Mepuzho Afuma ku Batanga

Nanchi Twakonsha Kuyuka Bungauzhi Bonse Bwaamba pe Yesu Buji mu Binembelo bya Kihebelu Nyi?

Kubalaula bulongo Binembelo bya Kihebelu kwitulengela kuyuka bungauzhi bwavula bwafikile mwi Yesu Kilishitu. Buno bungauzhi bwaambijile jimo bikekala bwikalo bwa kwa Yesu, kimye kyo akekalako, mingilo yanji, byo bakamuba ne kifulo kyanji mu lunengezho lwa Yehoba Lesa. Buno bungauzhi bonse bwitulengela kuyuka Yesu amba ye Mesiasa. Nangwa byonkabyo, kechi twakonsha kuyukatu bungauzhi bonse bwaamba pe Yesu amba ye Mesiasa buji mu Binembelo bya Kihebelu ne.

Bantu bamo bakana’mba bungauzhi bumo bwaamba pe Mesiasa kechi ibo ne. Buku wa The Life and Times of Jesus the Messiah wanembele Alfred Edersheim waamba’mba masukulu a Bayudea atongwele byepelo 456 mu Binembelo bya Kihebelu amba bo bungauzhi bwaamba pe Mesiasa nangwa kya kuba byavula kechi byamankula jizhina ja Mesiasa ne. Bino panyuma ya kupesapesa bino byepelo 456, bimo byazhinaukwa’mba kechi bungauzhi bwaamba pe Mesiasa ne. Kyakumwenako, Edersheim waambile’mba Bayudea baambanga’mba kinembelo kya Ntendekelo 8:11 kyaamba pe Mesiasa. Baambanga’mba “jibula ja olivi jaletele nkunda wijifumishe ku Mutumba wa Mesiasa.” Uno nembi waambile ne pa Kulupuka 12:42. Walumbulwile Bayudea byo babujile kumvwisha kino kinembelo amba: “Byonka Mosesa byo afumine mu kiselebwa, ne Mesiasa naye ukafuma mu Loma.” Bashayuka bavula ne bantu bakwabotu bakana’mba bino binembelo bibiji kechi byaamba pe Yesu Kilishitu ne.

Nangwa kya kuba twakonsha kuswakotu binembelo bimwekatu patoka’mba byafikile mwi Yesu Kilishitu, kechi twakonsha kuyuka kine kibelengelo kya binembelo byonse byaamba pe Mesiasa ne. Kyakumwenako, akimonai Isaya kitango 53 muji mbaji yapusana pusana ya bungauzhi bwaamba pe Mesiasa. Isaya 53:2-7 waambile’mba: ‘Aye kechi uji na musango wawama ne . . . Bamusujile ku bantu ne kumulengulula . . . Kine byo binyenge byetu byo etwikile . . . Waashilwe na mambo a mizhilulwila yetu . . . Wazhindamine byonka bizhindama mwana mukooko ye babena kutwala na kwipaya.’ Nanchi kino kitango kyonse kya mu buku wa Isaya 53 twafwainwa kwikimona’mba bungauzhi bumotu nyi, inyi amba kyepelo kimo kimo ke bungauzhi pa bunke bwakyo nyi?

Kabiji akilangulukai Isaya 11:1, waamba’mba: “Musele ukalupuka ku kishina kya Yese ye musampi ufuma ku mizhazhi yanji ne kupanga bipangwa.” Buno bungauzhi buji ne mu kyepelo 10. Nanchi twafwainwa kumona’mba bino byepelo bibiji biji na bungauzhi bwapusana nyi, inyi bungauzhi bumotu bo babwezhapo? Mbajilo yo mwabajilamo bungauzhi buji mu Isaya kitango 53 ne mu Isaya kitango 11 yakonsha kwimulengela kutana kibelengelo kyapusana kya bungauzhi bwaamba pe Mesiasa.

Onkao mambo, kechi twafwainwa kwakamwa pa mambo a kuyuka kibelengelo kya bungauzhi bonse buji mu Binembelo bya Kihebelu bwaamba pe Mesiasa ne. Jibumba ja Yehoba janemba mitanchi ibena kumwesha bungauzhi bwavula bwaamba pe Yesu kabiji ne byo bwafikile.a Ino mitanchi itukwasha pa lufunjisho lwa pa bunke ne mu mwingilo wa mu bujimi. Bungauzhi bwaamba pe Mesiasa nangwa kechi twayuka kibelengelo kyabo kyonse ne, bino bonka bo twayukako bwitulengela kushiinwa’mba Yesu Kilishitu ye Mesiasa.

[Tubyambo twa mushi]