Twajijilai Kwikala Balusekelo mu Bimye bya Makatazho
“Bonse baketekela mwi anweba [Yehoba] basekele, babijike na lusekelo moba onse.” —SALA. 5: 11.
1, 2. (a) Bintu ka bimo bilengela bantu kwikala na bijikila byavula lelo jino? (b) Kununga pa bya malwa bipitamo bantu bonse, bena Kilishitu bakine bafwainwa kuchinchika ku bintu ka?
BAKAMONYI BA KWA YEHOBA nabo bapita mu bya malwa bipitamo bantu bonse. Bantu ba Lesa bavula bebamanyika, kwibepaya mu nkondo ne kupitatu mu bintu bikwabo byatama. Bya malwa bipulumukatu, buyanji, bikola ne lufu bibaletela bingi bijikila. O ene mambo mutumwa Paulo o anembejile amba: “Twayuka namba bilengwa byonsetu bibenakubinza ne kumvwa misongo pamotu ne buji lelo.” (Loma 8:22) Kabiji tupita ne mu bintu bikwabo byubiwa na mambo a bumbulwa kulumbuluka bwetu. Ne atweba twakonsha kwamba byonka byaambile Mfumu Davida wa ku kala amba: “Bibi byami byapita ne peulu ya mutwe wami: Pamo nobe kisendwa kyanema byannemena kukila ne pa bulume bwami.” —Sala. 38: 4.
2 Kabiji kununga pa bya malwa bipitamo bantu bonse, bena Kilishitu bakine basenda kichi kya lumanamo kya kifwanyikizho. (Luka 14:27) Ee kine, byonka byajinga Yesu, ne baana banji ba bwanga nabo bebapata ne kwibamanyika. (Mat. 10: 22, 23; Yoa. 15:20; 16: 2) Onkao mambo, byo tulondela Kilishitu twafwainwa kwibikako kwingila na ngovu ne kuchinchika byo tukipembelela mapesho a mu ntanda ipya. —Mat. 7: 13, 14; Luka 13: 24.
3. Twayuka byepi kuba’mba bena Kilishitu kechi bafwainwatu kupita mu makatazho pa kuba amba batokeshe Lesa pa muchima ne?
3 Nanchi kino kilumbulula amba bena Kilishitu bakine kechi bekala bwikalo bwa lusekelo nenyi? Abya twikalangatu ba bulanda ne binyenge shoo ne byo tukafika ku mpelo nyi? Kwambatu kine, Yehoba ukeba atweba kwikala balusekelo byo tukipembelela kufika kwa milaye yanji. Baibolo walumbulula bimye byavula kuba’mba bapopweshi bakine ke bantu balusekelo. (Tangai Isaya 65: 13, 14.) Salamo 5:11 waamba’mba: “Bonse baketekela mwi anweba [Yehoba] basekele, babijike na lusekelo moba onse.” Kya kine, twakonsha kwikalako na lusekelo, kukasuluka mu milanguluko ne kusekela mu byonka byo tuji nabyo nangwa kya kuba tubena kupita mu bya malwa. Twayai tumone Baibolo byo akonsha kwitukwasha kutwajijila kwikala balusekelo nangwa kya kuba ketupite mu makatazho.
Yehoba ke ‘Lesa wa Lusekelo’
4. Lesa wiumvwa byepi ku muchima umvwe nkebelo yanji yabula kulondelwa?
4 Kya kumwenako, akilangulukai pe Yehoba. Byo aji Lesa wa Bulume Bonse, bilengwa byonse bimukokela. Kechi ukajilwa kintu ne, kabiji kechi upopwela muntu ne. Pano bino, nangwa kya kuba uji na bulume bwakijisha, kyamweka Yehoba kyamufichile bingi ku muchima kimye mwananji umo wa ku mupashi kyo asatukile ne kwikala Satana. Nangwatu kimye bamalaika bamo kyo bamusatukijile Lesa napotu kyamukolele ku muchima. Kabiji akilangulukaipotu ne pa byo kyamufichile Lesa ku muchima ba Adama ne Evwa, abo baambilangako bilengwa byonse bya panopantanda byo bamusatukijile. Kufumatu kyokya kimye, baana babo bavula bakana buntangi bwa Yehoba. —Loma 3: 23.
