Nanchi Mukivuluka Nyi?

Nanchi mwamwenamo mu kutanga Byamba bya Usopa byakatataka nyi? Monai inge mwakonsha kukumbula ano mepuzho:

• Bena Kilishitu bamo bapita mu makatazho ka panyuma ya kwisongola, kabiji bafwainwa kwibikako kuba ka?

Bena Kilishitu bamo bakonsha kutana amba bintu byo batemwa kuba kechi byo byatemwa kuba mukwabo wa mu masongola ne. Byo bayuka’mba kwikana kwabula kwitabizhiwa mu binembelo kechi jo jishinda ja kupwishishamo masongola ne, bafwainwa kwibikako kuba’mba basunge masongola abo.—4/15, peja 17.

• Mwina Kilishitu uji mu nzubo mo balamina bakote ne balemana wakonsha kupita mu makatazho ka?

Kechi wakonsha kuyuka bulongo kipwilo kiji mu nyaunda mwaikela nzubo mo balamina bantu ne. Bantu bavula baji mu nzubo mo balamina bakote ne balemana bakonsha kwitabila mu mafunjisho angi, kabiji bakonsha ne kwambila mwina Kilishitu amba naye obengako bintu byubiwa mu bupopweshi bungi. Balongo ba bwina Kilishitu ba ku mubiji ne ba mu kipwilo muji yewo mwina Kilishitu bafwainwa kuyuka ano makatazho ne kumukwasha kabiji ne kumuta muchima.—4/15, mapeja 25-27.

• Ñanyi mashinda ana akonsha kukwasha baji mu masongola kupwisha makatazho?

Ikalaipo na kimye kya kwisambapo pa makatazho. (Sapwi. 3:1, 7) Ambai mu bukishinka ne na mushingi byonse biji ku muchima wenu. (Efi. 4:25) Telekeshai bibena kwamba mukwenu wa mu masongola ne kuyuka biji mu muchima wanji. (Mat. 7:12) Itabanzhanai byo mwisambapo, ne kwingijila pamo. (Sapwi. 4:9, 10)—7/1, mapeja 20-22.

• Ba mu Jibumba Jitangijila bengijila mu makometi ka?

Kometi ya Lutangijilo; Kometi Itala pa ba Mwingilo ba Kimye Kyonse; Kometi ya Kusampanya; Kometi ya Mwingilo; Kometi ya Lufunjisho; Kometi ya Kunemba.—5/15, peja 29.

• Nanchi byubilo byaambiwapo mu Loma 1:24-32 byaambiwenga ku Bayudea nyi, inyi Bangetila?

Bino byambo byakonsha kwambiwa ku mabumba onse abiji, bino mutumwa Paulo waambilenga mu kushinkamika ku bena Isalela ba kala bakankelwe kulondela Mizhilo pa myaka yavula. Bayukile byatongolwa bya Lesa, bino bakankelwe kwibilondela.—6/15, peja 29.

• Mambo ka kwingila papelela bulume bwetu kyo kuletela lusekelo?

Umvwe twibikila bikonkwanyi byo twakonsha kubula kufikizha nangwa twingijishepotu jishinda ja mutundu ka, kituletela bingi kijikila. Nangwa byonkabyo, kechi twafwainwa kwingilangatu na mukose ne kwibepaika amba po papelela bulume bwetu mu mwingilo wa kusapwila ne.—7/15, peja 29.

• Ki ka kyakonsha kulengela bansemi kubula kwisambanga na baana babo bacheche?

Bintu bimo bilengela kubula kwisambanga bulongo ke moyo wikala na banyike, na mambo a kwikala na muchima wa kwitolwela, ne kukeba kwikala na bintu byanji bya bufyamfya. Bansemi bakonsha kwisambanga na baana babo bakiji banyike byonka byo kikebewa ne kumona mwatala byambo byaamba mwana.—8/1, mapeja 10-11.