Bya Kwikala Mu butemwe Bwa Lesa

1, 2. Twafwainwa kuba byepi pa kuba’mba tutwajijile kwikala mu butemwa bwa Lesa?

ATWEBA bonse tukeba kwikala na butuntulu bwa mubiji bwawama. Onkao mambo, tuja kajo kawama, tukosesha mubiji wetu ne kumulama bulongo. Kimye kimo kyakonsha kwitukatazha kutwajijila kuba bino. Pano bino, kuyuka bintu byawama bifumamo kwitulengela kubula kuleka. Kyo kimotu, kuji bintu byo twafwainwa kuba pa kuba’mba bulunda bwetu ne Lesa bukose.

² Nangwa kya kuba tubena kufunda pe Yehoba pa kuba’mba tumuyuke bulongo, twafwainwa kutwajijila kukosesha bulunda bwetu ne aye. Mwana wa bwanga aye Yuda walumbulwijile bulongo bena Kilishitu byo bafwainwe kuba byo ebambijile’mba: ‘Ikalai mu butemwe bwa Lesa.’ Wanungilepo amba: “Ikomeshainga anwe bene mu lwitabilo lwenu lwazhila.” (Yuda 20, 21) Pano twakonsha kwikala byepi na lwitabilo lwakosa?

TWAJIJILAI KUKOSESHA LWITABILO LWENU

3-5. (a) Satana ukeba’mba mumonenga byepi mizhilo ya Yehoba? (b) Mumvwa byepi pa mizhilo ya Yehoba ne mafunde anji?

³ Mwafwainwa kushiinwa’mba tumwenamo bingi mu bintu bitufunjisha Yehoba. Satana ukeba’mba mulangulukenga’mba mizhilo ya Lesa yakatazha, kabiji amba mukekala na lusekelo inge ke mwifuukwile anweba bene kyawama ne kyatama. Kufumatu mu bujimi bwa Edena, Satana ukeba bantu kwitabila bino. (Ntendekelo 3:1-6) Kabiji byo byo abena kuba ne lelo jino.

⁴ Nanchi byamba Satana bya kine nyi? Nanchi mizhilo ya Yehoba yakatazha nyi? Ine. Twayai twambe bino. Fwanyikizhai kuba’mba mubena kuzhokoloka mu paka mwawama. Mwamona luvimba ye bazhokolosha lubaji lumo lwa paka. Mwakonsha kwiipuzha’mba, ‘Mambo ka o babikilako luno luvimba?’ Bino palutwe kacheche, mwaumvwa bokwe ubena kubuluma mukachi ka luvimba. Musakumvwa byepi pa luvimba ye bazhokoloshako? Musakumvwa bingi bulongo mambo luno luvimba lusa kwimuzhikijila ku bokwe. Abino byo biji ne mafunde a Yehoba. Aji nobe luno luvimba, kabiji Diabola uji nobe bokwe. Mambo a Lesa etubuula’mba: “Jimukai, saka mulaba ne kukenkenta! Mulwanyi wenu aye Diabola upitañana nobe bokwe ubuluma ubena kukeba wa kuja.”—1 Petelo 5:8.

⁵ Yehoba ukeba’mba twikalenga na lusekelo mu bwikalo bwetu. Kechi ukeba’mba Satana etujimbaike ne. Na mambo a bino, witupa mizhilo ne mafunde pa kuba’mba etuzhikijile ne kwikala na lusekelo. (Efisesa 6:11) Yakoba wanembele’mba: “Awa utajisha mu mizhilo yalumbuluka ya bwana bwa bene . . . ukekala na lusekelo mu bintu byo oba.”—Yakoba 1:25.

6. Twakonsha kushiinwa byepi amba mizhilo ya Lesa yawama?

⁶ Kulondela mizhilo ya Yehoba mu bwikalo bwetu kwitulengela kwikala na lusekelo kabiji bulunda bwetu ne aye bukoselako. Tumwenamo bingi inge ke tulombe kwi Lesa kimye kyonse byonka byo etukambizha. (Mateo 6:5-8; 1 Tesalonika 5:17) Twikala na lusekelo inge ketulondele mukambizho wa kupwila pamo ne kupopwela Lesa ne kwitundaika atwe bene na bene ne kwingila na mukoyo mwingilo wa kusapwila ne kufunjisha bantu. (Mateo 28:19, 20; Ngalatiya 6:2; Bahebelu 10:24, 25) Kulanguluka pa bino bintu kukosesha lwitabilo lwetu, kabiji kwitulengela ne kushiinwa’mba mizhilo ya Yehoba yawama bingi.

