Mupashi Wazhila-Bulume Bwimufwainwa mu Bwikalo

“KECHI mumpange mu kyenyi kyenu ne: Ne kuñangata Mupashi wenu wazhila ne.” (Salamo 51:11) Luno lo lulombelo lwa pa muchima lwalombele Mfumu Davida panyuma ya kulenga mambo akatampe amulengejile kuleka kutalwa bulongo kwi Lesa.

Davida waikajile na mupashi wazhila mu bwikalo bwanji bonse. Wamukwashishe saka akiji nsongwalume kushinda Goliata mushilikale kiyangala. (1 Samwela 17:45-50) Kabiji wamukwashishe ne kunemba nyimbo yawama ikyangye kunembapo muntu mukwabo. Davida waambile’mba: “Mupashi wa Yehoba waambile mwi amiwa, kabiji byambo byanji byajinga pa lujimi wami.”—2 Samwela 23:2.

Yesu Kilishitu naye waambilepo pa mupashi wazhila byo amukwashishe Davida mu bwikalo. Kimye kimo Yesu waambijile bantu bamutelekelenga amba: “Davida mwine waambile na Mupashi Wazhila, amba: ‘Yehoba wamwambijile Nkambo yami, amba, Ikalai ku kilujo kyami, Poso ngalule balwanyi benu ke kyakutulapo maulu enu.’” (Mako 12:36; Salamo 110:1) Yesu wayukile’mba mupashi wazhila ye wakwashishe Davida kunemba nyimbo. Nanchi uno yenka mupashi wazhila wakonsha kwitukwasha netuwa nyi?

“Lombai, Mukekitambula”

Anweba kampe kechi mukanembapo nyimbo ne. Bino mwakonsha kupita mu lukatazho lwakatazha nobe kutalañana na kiyangala Goliata. Kyakumwenako akimonai byapichilemo Isabel.a Bamwata wanji bamushile ne kupondokela ku nsongwakazhi ungi. Bamushile mu nkongole ikatampe kabiji kechi bamukwashangako kulama baana babo bakashimbi babiji ne. Waambile’mba: “Kungalukamo ne kundengulula kwankolele bingi ku muchima. Nangwa banshile bino mupashi wazhila wa Lesa uji ne amiwa.”

Nanchi Isabel waketekejile kwikala na mupashi wazhila mu jishinda ja kukumya nyi? Ine. Walombanga kwi Lesa pa juba pa juba amba amupe mupashi wazhila. Wayukile kuba’mba wafwainwa kwikala na bulume bwa Lesa pa kuba’mba akonshenga kuchinchika makatazho, kulama bulongo baana banji ne kupwisha milanguluko ya kwiumvwa kubula kunema. Walondejile byambo bya kwa Yesu bya kuba’mba: “Lombai, mukekitambula; kebai, mukekimona; konkonshai, bakemushinkwilako.”—Mateo 7:7.

Roberto naye wakebelenga kwikala na mupashi wa Lesa wa kumukwasha mu bintu byapusanako. Wafwebulanga bingi fwanka ne bizhima. Waesekele bingi na ngovu pa myaka ibiji kuba’mba aleke uno muteeto. Waubanga’mba ekileke kabiji wabwela kapepe jibiji. Roberto waambile amba: “Naikalanga bingi na bijikila umvwe naleka bizhima. Kino kyandengelanga kukeba kupepa bizhima pa juba pa juba.”

Roberto wanungilepo’mba: “Bino nafuukwilepo kupimpula bwikalo bwami pa kuba’mba ñingijilenga Lesa bulongo. Nebikangako kyonse kimye kulanguluka pa biji mu Baibolo. Nalombanga kwi Lesa kufuma panshi ya muchima kuba’mba ampe bulume bwakunkwasha kwikela mwayila byaamba Baibolo. Nayukile kuba’mba kechi nakonsha kwikyuba bunke bwami ne. Nemwenejile na meso Yehoba byo akumbula milombelo, kikatakata umvwe na ikala na binyenge na mambo a kubwezhapo muteeto ye nkeba kuleka. Nayukishatu bulongo kuba’mba mupashi wazhila wa Lesa wakoseshanga; kwakubula aye, inge kechi nakonsheshe ne.”—Filipai 4:6-8.