5. Bintu ka kikatakata bilengela Yehoba kwikala wa bulanda?
5 Bantu bakitwajijila kutundaika bunsatuki bwatendekele Satana. Pa myaka 6,000 yapitapo, Yehoba umona byubilo bya bantu bya kupopwela bankishi, bukapondo, kwipayañana kabiji ne kwilaala kwabula kufwainwa. (Nte. 6: 5, 6, 11, 12) Kabiji umvwatu byonse byambo bya bubela ne bya mwenga byo bamwambila. Nangwatu bapopweshi ba Lesa bakine kimye kimo bamufichisha bingi ku muchima. Baibolo walumbulula kino kwingijisha bino byambo amba: “Mama-a! byo javula jo bamulengulwile byo bajinga mungyetu, Ne kumufichisha ku muchima monka mu biselebwatu. Kabiji baalulukile jibiji ne kumweseka Lesa, Ne kumuzhingijisha yenkaye Wazhila wa Isalela.” (Sala. 78: 40, 41) Yehoba kimukola bingi ku muchima umvwe bantu banji bamukana. (Yele. 3: 1-10) Ee kine, Yehoba wikala bingi wa bulanda pa mambo a bintu byatama byubiwa. —Tangai Isaya 63: 9, 10.
6. Nga Lesa uba byepi na bintu bimuletela bulanda?
6 Nangwa byonkabyo, bino bintu bimukozha ku muchima Yehoba kechi bimulengela kulefulwa ne. Umvwe paikala makatazho, Yehoba bukiji bukiji ufomonako bulume bwa oo makatazho. Kabiji makatazho akwabo ukeapwisha kulutwe na lwendo pa kuba’mba nkebelo yanji ikafike. Na mambo a bino bintu byo akoba, Yehoba utonga bingi na lusekelo kufika kwa kimye kikazhijikwa bumfumu bwanji kabiji ne kimye bapopweshi banji bakishinka kyo bakatambwila mapesho. (Sala. 104:31) Ee kine, nangwa kya kuba bantu bamunena mwenga mukatampe, Yehoba watwajijila kwikala ‘Lesa wa lusekelo.’ —1 Timo. 1:11; Sala. 16: 11.
7, 8. Umvwe bintu byaya munsunya, twakonsha kumwena byepi kwi Yehoba?
7 Kwambatu kine kechi twakonsha kwesakanya bulume bwetu bwa kupwisha makatazho ku bwa kwa Yehoba ne. Pano bino twakonsha kumwena kwi aye byo oba umvwe ne atweba ketupite mu makatazho. Kijitu bulongo kumvwa bulanda umvwe bintu byaya munsunya, pano bino kechi twafwainwa kutwajijila kwiumvwa bino ne. Na mambo a kuba twalengelwe mu kipasha kya Yehoba, tuji na bulume bwa kulanguluka ne maana, abyo bitulengela kuyuka biji makatazho o tupitamo ne kuyuka bya kwiapwisha umvwe kyakonsheka.
8 Kintu kimo kyanema kyakonsha kwitukwasha kuyuka bya kuba na makatazho a mu bwikalo ke kuyuka kuba’mba kechi tuji na bulume bwa kupwisha makatazho amo etufikila ne. Kutwajijila kwiumvwa bulanda kwakonsha kwitulengela kulefulwa ne kwitupwishisha lusekelo lo twikala nalo mu mpopwelo ya kine. Umvwe twapwisha lukatazho, twafwainwa kulubako ku lolo lukatazho ne kuta muchima ku bintu bikwabo byanema. Mashimikila a mu Baibolo alondelapo amwesha bulongo kino kishinka.
