuba’mba byonse bimunekenene.

4. Nkebelo ya Yehoba ku ino ntanda yavwangilemo ne ka?

4 Yehoba byoalengele ba Adama ne Evwa, wibapele mwingilo wa kwingila. Walumbulwile bingi bulongo kuba’mba nkebelo yanji kechi yajingatu ya kukokesha ntanda yonse nangwa’mba kubaisha Paladisa kufika konse konsetu kwapwa ne, bino yajinga ne ya kwiiyuzha na baana babo. (Ntendekelo 1:28) Nanchi ino nkebelo yafwanyijilwe kupelelamotu na mambo a bundengamambo bwabo nyi? Byokyakonsheshepo kuleta myendeleko pa jizhina ja Yehoba wa bulume bonse umvwe kechi wafikizhe nkebelo yanji ku ino ntanda ne ku bantu ne!

5. (a) Ñanyi kimye bantu batanshi kyobafwile byobajile ku kichi kya kuyuka byawama ne byatama? (b) Yehoba wafikizhe byepi byambo byanji biji mu Ntendekelo 2:17 aku saanemeka nkebelo yanji ku ino ntanda?

5 Yehoba wasopeshe ba Adama ne Evwa amba umvwe balengulula ne kuja ku kichi kya kuyuka byawama ne byatama, bakafwa “mu juba” jonka jo bakajako. (Ntendekelo 2:17) Monka mwayijile byambo byanji, Yehoba wibapelemo mambo mu jonka juba jo balengele mambo ne kwibazhachishila ku lufu. Mu mweno ya Lesa, ba Adama ne Evwa bafwile mu jonkaja juba. Nangwa byonkabyo, pa kuba’mba afikizhe nkebelo yanji ku ino ntanda, Yehoba wibaswishishe kusema baana sabakyangye kufwa. Pano bino, Lesa byoamona myaka kiumbi kimo nobe jubatu jimo, kimye Adama kyoafwile saaji na myaka 930, wafwile “juba” jimo saka jikyangye ne kupwatu ne. (2 Petelo 3:8; Ntendekelo 5:3-5) Mu jino jishinda, bukine bwa Yehoba bwatumbijikilwe pa mambo akimye kyo bafwijilemo, kabiji ne nkebelo yanji ku ino ntanda kechi yapwile na mambotu a lufu lwabo ne. Bino bantu bambulwakoloka, kuvwangakotu ne bangubabibi bapewako kimye kya kwikala bomi.

6, 7. (a) Kwesakana na Kulupuka 9:15, 16, mambo ka Yehoba o aswishisha babi kutwajijila pa ka kimye? (b) Nga kwi Felo, bulume bwa Yehoba bwamweshiwe byepi, kabiji jizhina Janji jatumbalele byepi? (c) Kika kikafumamo umvwe buno bwikalo bubi bwapwa?

6 Byambo Yehoba byoaambile kwi mfumu wa mu Ijipita mu moba akwa Mosesa bilumbulula Lesa kyoaswishisha bubi kutwajijila. Kimye Felo kyoakainye bena Isalela amba babule kufuma mu Ijipita, Yehoba kechi wafikenejiletu kumwipaya ne. Kwaishile myalo jikumi mu yoya ntanda, kumwesha bulume bwa Yehoba mu mashinda a kukumya. Pa kumujimuna na mwalo wa butanu na bubiji, Yehoba wamwambijile Felo amba Wakonsheshe bukiji bukiji kumuvizhizha pamo ne bantu banji panopantanda. Yehoba waambile’mba “bino ano o mambo o nakulamina na bumi namba nkumweshe bulume bwami, kabiji’mba jizhina jami jitumbalale ne monse mwapela ntanda”—Kulupuka 9:15, 16.

7 Kimye Yehoba kyoapokolwele bena Isalela, jizhina janji kine jatumbalele monse monse. (Yoshua 2:1, 9-11) Ano moba, byo pabapite ke myaka 3,500, kintu kyoaubile pa kyokya kimye kechi kyalubiwako ne. Jizhina ja Yehoba kechi jo jonkatu jatumbalele ne, bino ne bukine bwa Mwine mwinajo nabo bwatumbalele. Kino kyamwesheshe nkuwa ya Yehoba amba ye Lesa usunga milaye yanji ne kuba bintu bya kupokolola bantu banji. (Yoshua 23:14) Kabiji kyamwesheshe ne kuba’mba na mambo a bulume bwanji bwakilamo, kafwako nangwa kimo kyakonsha kukanya nkebelo yanji kubiwa ne. (Isaya 14:24, 27) Onkao mambo, tuji na luketekelo lwa kuba’mba katatakatu akalete lonaiko mu kwimenako bakalume banji bakishinka byo akonauna bwikalo bonse bubi bwa kwa Satana. Kumweshiwa kwa abwa bulume bwine bwakila ne lukumo lo lukaleta pa jizhina ja Yehoba kechi bikalubiwakotu nangwa pacheche ne. Kukekala mfweto ikabula kupwa.—Ezikyo 38:23; Lumwekesho 19:1, 2.