7, 8. Ñanyi kintu kiketukwasha kubula kwakamwa inge ke tupite mu makatazho?

⁷ Kimye kimo twakonsha kwakamwa amba tukakankalwa kutwajijila kwikala bakishinka inge ketupite mu meseko mu bwikalo bwetu. Inge byo byo mulanguluka, mwafwainwa kuvuluka byambo bya Yehoba bya kuba’mba: “Amiwa yami Yehoba Lesa wenu, yenka wimufunjisha kuba’mba mumwenemo, yenka wimutangijila mu jishinda jo mwafwainwa kuyamo. Kine, umvwe mwakookela mikambizho yami, mutende wenu ukekala nobe mukola ne bololoke bwenu bukekala nobe manyaki a pa kalunga ka mema.”—Isaya 48:17, 18.

⁸ Umvwe ke tukookele Yehoba, tukekala na mutende nobe mema a mu mukola abula kuma, kabiji tukekala na byubilo bya bololoke nobe manyaki a pa kalunga ka mema. Kino kibena kulumbulula’mba tukatwajijila kwikala bakishinka kwi Lesa nangwa ketupite mu makatazho. Baibolo witulaya’mba: “Twika Yehoba kisendwa kyobe, ne aye ukakukosesha. Kabiji kechi ukaleka muntu waoloka amba apone ne.”—Salamo 55:22.

“TWAYAI TUKOMENGA”

9, 10. Kilumbulula ka kwikala mwina Kilishitu wakoma?

⁹ Inge ke tukoseshe bulunda bwetu ne Yehoba, ‘tukakomenangako.’ (Bahebelu 6:1) Pano kukoma kulumbulula ka?

¹⁰ Mwina Kilishitu kechi ukoma na mambo a kwikala myaka yavula ne. Byo tuji bena Kilishitu, pa kuba’mba tukome, twafwainwa kwikala na bulunda bwakosa ne Yehoba ne kumona bintu monka mo ebimwena. (Yoano 4:23) Paulo wanembele’mba: “Aba benda mu buntunshi bata muchima ku bintu bya buntunshi, bino aba benda mu mupashi bata muchima ku bintu bya mupashi.” (Loma 8:5) Mwina Kilishitu wakoma ku mupashi, kechi uta muchima ku bya kisangajimbwe nangwa bya ku mubiji ne. Bino uta muchima pa kwingijila Yehoba kabiji ufuukula bintu byawama mu bwikalo bwanji. (Byambo bya Maana 27:11; tangai Yakoba 1:2, 3.) Kechi ulondela byatama bibena kuba bakwabo ne. Mwina Kilishitu wakoma wafwainwa kuyuka byawama ne kwibilondela.

11, 12. (a) Paulo waambilepo amba ka pa “milangwe yo bafunjisha” yafwainwa kwikala na mwina Kilishitu? (b) Mambo ka kukoma kwa mwina Kilishitu o bekwesakenya na muntu ubena kufunda kunyema kapela?

¹¹ Twafwainwa kwibikako pa kuba’mba twikale bena Kilishitu bakoma. Mutumwa Paulo wanembele’mba: “Kajo kakosa ko ka bantu bakoma, bonka baji na milangwe yo bafunjisha kuyuka kyawama ne kyatama na mambo a kwiingijisha.” (Bahebelu 5:14) Kyambo kya kuba’mba ‘kufunjisha,’ kyakonsha kwituvululamo muntu ubena kufunda kunyema kapela.

¹² Inge twamona muntu wayuka kunyema kapela pa kwikyombesha, tuyuka kuba’mba papichile kimye kyabaya bingi pa kuba’mba ekale shenyenye. Kechi wasemekelwe na buno bushenyenye ne. Inge mwana wasemwa, kechi uyuka bya kwingijisha maboko ne maulu anji ne. Bino pa kupitapo kimye, uno mwana ufunda bya kwingijisha maboko pa kukwata bintu ne kufunda kwenda. Inge batwajijila kumufunjisha, wakonsha ne kwikala shenyenye mu kapela ka kwikyombesha. Byo byo kiji ne atweba, papita kimye kyabaya bingi pa kuba’mba twikale bena Kilishitu bakoma.

