Fwenyai Kwipi ne Lesa
‘Bufumu Bobe Bukakosatu Po’
MU BWIKALO bwa bantu, bandamabyalo bavula bebafumyapo pa bifulo byabo. Bamo bebafumyapo kimye kya bunsaji kabiji bakwabo nabo bebafumyapo kya kwibakanjikizhatu. Nga Yesu Kilishitu, Mfumu wa Bufumu bwa Lesa bwa mwiulu kiji byepi? Nanchi paji kintu kyakonsha kumukanya kulama byo aji Mfumu watongolwa na Lesa nyi? Mukumbu twakonsha kumutana mu byambo byaambile Yehoba kwi Mfumu Davida wa bena Isalela bakala byonka byo kyanembwa mu 2 Samwela kitango 7.
Ku ntendekelo ya kino kitango, tufundamo kuba’mba Davida kechi watemenwe byo ajinga mfumu ne kwikala mu jilapa jawama, bino jikwachi ja Lesa saka jaikalatu mu tente ne.a Davida wakebeshe bingi kushimika nzubo yanema ya Yehoba. (Kyepelo 2) Bino, Davida kechi ye wafwainwe kwiishimika ino nzubo ne. Kupichila mwi ngauzhi Natana, Yehoba wabujile Davida kuba’mba mwananji ye ukashimika ino nzubo.—Byepelo 4, 5, 12, 13.
Yehoba watemenwe bingi na byakebele kuba Davida. Pa kukumbula kwipana kwa kwa Davida kwesakana na bungauzhi, Lesa walayañene lulayañano ne Davida kuba’mba ukafumya muntu mu kisemi kya kwa Davida kwikala mfumu ukalamanga myaka ne myaka. Natana wabujile Davida uno mulaye wa Lesa wa kuba’mba: “Kisaka kyobe ne bufumu bobe bikakosatu po kikupu; ne jitanda jobe jikekalanga myaka ne myaka.” (Kyepelo 16) Ñanyi ukekala Nswanyi wa myaka wa lulayañano, ukalamanga myaka ne myaka?—Salamo 89:20, 29, 34-36.
Yesu mwina Nazala wafumine mu kisaka kya kwa Davida. Pa kubijika kusemwa kwa kwa Yesu, malaika waambile’mba: “Nkambo Lesa ukamupa jitanda ja bufumu ja shanji Davida: aye ukekala mfumu mu kisaka kya kwa Yakoba myaka yonsetu; ne bufumu bwanji kechi bukapwa ne.” (Luka 1:32, 33) Ko kuba’mba, lulayañano lwa kwa Davida, Yesu Kilishitu ye wilufikizhe. Onkao mambo, ulama kechi na kyaswa muchima wa bantu ne, poso na mulaye wa Lesa ye amupa wa kulama myaka ne myaka. Twayai tuketekele kuba’mba milaye ya Lesa ya kine.—Isaya 55:10, 11.
Mu 2 Samwela kitango 7 muji bishinka bibiji byanema byo twakonsha kufunjilako. Kishinka kitanshi, twafwainwa kuketekela’mba kafwako nangwa umo wakonsha kukanya Yesu kilishitu kulama ne. Mu jino jishinda, twakonsha kuketekela’mba aye ukafikizha mulaye wa bukalama bwanji, ko kuba’mba, kufikizha nkebelo ya kyaswa muchima wa Lesa panopantanda byonka byo kiji mwiulu.—Mateo 6:9, 10.
Kya bubiji, aje jishimikila jitufunjisha lufunjisho lwanema bingi pe Yehoba. Vulukai’mba Yehoba wamwene ne kunemeka kintu kyakebelenga kuba Davida. Kisangajika bingi kuyuka’mba Yehoba umona ne kunemeka byo twipana kumupopwela. Bimye bimo, bintu bikatazha nabiji kukolwakolwa nangwa bukote, byakonsha kwitulengela kukankalwa kwingijila Lesa kwesakana na bikeba muchima wetu. Umvwe kyaikala bino, twayai tutane lutekenesho mwi Yehoba ne kuyuka’mba aye umona ne milanguluko ya muntu ukebesha kumwingijila.
[Tubyambo twa mushi]
a Jikwachi ja lulayañano jazhijile bingi kabiji bejilengele kwesakana na mizhilo yapaine Yehoba. Jino jikwachi jalumbulwilenga’mba Yehoba wajinga mukachi ka bena Isalela bakala.—Kulupuka 25:22.