‘Mama byo Byazhika Maana a Lesa!’

8. Ñanyi bishinka Paulo byoetubula kulangulukapo?

8 Mu nkalata yanji yoanembejile bena Loma, mutumwa Paulo waipwizhe’mba: “Bumbulwakoloka, Lesa uji nabonyi?” Wakumbwile’mba: “Ine kabiji, akyo ine.” Wabwelele waamba ne pa lusa lwa Lesa na mukoyo ne kutongola Yehoba byoaambile kwi Felo byoamulekele na bumi kuba’mba ekaleko pa kakimye kacheche. Kabiji Paulo waambile’mba atweba bantu tujitu byonka biji buchimba buji mu maboko a mbumbi. Kepo aamba ne kuba’mba: ‘Kabiji nanchi byepi, umvwe Lesa pa kuswa kumwesha bukaji bwanji, ne kuyukanyikisha bulume bwanji, aye wibitekenjile na kukokamuchima kwavula bijiilo bya bukaji byafwainwa lonaiko: mu kuba’mba ayukanyikishe bunonshi bwa lukumo lwanji pa bijiilo bya lusa, byo anengezhezhe jimo amba bya lukumo, ye atweba kabiji, bo aita, kechi mu Bayudea bonka ne, ne mu Bagentila pamo?’—Loma 9:14-24.

9. (a) ‘Bijiilo bya bukaji byafwainwa lonaiko’ bo ba ñanyi? (b) Mambo ka Yehoba oamweshesha kukoka muchima kwavula ku bamukana, kabiji nga kikafumamo ku mpelo kikafweta byepi aba bamutemwa?

9 Kufumatu kimye kya lusatuko mu Edena, bonse bakana Yehoba ne mizhilo yanji byo ‘bijiilo bya bukaji byafwainwa lonaiko.’ Kufumatu kyokya kimye kufika ne bulelo, Yehoba wamwesha kukoka muchima kwavula. Babi balengulula ñiñijilo yanji yoengijilamo bintu, kabiji ne kuyanjisha bakalume banji, ne kwipaya baipaile Mwananji. Byoekanya pakatampe, Yehoba wapana kimye kyabaya ku bilengwa byonse kuba’mba bimwene bine bya malwa bifuma mu kumusatukila ne bukalama bwa bantu bwa kwilama bene bunke bwabo kwakubula aye ne. Kabiji lufu lwa Yesu lwashinkwile jishinda ja kupokolwelamo bantu balukokelo ne ‘konauna mingilo ya Diabola.’—1 Yoano 3:8; Bahebelu 2:14, 15.

10. Mambo ka Yehoba oaswishisha babi kutwajijila pa myaka yonse ye 1,900 yapitapo?

10 Pa myaka 1,900 yapitapo kufuma kimye kyasangwilwe Yesu, Yehoba wibitekenya ‘bijiilo bya bukaji,’ kubula kwibyonauna. Mambo ka? Kintu kitanshi ke na mambo a kunengezha aba bakekala pamo ne Yesu Kilishitu mu Bufumu bwanji bwa mwiulu. Abano bonse baji 144,000, kabiji byo ‘bijiilo bya lusa’ byoatongwele mutumwa Paulo. Patanshi Bayudea bamo bobaichilwe kwiya na kulenga jino jibumba ja mwiulu. Kepo Lesa aichile ne bantu ba mu Bagentila. Yehoba kechi wakanjikizhapo nangwa umo wa mu bano kuba’mba amwingijile ne. Pano bino, aba baumvwijile na lusanchilo luno lunengezho lwanji, wapele bamo jishuko jikatampe ja kulama pamo na Mwananji mu Bufumu bwa mwiulu. Lunengezho lwa kunengezha jino jibumba ja mwiulu lubena kuya na kupwa.—Luka 22:29; Lumwekesho 14:1-4.

11. (a) Jibumba ka jibena kumwenamo mfweto luno mu kukokamuchima kwa Yehoba? (b) Nga bafwa bakashukwa byepi?

