Bulanda Bukatampe Bubula Kupwa

MUNTU umo katatakatu papo wapesele pesele bishinka kuba’mba ayuke bantu byo bomvwa pa kupitapo kimye kufuma po bafwishishe batemwe babo. Watumine mepuzho ku bansemi batanu na basatu bafwishishe baana babo mu myaka ya kunyuma. Kechi bansemi bonse bakumbwile ne. Nsemi wamulume wa jizhina ja Vladimir, wafwishishe mwananji wamulume myaka itanu yapichilepo kufuma po afwijile waambile’mba, kechi umvwa bulongo kwambapo pa mwananji ne.a

Bansemi bavula bekala bingi na bulanda bukatampe umvwe bafwisha batemwe babo. Myaka jikumi yapitapo ba William bafwishishe mwanabo wamulume wa myaka ya kusemwa 18 panyuma ya kutomena. Ba William banemba’mba: “Ne luno nkiji na bulanda bwa kufwisha mwanami, kabiji nkafwatu nabo.” Kabiji ba Lucy nabo panyuma ya kupitapo myaka itanu kufuma po bafwishishe mwanabo wamulume ku kikola kya kubula kuketekela banembele’mba: “Mu moba acheche alondejilepo nakankelwe kusumininwa’mba kine wafwa. Namwenengatu nobe mbena kulota kiloto kyatama bingi kabiji nobe waya abuke. Byo papichile kimye natatwile kulanguluka amba kya kine wafwa, kechi usa kubwela ku nzubo ne. Papita ne myaka itanu kufuma pafwijile mwanami, pano bino kimye kimo inge nji bunke njila bingi.”

Mambo ka bansemi bafwisha baana nabiji ba Vladimir, ba William, ne ba Lucy kyo bekela na bulanda bukatampe? Twayai twisambepo bine bintu bilengela.

Mambo ka Bantu o Bekela na Bulanda Bukatampe?

Umvwe mu kisemi mwasemwa mwana, bansemi basangalala bingi. Kibasangajika bingi umvwe balela mwanabo, kumumona saka akupukilwa mu tulo nangwa saka aseka. Bansemi ba butemwe balama bingi baana babo bulongo. Bebafunjisha kwikala na byubilo byawama ne mushingi. (1 Tesalonika 2:7, 11) Umvwe baana kebakome na mambo a kulondela bibafunda bansemi, bansemi batemwa bingi ne kulanguluka bintu byavula pe abo.

Bansemi batapo muchima bengila bingi na ngovu kukebela baana babo bibafwainwa. Bakonsha kusungapo mali nangwa bintu bikwabo kuba’mba baana babo bakebingijishenga umvwe beikela na bisemi byabo kulutwe na lwendo. (2 Kolinda 12:14) Kuno kwibikako na ngovu mu kumwesha butemwe, kwingijisha kimye, bulume, ne mali bimweshatu patoka kuba’mba bansemi kine bakomesha baana babo kuba’mba bakekalenga na bumi kechi kufwa ne. Umvwe mwana wafwa, ko kuba’mba bansemi kechi bapwisha mwingilo wabo wa kumukomesha ne. Kabiji byonse byo balangulukanga pe aye biyatu mu mema. Abwa butemwe bwikala pakachi ka bansemi ne mwana bupwila pa mpuki na mambo a lufu. Umvwe mwanabo wafwa pashala bingi kipenze. Bansemi bekala bingi na bulanda bubula kupwa.

Baibolo waitabizha’mba bansemi bekala bingi na bulanda bukatampe bubula kupwa. Kimye mushakulu Yakoba kyo aumvwine’mba mwananji Yosefwa bamwipaya, Baibolo washimuna’mba: ‘Yakoba watabawile bivwalo byanji, wanyingile ne kisapi kya majilo mu kifuka kyanji, saka amujila mwananji moba avula. Kabiji bonse baana banji ba balume ne bonse ba bakazhi baishile na kumutekenesha; pakuba aye wakaine kutekeneshiwa, kabiji waambile’mba: Ndekai mambo amiwa nkayangatu ku kalunga ka bafu [nangwa’mba Shelo] konka kuji mwanami, kasa njila.’ Nangwa papichile myaka Yakoba wakijingatu na bulanda bwa mwananji ye ayukile kuba’mba wafwa. (Ntendekelo 37:34, 35; 42:36-38) Kya kumwenako kikwabo kya mu Baibolo kyaamba pa mwanamukazhi wa kishinka wa jizhina ja Naomi wafwishishe baana banji ba balume babiji. Na mambo a kijikila kyo ajinga nakyo wakebele kuleka kutelwa’mba Naomi ne kusalapo kutelwanga’mba Mala ko kuba’mba “bulanda bukatampe.”—Luta 1:3-5, 20, 21.

Nangwa byonkabyo, Baibolo kechi waambatu pa bulanda bwikala na bansemi ne. Bino waamba ne pe Yehoba byo apana bulume ku boba baji na bulanda. Mu mutwe walondelapo tusakufundamo mashinda amo Lesa mo atekeneshesha boba baji na bulanda.

[Tubyambo twa mushi]