Kukoka Muchima Kwanema Bingi
9. Hana wamwesheshe byepi kukoka muchima?
9 Monai kya kumwenako kya kwa Hana, waikele inanja ngauzhi Samwela. Wajinga bingi na bulanda na mambo a kuba kechi wasemanga ne. Bamunenanga ne kumwendeleka na mambo a kuba wajinga ñumba. Pa bimye bimo, Hana walefulwanga bingi kya kuba ke ajile ne kubula kuja kajo. (1 Sam. 1: 2-7) Juba jimo byo ayile ku nzubo ya Yehoba yazhila, Hana “walombele kwi Yehoba sa aji na kinyenge ku muchima ne kujila wajijile bingi.” (1 Sam. 1:10) Panyuma ya kuba Hana walomba kwi Yehoba pa mambo a byonse byamukatezhenga ku muchima, Eli ñanga mukatampe waishile ko aji ne kumwambila amba: “Nanchi yangapo mu mutende; kabiji aye Lesa wa Isalela akubile monka mwayila kyokya kyo wajikumulomba.” (1 Sam. 1:17) Byo bamubujile bino, Hana wavulukile amba kine waubile byonse byo akonsheshe kuba. Kyamupezhezhe bingi maana byo abulanga kusema. Hana wamwesheshe kukoka muchima. Kepo “kaye ne kuya ne kuja wajile, ne kilungi kyanji kechi kyaubile bulanda jibiji ne.” —1 Sam. 1: 18.
10. Paulo wamwesheshe muchima ka byo apichile mu lukatazho lo akonsheshe kubula kupwisha?
10 Mutumwa Paulo naye wamwesheshe kukoka muchima byo apichilenga mu makatazho. Naye wapichile mu lukatazho lwamulengejile kwikala na bulanda. Wilutelele amba “mwiba mu mubiji.” (2 Ko. 12: 7) Kikale luno lukatazho lwajinga lwa byepi nangwa byepi, Paulo waingijile papelejile bulume bwanji kwilupwisha kupichila mu kulomba kwi Yehoba kuba’mba amukwashe. Paulo walombele bimye binga pa luno lukatazho? Bimye bisatu. Panyuma ya kuba Paulo walomba ja busatu, Lesa wamubujile amba “mwiba mu mubiji” kechi ukamufumyamo mu jishinda ja kukumya ne. Paulo waswile kino kishinka ne kutwajijila kwingijila Yehoba na muchima yense. —Tangai 2 Kolinda 12: 8-10.
11. Lulombelo ne misashijilo bitukwasha byepi kuyuka mwakubila na makatazho o tupitamo?
11 Bino bya kumwenako kechi bibena kumwesha amba twafwainwa kuleka kulomba kwi Yehoba pa mambo a bintu bituletela bijikila ne. (Sala. 86: 7) Mambo a Lesa etusashijila amba: “Kechi mubambishe michima yenu nangwa mu kintu kimo ne; kabiji mu bintu byonse kasa musolola kwi Lesa byo musaka monka mu lulombelo ne lusashijilo ne kuba sante pamo.” Yehoba ubapo byepi pa ino misashijilo? Baibolo wanungapo amba: “Kabiji mutende wa Lesa ubula kuyukanyika, ukalama michima yenu ne milanguluko yenu mwi Kilishitu Yesu.” (Fili. 4: 6, 7) Ee, Yehoba kechi wakonsha kufumyapo makatazho etu ne, bino wakonsha kukumbula kupichila mu kulamawizha bulume bwetu bwa kulanguluka. Panyuma ya kulomba pa mambo a kintu, twakonsha kuyuka kizumba kifuma mu kwikala na bijikila.