11 Pano nga ibyepi pa mambo a luketekelo lwa kwikala na bangikazhi ba panopantanda? Kukokamuchima kwa Yehoba kwaleta ne kukonkanyiwa kwa “jibumba jikatampe” kufuma mu mikoka yonse ya bantu. Luno bafika ke ma milyonyi. Yehoba walaya kuba’mba jino jibumba ja panopantanda jikapuluka mpelo ya buno bwikalo ne kwikala na luketekelo lwa bumi bwa myaka ne myaka mu paladisa panopantanda. (Lumwekesho 7:9, 10; Masalamo 37:29; Yoano 10:16) Mu kimye kyafwainwa kya mwine Lesa, bafu bavula bakasangulwa ne kupewa jishuko ja kwikala bangikazhi ba panopantanda ba Bufumu bwa mwiulu. Byambo bya Lesa byaambila jimo mu Byubilo 24:15 amba: “Kukekala lusanguko lwa baoloka ne babula koloka.”—Yoano 5:28, 29.

12. (a) Twafundako ka kwi Yehoba byoakileka bubi kutwajijila? (b) Mwiumvwa byepi Yehoba byoauba na ano mambo?

12 Nanchi mu byonse bye mujipo kutamisha nyi? Ine, mambo byoakibula konauna babi, nangwa’mba ‘bijiilo bya bukaji,’ Lesa ubena kubila lusa bantu bakwabo, monka mwayila nkebelo yanji. Kino kimwesha byoaji wa lusa ne butemwe. Kabiji, byotwikala na kimye kya kumona bibena kubiwa kyaswa muchima wanji, tufunda byavula bingi pe Yehoba. Tukumya bingi pa kumona mbaji yanji yapusana pusana ya bumuntu bwanji na biji bololoke bwanji, lusa lwanji, kukokamuchima kwanji, ne maana anji a misango ne misango. Jishinda Yehoba moaubila na ano mambo a bumfumu alamata bilengwa byonse a lūsa lwanji lwa kulama, ke kishiino kya myaka ne myaka kya kushiina kuba’mba jishinda janji joalaminamo jo jonka jakilamo kuwama. Twambila pamo na mutumwa Paulo amba: ‘Mama byo byazhika bunonshi, ne maana, ne kuyukisha kwa Lesa!’—Loma 11:33.

Jishinda Motwakonsha Kumweshesha Kwipana Kwetu

13. Umvwe ke tumaname, jishuko ka ja kushiinamo jotwikala najo, kabiji kika kyakonsha kwitukwasha kubila mu jishinda ja maana?

13 Bakalume bavula ba Lesa pa muntu pa muntu baji mu bwikalo bwa makatazho. Batwajijila na kuyanda mambo akuba Lesa ukyangye konauna babi ne kuletela bantu mutende yealaijile jimo. Nanchi kino kyafwainwa kwitukatazha nyi? Inyi twafwainwa kumona ano makatazho kuba’mba jo jishinda ja kushinawinamo Diabola amba wa bubela? Twakonsha kukoseshiwa kumona ano makatazho kuba’mba jo jishinda ja kushinawinamo Diabola amba wa bubela umvwe satuvuluka byobetukambizha kuba’mba: ‘Mwanami, wikale wa maana, usangajike muchima wami, namba mmone mwa kumukumbwila awa uñendeleka.’ (Byambo bya Mana 27:11) Satana wendeleka Yehoba, wabepele’mba umvwe bantu bakajilwa bintu bya ku mubiji nangwa bakolwa, bakamupamo mambo Lesa, ne kumunena bya mwenga. (Yoba 1:9-11; 2:4, 5) Tusangajika muchima wa Yehoba umvwe twaikala bakishinka kwi aye kimye kyo tubena kumanama, ne kushiina Satana kuba’mba byoaambile bya bubela.

14. Umvwe twaketekela mwi Yehoba kimye kyo tubena kupita mu meseko, mfweto ka yotwakonsha kumwenamo?

14 Umvwe twaketekela mwi Yehoba kimye kyotubena kupita mu makatazho, kitulengela kwikala na byubilo byawama. Kyakumwenako, na mambo a bintu Yesu byoamanamine, “wafunjile lukokelo” mu jishinda joabujile kuyukapo kala ne. Atweba netuwa twakonsha kufunjilako ku meseko o tupitamo umvwe twaikala bakoka muchima, bachinchika, bomvwisha, ne kusanchila mashinda a Yehoba aoloka.—Bahebelu 5:8, 9; 12:11; Yakoba 1:2-4.

15. Byotupita mu makatazho saka twachinchika, nga bakwetu nabo bakonsha kumwenamo byepi mfweto?

15 Bakwetu baketumona byo tubena kuba. Bintu byotupitamo na mambo a byo twatemwa bololoke, mu kupita kwa kimye byakonsha kulengela bamo bamwiabo kuyuka bena Kilishitu bakine ano moba. Kabiji umvwe bakwatankana ne atweba mu mpopwelo, bakonsha kwikala pa mutanchi wa bakatambula bumi bwa myaka. (Mateo 25:34-36, 40, 46) Yehoba ne Mwananji bakeba bantu kukatambula buno bumi.