13. Ñanyi bintu biketukwasha kulanguluka byonka bilanguluka Yehoba?

¹³ Mu uno buku, twisamba byo twafwainwa kulangulukanga byonka bilanguluka Yehoba ne kumona bintu monka mo ebimwena. Twafunda kuba’mba twafwainwa kutemwa Yehoba ne kunemeka mizhilo yanji. Pa kufuukula bintu, twafwainwa kwiipuzhanga’mba: ‘Ñanyi mizhilo nangwa mafunde a mu Baibolo o nafwainwa kwingijisha? Nakonsha kwiengijisha byepi? Yehoba ukeba’mba mfukuulenga byepi bintu?’—Tangai Byambo bya Maana 3:5, 6; Yakoba 1:5.

14. Twafwainwa kuba byepi pa kuba’mba twikale na lwitabilo lwakosa?

¹⁴ Kechi twafwainwa kuleka kukosesha lwitabilo lwetu mwi Yehoba ne. Byonkatu kuja kajo kawama byo ketukwasha kwikala na butuntulu bwa mubiji bwawama, kufunda pe Yehoba nako kwitukwasha kwikala na lwitabilo lwakosa. Kimye kyo twatendekele kufunda Baibolo, twafunjile mafunjisho atanshi aamba pe Yehoba ne mizhilo yanji. Bino pa kupitapo kimye, twafwainwa kufunda bintu byazhika bya mu Mambo a Lesa. O ene mambo Paulo o aambijile’mba: “Kajo kakosa ko ka bantu bakoma.” Inge ke tukookele bintu byo tufunda, twikala na maana. Baibolo waamba’mba: “Maana kyo kintu kyanema bingi.”—Byambo bya Maana 4:5-7; 1 Petelo 2:2.

15. Mambo ka o twafwainwa kutemenwa Yehoba ne balongo ne banyenga?

¹⁵ Muntu wakonsha kwikala na butuntulu bwa mubiji bwawama, pano bino pa kuba’mba ekale bino, wafwainwa kutwajijila kwita muchima. Byobyo kiji ne atweba, mwina Kilishitu wakoma ku mupashi uyuka kuba’mba wafwainwa kwibikako pa kuba’mba ekale na bulunda bwakosa ne Yehoba. Paulo witubuula’mba: “Iesekainga anwe bene pa kuba’mba muyuke kana mukiji monka mu lwitabilo nangwa ne; ipimainga anwe bene kuba’mba mwiyuke byo muji.” (2 Kolinda 13:5) Nangwa byonkabyo, kuji bintu bikwabo byo twafwainwa kuba, kechi kwikalatu na lwitabilo lwakosa ne. Twafwainwa kutwajijila kutemwa Yehoba ne balongo ne banyenga. Paulo waambile’mba: ‘Umvwe nayuka bintu . . . kabiji umvwe nji na lwitabilo lonse lwa kutuntulula mitumba, bino saka nabula butemwe, naaluka ke watu.’—1 Kolinda 13:1-3.

LANGULUKAINGA PA BINTU BITULAYA LESA

16. Satana ukeba’mba tulangulukenga amba ka?

¹⁶ Satana ukeba’mba tulangulukenga’mba kechi twakonsha kutookesha Yehoba ku muchima ne. Ukeba’mba tulefulwe inge tubena kupita mu makatazho, kabiji ukeba’mba tulangulukenga’mba makatazho etu kechi akonsha kupwa ne. Kechi ukeba’mba tuketekele bena Kilishitu bakwetu ne, kabiji kechi ukeba’mba twikale na lusekelo ne. (Efisesa 2:2) Satana wayuka’mba kulefulwa kwakonsha kwitubika mu kizumba kumvwangakotu ne bulunda bwetu ne Lesa. Bino Yehoba witupa bintu byakonsha kwitukwasha inge twalefulwa. Witupa lwitabilo.

17. Mambo ka luketekelo o lwanemena?

¹⁷ Pa 1 Tesalonika 5:8, Baibolo waesakanya lwitabilo lwetu ku kampompo kakonsha kuzhikijila mutwe wa mushilikale ubena kulwa nkondo, ko kuba’mba “luketekelo lwa lupulukilo.” Kuketekela mu milaye ya Yehoba kuzhikijila milanguluko yetu ne kwitukwasha kuchinuzhuka milanguluko yatama.