Bakatumbuka “Kuya Mwiulu Nobe Bampungu”

Byonka byo kyajinga kwi Isabel ne Roberto, Bakamonyi ba kwa Yehoba bayuka bingila bulume bwa mupashi wazhila mu bwikalo bwabo. Bulume bwa Yehoba, bulume boaingijishe pa kulenga bilengwa byonse ne biji mwiulu pamo, mwakonsha kwikala nabo. Lesa ukebesha bingi kwimupa mupashi wanji umvwe mwibikako kumulomba. Bino pa kuba’mba mutambule mupashi wazhila, Lesa ukeba’mba mufunde bukine pe aye ne kukebesha kuba kyaswa muchima wanji.—Isaya 55:6; Bahebelu 11:6.

Mupashi wazhila wakonsha kwimupa bulume bwa kwingijila Lesa bulongo ne kuyuka byakuba na makatazho onse eya mu bwikalo. Bino ne Baibolo byo byo aamba’mba: “Yehoba upana bulume ku batembuka, kabiji umukosesha awa wabula ngovu... . Aba bamupembelela Yehoba bakatambula bulume bupya; bakatumbuka ne kuya mwiulu nobe bampungu; bakanyemanga ne kukoka ne; bakendaendangatu ne kupungila ne.”—Isaya 40:28-31.

[Tubyambo twa mushi]

[Mabulañano pa peja 8]

‘Nalombanga kwi Lesa kufuma panshi ya muchima kuba’mba ampe bulume. Nayukile kuba’mba kechi nakonsha kwikyuba bunke bwami ne. Nemwenejile na meso Yehoba byo akumbula milombelo’

[Kitenguluzha/Bipikichala pa peja 7]

BULUME BWA MUPASHI WAZHILA

Lesa waingijishe mupashi wazhila pa kulenga ntanda ne byonse bya mwiulu. Nyimbi wa masalamo waambile’mba: ‘Anweba Yehoba, mingilo yenu byo yavujisha! Monka mu maana mo mwiilengejile yonse: Panopantanda payula bilengwa byenu.’ “Mutuma Mupashi wenu, ne abo balengwa.”—Salamo 104:24, 30; Ntendekelo 1:2; Yoba 33:4.

Mupashi wazhila wakwashishe banabalume kunemba Baibolo. Mutumwa Paulo wanembele’mba: ‘Binembelo byonse byanembeshiwa kwi Lesa, kabiji byawama.’ (2 Timoti 3:16) Mupashi wa Yehoba watangijile banembi ba Baibolo ne kwibalengela kunemba “mambo a Lesa.”—1 Tesalonika 2:13.

Mupashi wazhila wakwashishe bantu ba Lesa kwaula bintu bya kulutwe bya kine. Mutumwa Petelo waambile’mba: “Kafwako bya bungauzhi bya mu binembelo byaishile na kwibisolomona ngauzhi mwine ne. Mambo bya bungauzhi kechi byaishilepo na kyaswa muchima wa muntu nangwa jimotu ne, bino bantu baambile byafumine kwi Lesa, monka mo bebatwajiletwajile ku mupashi wazhila.”—2 Petelo 1:20, 21; Yoela 2:28.

Mupashi wazhila wakwashishe Yesu ne banabalume bakwabo bajinga na lwitabilo kusapwila mambo awama a Bufumu bwa Lesa ne kuba bya kukumya. Yesu waambile’mba: “Mupashi wa Nkambo uji pe amiwa, mambo wanshinga manyi amba, usapwile mambo awama ku balanda: Wantuma mu kusapwila mambo a bupokolweshi ku bo bakasa, ne a kumona meso ku bampofu.”—Luka 4:18; Mateo 12:28.

[Kitenguluzha/Bipikichala pa peja 9]

MASHINDA MWITUKWASHISHA MUPASHI WAZHILA

Mupashi wazhila wakonsha kwimukwasha kushinda meseko ne kuleka byubilo byatama. Mutumwa Paulo waambile’mba: “Kafwako lweseko lwimufikila lo babula kumona bantu bonse ne: mambo Lesa ye wa kishinka, kechi akemuleke’mba, mumone lweseko lwakila pa bulume bwenu ne: bino mu lweseko ukemumwena ne jishinda ja kupulukilamo, amba mumone mwa kwilukonshesha.”—1 Kolinda 10:13.

Mupashi wazhila wakonsha kwimukwasha kwikala na byubilo bitokesha Lesa pa muchima. “Bipangwa bya Mupashi bo butemwe, ne lusekelo, ne mutende, ne kukoka muchima, ne lusa, ne buwame, ne bukishinka, ne bukimote, ne kwikanya.”—Ngalatiya 5:22, 23.

Mupashi wazhila wakonsha kwimukwasha kuchinchika meseko. “Nakonsha kuba byonse mwi aye unkosesha.”—Filipai 4:13.