16. Ndangulukilo yetu yotumwenamo makatazho otupitamo itukwatankanya byepi mu buumo?

16 Byo kyawamapo kine umvwe ketumone nangwatu bimye byakatazha kwikala mashuko a kumwesheshamo kwipana kwetu kwi Yehoba kabiji ne kuba kyaswa muchima wanji! Umvwe ketube bino tukamwesha kuba’mba tubena kwiya amba tukwatankene pamo mu buumo na Lesa ne Kilishitu. Yesu walombejileko bena Kilishitu bonse bakine kwi Yehoba amba: “Kabiji kechi nebalombela abo bonka [baana banji ba bwanga boajinga nabo] ne, pakuba ne abo nabo bakangitabila amiwa na byambo byabo; namba bonse bekale ke umo; byonka biji anweba, Tata, byo muji mwi amiwa ne amiwa mwi anweba, byonkabi ne abo nabo bekale mwi atweba.”—Yoano 17:20, 21.

17. Ñanyi luketekelo lotwakonsha kwikala nalo umvwe twaikala bakishinka kwi Yehoba?

17 Yehoba uketufweta pakatampe umvwe twaikala bakishinka kwi aye. Byambo byanji byaamba’mba: “Ikalai bashikamatu, ne kutelengela ne, kasa mukelwa kwingijisha mwingilo wa Nkambo, byo mwayuka’mba, mwingilo wetu wa mwi Nkambo kechi ye watu ne.” (1 Kolinda 15:58) Kabiji byamba’mba: ‘Lesa kechi wabula koloka’mba, avulame mwingilo wenu ne butemwe bo mwijimwesha jizhina janji’ ne. (Bahebelu 6:10) Yakoba 5:11 wamba’mba: “Talai, twibatela namba batokwa abo batekenyenga: anweba mwaumvwine kala mambo a butekanye bwa Yoba, kabiji mwamona byo apezha Nkambo, ne byo ayula na lusa ne bibusa.” Yoba wamwene ka ku mpelo? “Byonkabyo Yehoba wapesheshe bwikalo bwanji Yoba bwapeleleko kukila butanshi.” (Yoba 42:10-16) Ee, Yehoba ye “ufweta boba bamukebesha.” (Bahebelu 11:6) Kabiji mfweto ya bumi bwa myaka ne myaka mu paladisa panopantanda yotubena kutengela byoyawamapo!

18. Kika kikayanga na kubiwa pachepache ku milanguluko ya bintu bikatazha milangwe yetu ano moba?

18 Bukalama bwa Bufumu bwa Lesa bukafumyapo makatazho onse apitamo bantu pa myaka yavula. Lusekelo lukekalako kyokya kimye lukabaya kya kuba kechi tukavulukamo ne makatazho o tubena kupitamo ano moba ne. Kechi tukayanjishiwanga na milanguluko yatama ya buyanji botupitamo ne. Milanguluko ne mingilo ikengilanga bantu mu bwikalo bwabo bwa juba ne juba mu ntanda ipya ikayanga na kufumyapo pachepache milanguluko ya bintu bikatazha milangwe yetu. Yehoba waamba’mba: “Naya ndenge jiulu jipya [kafulumende mupya wa Bufumu bwa mwiulu bwa kulama bantu] ne ntanda ipya [bantu baoloka]; kabiji bintu bya kala kechi bakebivuluka ne, kechi bikeya mu michima yabo jibiji ne. Pakuba pano sekelai ne kusangalala kikupu na mambo a byobya bintu byo nsaka kulenga.” Ee kine, mu ntanda ipya ya Yehoba, baoloka bakamba’mba: “Pano ntanda yonse yakokoloka ne kuzhindamatu nzo; pano bantu ke batatule kwimba.”—Isaya 14:7; 65:17, 18.

Mepuzho Akupitulukamo

• Nangwa kyakuba waswisha bubi, Yehoba wamwesha byepi mushingi mukatampe ku jizhina janji?

• Lesa byoaswisha ‘bijiilo bya bukaji’ kutwajijila wamwesha byepi lusa kwi atweba?

• Twafwainwa kuketekela kumona ka mu makatazho etwishila pa muntu pa muntu?

[Bipikichala pa peja 67]

Yehoba “wapesheshe bwikalo bwanji Yoba bwapeleleko kukila butanshi”

    Mabuku a mu Kikaonde (1992-2025)
    Shinkai
    Shinkulai
    • Kikaonde
    • Tuminaiko Bakwenu
    • Byo Mukeba
    • Copyright © 2025 Watch Tower Bible and Tract Society of Pennsylvania
    • Terms of Use
    • Privacy Policy
    • Privacy Settings
    • JW.ORG
    • Shinkulai
    Tuminaiko Bakwenu