Mepuzho Kufuma ku Batanga

Yehoba byo alekelako bantu mambo abo pa kitapisho kya nkuulo, mambo ka o kyanemena ku bena Kilishitu kwisolola ku bakulumpe mu kipwilo umvwe balenga mambo?

Byonka byo kyaubiwe kwi Davida kimye alengele mambo ne Betesheba, Yehoba wamulekejileko mambo nangwa kya kuba ajinga abulala, mambo walapijile na muchima yense. Kimye ngauzhi Natana kyo amusolomokele, Davida waswile’mba: “Nalenga mambo kwi Yehoba.”—2 Samwela 12:13.

Pano bino, Yehoba kechi ulekelakotu muntu mambo anji mambo a kulapila na muchima yense ne, bino wanengezha ne lunengezho lwa butemwe lwa kukwashishamo yewo muntu walenga mambo kwikala wakosa ku mupashi jibiji. Davida wamukwashishe kupichila mwi ngauzhi Natana. Lelo jino, mu kipwilo kya bwina Kilishitu muji banabalume bakoma ku mupashi nangwa’mba bakulumpe mu kipwilo. Mwana wa bwanga Yakoba waambile’mba: “Umvwe muji umo wakolwa [ku mupashi], ete bakulumpe ba mu kipwilo; bamulombele ne kumushinga manyi mu jizhina ja Nkambo: kabiji lulombelo lwa lwitabilo lukamupulusha aye ukolwa, ne Nkambo ukamubusha; kabiji umvwe walengele mambo akamulekelwa.”—Yakoba 5:14, 15.

Bakulumpe mu kipwilo baibijila bulongo bakonsha kumukwasha ndengamambo walenga a bulala kubwezhamo muchima munda. Beseka na ngovu yonse kupasha Yehoba kimye babena kumukwasha. Nangwa kya kuba bakonsha kumufunda kyakosa, kechi bamushintaukila ne. Mu butemwe, bakwasha muntu kwesakana na lukatazho lo ajimo. Na butekanye, babwezha ndangulukilo ya walenga mambo mu kwingijisha Byambo bya Lesa. (Ngalatiya 6:1) Nangwatu kya kuba mwine muntu kechi wasolola mambo anji ne, kimutundaika mwine kulapila umvwe bakulumpe mu kipwilo bamusolomoka, byonka byo bamusolomokele Davida kwi Natana. Bakulumpe mu kipwilo bakwasha muntu walenga mambo kuchina’mba wakealenga jibiji, ne kwalukatu ke ulenga-lenga mambo.—Bahebelu 10:26-31.

Bino kechi kyapela kwisolwela mambo kuba’mba ulekelweo ne, mambo a kumvwa bumvu. Onkao mambo, kikebewa kwibikako kufuma mukachi ka muchima. Akimonai kino kyamwekele. Muntu umo wakankelwe kusolola mambo anji ku bakulumpe mu kipwilo waambile’mba: “Kyankolelenga bingi ku muchima. Naingijilenga bingi na ngovu mu mwingilo wa kusapwila, bino muchima munda kechi waikelengamo ne.” Walangulukilenga’mba kwisololatu kwi Lesa mu lulombelo kyo kyonka kikebewa, pano bino kechi kyo kyonka ne, mambo wakatazhiwe bingi byonka byajinga Davida. (Masalamo 51:8, 11) Byo kyawamapo nanchi kumvwina bukwasho bwa butemwe bwanengezha Yehoba kupichila mu bakulumpe mu kipwilo!