18, 19. Luketekelo lwalengejile byepi Yesu kuchinchika?

¹⁸ Kwikala na luketekelo kwakoseshe bingi Yesu. Juba japeleleko saka akyangye kufwa pano pa ntanda, wapichile mu makatazho avula bingi. Mulunda nanji wamufutukilemo. Mukwabo wakaine kuba’mba kechi wamuyuka ne. Bakwabo bamunyemene ne kumusha bunke. Balongo banji bamwimenejile ku ntundwa ne kukambizha amba bamumanyike ne kumwipaya. Ñanyi bintu byakwashishe Yesu kuchinchika ano makatazho? “Na mambo a lusekelo lo bamutujile kulutwe, wachinchikile pa kichi kya lumanamo, kabiji kechi wateleko muchima ku bumvu ne, kabiji aye waikala ku kilujo kya jitanda ja Lesa.”—Bahebelu 12:2.

¹⁹ Yesu wayukile’mba inge watwajijila kwikala wakishinka, ukaletela Shanji lukumo ne kushiina Satana amba wa bubela. Luno luketekelo lwamulengejile kwikala bingi na lusekelo. Kabiji wayukile ne kuba’mba katatakatu akabwele jikwabo kwi Shanji mwiulu. Luno luketekelo lwamulengejile kuchinchika. Byonka byaubile Yesu, twafwainwa kuta muchima pa luketekelo lwetu. Kuba bino kuketulengela kuchinchika makatazho akonsha kwitufikila.

20. Ñanyi bintu bikemukwasha kubula kulefulwa inge ke mupite mu makatazho?

²⁰ Yehoba umona byo mwibikako kuchinchika ne lwitabilo lwenu lwakosa. (Isaya 30:18; tangai Malakai 3:10.) Wimulaya ‘kwimupa bintu bikeba muchima wenu.’ (Salamo 37:4) Onkao mambo, tai muchima pa luketekelo lwenu. Satana ukeba’mba musankilapo luketekelo lwenu ne kulanguluka’mba milaye ya Yehoba kechi ikafika ne. Kechi mwafwainwa kuswisha ino milanguluko ne! Inge mwamona kuba’mba luketekelo lwenu lubena kuya na kuzhiya, lombai kwi Yehoba kuba’mba emukwashe. Vulukainga byambo biji pa Filipai 4:6, 7 byaamba’mba: “Kange mubambishenga michima yenu na mambo a kintu nangwa kimo ne, bino mu bintu byonse mu lulombelo ne milombelo ya misashijilo pamo na kusanta, saka musolola kwi Lesa bintu byo mukeba; kabiji mutende wa Lesa wakila milanguluko ya bantu ukalama michima ne milanguluko yenu kupichila mwi Kilishitu Yesu.”

21, 22. (a) Yehoba ukeba’mba ntanda ikale byepi? (b) Mwafuukulapo kuba ka?

²¹ Langulukainga pa milaye ya Yehoba iji kulutwe. Katatakatu bantu bonse bakapuluka bakapopwelenga Yehoba. (Lumwekesho 7:9, 14) Bwikalo mu ntanda ipya bukawama bingi. Ntanda ipya ikawama kukila bintu byonse byo twakimonapo kala. Kechi kukekala Satana ne bandemona banji ne, bubi bonse bukapwa. Kabiji kechi tukakolwanga nangwa kufwa ne. Pa juba pa juba, tukabuukanga saka tuji na bulume ne lusekelo. Bantu bonse bakengijilanga pamo kwalula ino ntanda kwikala paladisa. Bonse bakekala na kajo kawama ne mwakwikala mwawama. Kechi kukekala bambanzhi nangwa bakapondo ne, bantu bonse baketemwa. Ne mu kuya kwa moba, bantu bonse pano pa ntanda ‘bakekala na bwana bwa bene bwa lukumo lwa baana ba Lesa.”—Loma 8:21.

²² Yehoba ukeba’mba mwikale mulunda nanji. Onkao mambo, kookelainga Yehoba ne kufwenya kwipi ne aye pa juba pa juba. Twayai atweba bonse tutwajijile kwikala monka mu butemwe bwa Lesa myaka ne myaka.—Yuda 21.