Sekelainga mu Kuba Kyaswa Muchima wa Lesa
12. Mambo ka kulefulwa pa kimye kyabaya kyo kwakonshesha kubika muntu mu kizumba?
12 Byambo bya Mana 24:10 byaamba’mba: “Umvwe wapungila mu juba ja bya malwa, bulume bobe bwakepa.” Kishimpi kikwabo kyaamba amba: “Pakuba bulanda buji mu muchima bulengesha ne muchima kulajika.” (Mana. 15:13) Bena Kilishitu bamo balefulwa kya kuba bafika ne pa kuleka kutanga Baibolo ne kulanguluka pa Mambo a Lesa. Milombelo yabo yaluka ke yatutu, kabiji bakonsha ne kwipatula ku bapopweshi bakwabo. Kwambatu kine, kulefulwa pa kimye kyabaya kwakonsha.
13. Mingilo ka imo yakonsha kwitukwasha kubula kulefulwanga kabiji ne kwituletela lusekelo?
13 Nangwa byonkabyo, kwikala na mweno ya bintu yawama kwakonsha kwitukwasha kutatu muchima ku bintu bimo bya mu bwikalo byakonsha kwituletela lusekelo. Davida wanembele amba: “Nsekela bingi mu kuba kyaswa muchima wenu, anweba Lesa wami.” (Sala. 40: 8) Umvwe bintu byaya munsunya, kechi twafwainwa kuleka kuba bintu byalamata mpopwelo yetu ne. Kintu kyakonsha kwitukwasha ke kwingilako mingilo ituletela lusekelo. Yehoba witubula kuba’mba twakonsha kwikala balusekelo kupichila mu kuteshako muchima kutanga Mambo anji kimye kyonse. (Sala. 1: 1, 2; Yako. 1:25) Mu Binembelo Byazhila ne pa kupwila kwa bwina Kilishitu tutambwila “byambo byalumbuluka” byakonsha kwitutundaika ne kwitulengela kwikala balusekelo. —Mana. 12:25; 16: 24.
kubika muntu mu kizumba. —Mana. 18: 1, 14.
14. Mulaye wa Yehoba ka wituletela lusekelo lelo jino?
14 Lesa witumwesha bishinka byavula bingi byakonsha kwitulengela kwikala balusekelo. Mulaye wanji wa kupulusha bantu kine wituletela bingi lusekelo. (Sala. 13: 5) Twayuka’mba nangwa kya kuba tupite mu bintu bya byepi nangwa byepi, kulutwe na lwendo Lesa ukapesha boba bamukeba kya kine. (Tangai Musapwishi 8:12.) Ngauzhi Habakuka wamwesheshe luno luketekelo bulongo byo anembele amba: ‘Nangwa mikuyu ikabula kulala buluba ne, ne miñanzañanza kupanga ne, ne maolivi nao kupanga ne, ne majimi nao kumenesha kajo ne, ne mu bipaka mukekala kafwamo mikooko ne bañombe, amiwa nkasekela mwi Yehoba ne kumwena lusekelo mu yenkaye Lesa umupulusha.’ —Ha. 3: 17, 18.
“Bo Bene ba Lusekelo awa Mutundu wa Bantu Baji ne Lesa Wabo, Yehoba”
15, 16. Tongaulai bupe bumo bwitupa Lesa bo twakonsha kumwenamo lusekelo byo tubena kupembelela mashuko a kulutwe.
