Nanchi Mwisamba Nyi?

“NKALATA ya butemwe yanembele wakikulumpe umo wa myaka ya kusemwa 60.” Kino kyo kyajinga kishina kyanengezhewe na banki umo wa mu Japan myaka ichechetu yapitapo. Kyatundaikile boba baji mu masongola baji na myaka ya kusemwa kutendekela pa 50 kufika pa 60 kuba’mba bambepo pa byajinga “ku michima yabo” pa mambo a bena kwabo. Mwanamulume umo wanembejile mukazhanji amba: “Wakonsha kuseka bingi pa kumvwa bino byambo, pano uba ñambe biji ku muchima wami. Nasanta bingi pa kwisongola ne obewa.”

Mu bisho byavula, kuvwangakotu ne Byalo bya ku musela, muntu kechi waitabizhiwa kwamba biji ku muchima wanji ne. Pano bino, bantu kukila 15,000 baswile kwambapo. Kuno kwambapo kupichila mu kunemba makalata a butemwe kwaile bingi nkuwa kya kuba babwelele baambapo jibiji, kabiji banembele ne mabuku aambilenga pa ano onka makalata. Kino kimwesha bavula byo beumvwa pa mambo a bena kwabo. Bakwabo nabo kechi bakeba kubula bena kwabo byo beumvwa pe abo ne. Mambo ka? Kampe ene mambo o babujila kubula bantu nabiji mukwabo wa mu masongola ke a kuba’mba kikebewa kwibikako bingi pa kubatu’mba umubule byo wiumvwa pe aye.

Muntu umo wa jizhina ja Hitoshi Kato, wanembele buku waamba pa kutambula penshonyi waamba bino kuba’mba, pa bamulume ne mukazhi bakikulumpe mu kyalo kya Japan, banabakazhi javula bo bakana bamwata wabo mambo a kwishikwa pa myaka yavula. “Pano bino, kikwabo kilengela ke kya kuba’mba umvwe paikala makatazho bamulume ne mukazhi kechi besambila pamo ne.”

Umvwe mulume watambula penshonyi, ubazhimukakotu mukazhi keamubule’mba masongola apwa. Bamulume ne mukazhi umvwe kechi besamba biji ku muchima wabo ne, javula kyo kilengela bino. Kampe besambangatu kya byonkabya kwa kubula kwambapo pa bintu byakonsha kwibakwasha ne. Mu kifulo kya kwitemwa, batendeka kutoboka.

Pano bamulume ne mukazhi bakonsha kupwisha byepi makatazho saka besamba mu meso anteka? Yukai kuba’mba mashinda akonsha kwimukwasha koaji, pano bino kechi atanwa mu mabuku akatataka afundañana bya masongola ne, aji mu Baibolo buku wa kala kene.