15 Byo tubena kupembelela kimye kyawama kya kulutwe, Yehoba ukeba’mba tusekelenga mu bintu byawama byo abena kwitupa. Baibolo waamba’mba: “Nayuka namba kafwako kibawamina bantu kukila kino ne, kya kuba’mba basekele ne kusangalala saka bakiji na bumi; kabiji namba kyo kya bupetu kyo apana Lesa ku bantu, kya kuba’mba muntu yense aje ne kutoma ne kusekela mu mingilo yanji yonse.” (Sapwi. 3: 12, 13) “Kusangalala” kwavwangamo kubila bakwetu bintu byawama. Yesu waambile amba lusekelo lo bamona aba bapana lwakila lo bamona aba batambula. Kuba byawama ku bakwetu ba mu masongola, baana, bansemi ne balongo betu ba ku mubiji kwituletela lusekelo lukatampe. (Mana. 3:27) Kumwesha kifyele, kutambwila benyi ne kulekelako mambo balongo ne banyenga yetu ba ku mupashi kwituletela bingi lusekelo, kabiji kutokesha Yehoba pa muchima. (Nga. 6:10; Kolo. 3: 12-14; 1 Pe. 4: 8, 9) Kabiji kwingila mwingilo wetu na muchima wa kwipana kwituletela bingi mapesho.
16 Byambo byo twaambapo byanembwa mu buku wa Musapwishi byatongola bintu bimo bituletela lusekelo, nabiji kuja ne kutoma. Ee kine, nangwatu kya kuba tubena kupita mu makatazho, twakonsha kumwena lusekelo mu bupe bwa ku mubiji bwitupa Yehoba. Kunungapo, umvwe twamona bisama juba, mpunzha yawama, nkayilo ya baana ba banyama ne bintutu bikwabo bya mu bwikalo byakonsha kwitulengela kunemeka Lesa ne kwituletela lusekelo. Byo tulanguluka pa bino bintu, tumutemwa Yehoba kya kine mambo ye Mpanyi wa bintu byonse byawama.
17. Ki ka kiketukasulula kikupu ku bya malwa, kabiji pa kino kimye ki ka kituletela lusekelo?
17 Ee kine, kutemwa Lesa, kukokela mikambizho yanji ne kuketekela mu kitapisho kya bukuzhi kuketukasulula ku makatazho a mu bwikalo bwa bumbulwa kulumbuluka kabiji ne kwitutangijila ku lusekelo lwa myaka. (1 Yoa. 5: 3) Pa kino kimye, tusekela na mambo a kuyuka’mba Yehoba wayuka makatazho onse o tupitamo. Davida wanembele amba: “Nkasekela ne kusangalala mu lusa lwenu; Mambo anweba mwamona kumanama kwami: Mwayuka byakatazha byamona muchima wami.” (Sala. 31: 7) Na mambo a kwitutemwa, Yehoba uketukasulula ku bya malwa. —Sala. 34: 19.
18. Mambo ka bantu ba Lesa o bafwainwa kwikela balusekelo?
18 Byo tubena kupembelela kufika kwa milaye yanji, twayai twikale byonka biji Yehoba Lesa wetu wa lusekelo. Kange tubwelenga panyuma ku mupashi na mambo a kulefulwa ne. Umvwe paikala makatazho, lekai bulume bwa kulanguluka ne maana a kine etutangijilenga. Yehoba uketukwasha kuyuka bya kuba na bijikila ne kwingila papelela bulume bwetu kukepeshako makatazho. Twayai tusekelenga mu bintu byawama byo etupa kikale bya ku mubiji nangwa ku mupashi. Kupichila mu kufwenya kwipi ne Lesa tukekalanga balusekelo mambo “bo bene ba lusekelo awa mutundu wa bantu baji ne Lesa wabo, Yehoba.” —Sala. 144: 15.
Bi ka byo Mwafunda?
•Twakonsha kumwena byepi kwi Yehoba pa mambo a kuyuka mwakubila na makatazho?
•Kukoka muchima kwakonsha kwitukwasha byepi kuyuka bya kuba na makatazho?
•Mu kimye kya bya malwa, twakonsha kusekela byepi mu kuba nkebelo ya Lesa?
[Bipikichala pa peja 16]
Yehoba kimukola bingi ku muchima pa bintu byatama bibena kubiwa
[Byambo bya Muntu Ungi]
© G.M.B. Akash/Panos Pictures
[Bipikichala pa peja 18]
Yehoba witupa bintu byakonsha kwituletela lusekelo