Ikelainga Mwayila Lulombelo Lwa Kwa Yesu

“Tata, . . . tumbijikai mwanenu kuba amba mwanenu emutumbijike.”—YOA. 17:1.

MWALANGULUKAPO’MBA KA?

Ñanyi bintu byavwangwa mu ‘kuyuka’ Lesa kya kine?

Nga lulombelo lwa kwa Yesu lwanembwa mu Yoano kitango 17 lwakumbwilwe byepi mu myaka kitota kitanshi?

Twakonsha kwikela byepi mwayila lulombelo lwa kwa Yesu mu ano moba?

1, 2. Lumbululai byaubile Yesu na batumwa banji bakishinka panyuma ya kuja Kijiilo kya Lupitailo mu 33 C.E.

KYAJINGA kimye kya mabanga pa Nisanyi 14 mu 33 C.E. Yesu ne balunda nanji popo bapwishishetu kuja Kijiilo kya Lupitailo, kibavulwilemo Lesa byo apokolwele bashakulu babo mu buzha mu Ijipita. Pano bino, batumwa banji bakishinka batengejilenga ‘kwibapokolola myaka ne myaka.’ Juba jalondejilepo, Yesu bamwipayile ku balwanyi banji. Kitapisho kya bumi bwanji bwalumbuluka kyashinkwile jishinda ja kulengela bantu kukasululwa ku bundengamambo ne lufu.—Hebe. 9:12-14.

² Pa kuba’mba tubule kulubamo luno lunengezho lwanema, Yesu watendekeshe kijiilo kya pa mwaka pa mwaka kyapingakenejile pa Kijiilo kya Lupitailo. Waubile bino kupichila mu kutebaula shinkwa wabula mbizho, kabiji byo apelenga batumwa banji bakishinka 11 waambile’mba: “Kino kibena kwimenako mubiji wami, ye nkapana na mambo a anweba. Saka muba kino mu kumvuluka.” Byo byo aubile ne na katomeno, wibambijile’mba: “Kano katomeno lo lulayañano lupya lukatatula kimye kyo nkemwichijila mashi ami.”—Luka 22:19, 20.

3. (a) Ñanyi lupimpu lukatampe lwaubiwe panyuma ya lufu lwa kwa Yesu? (b) Ñanyi mepuzho o tusakwisambapo aamba pa lulombelo lwa kwa Yesu lwanembwa mu Yoano kitango 17?

³ Lulayañano lwa Mizhilo, Lesa lo alayañene na bena Isalela bakisemwa lwajinga pepi kupwa. Bapingizhepo lulayañano lupya Yehoba lo alayañene na baana ba bwanga bashingwa ba kwa Yesu. Yesu kechi wakebelenga baana banji ba bwanga kwikala byonka byajinga bena Isalela ne. Mambo bena Isalela kechi bakwatankene mu kupopwela Lesa ne, kino kyaletele mwenga pa jizhina ja Lesa. (Yoa. 7:45-49; Byu. 23:6-9) Pakuba Yesu wakebelenga baana banji ba bwanga kutwajijila saka bakwatankana ne kwingijila pamo mu kuleta lukumo ku jizhina ja Lesa. Pano Yesu waubile byepi? Walombele lulombelo lwawama bingi bantu bonse lo bafwainwa kutanga. (Yoa. 17:1-26; monai kipikichala kitanshi.) Byo tusakwisambanga pa luno lulombelo, twayai tulangulukenga pa ano mepuzho a kuba’mba: “Nanchi Lesa wakumbwile lulombelo lwa kwa Yesu nyi? Abya mbena kwikela monka mwayila luno lulombelo nyi?”

BINTU BYANEMEKELE YESU MU BWIKALO BWANJI

4, 5. (a) Twakonsha kufunjilako ka ku bintu Yesu byo atendekejilepo kutongola mu lulombelo lwanji? (b) Yehoba wakumbwile byepi lulombelo lwa kwa Yesu?

⁴ Yesu wafunjishe baana banji ba bwanga bukine bwanema bingi pe Lesa kufikatu ne bufuku. Watajile mwiulu ne kulomba’mba: “Tata, kimye kyafika; tumbijikai mwanenu kuba amba mwanenu emutumbijike, byonkatu byo mwamupa lūsa lwa pa bantu bonse, akonshe kupana bumi bwa myaka ku bonse bo mwamupa. . . . Amiwa nemutumbijika pano pa ntanda, byo napwisha kwingila mwingilo ye mwampele. Onkao mambo, Tata, ntumbijikai na lukumo lo najinga nalo nenu saka mukyangye kulenga pano pa ntanda.”—Yoa. 17:1-5.

⁵ Mu lulombelo lwanji, Yesu watendekejilepo kutongola bintu byo anemekele bingi mu bwikalo bwanji. Kintu kyo anemekele bingi ke kuzhijika jizhina ja Shanji wa mwiulu, kabiji kino kyo kintu kitanshi kyo aambilepo ne mu lulombelo lwanji lwa kumwenako amba: “Tata, jizhina jenu jizhile.” (Luka 11:2) Kya bubiji, Yesu walombele pa bintu byabujile baana banji ba bwanga. Walombele kuba’mba, ‘akonshe kwibapa bumi bwa myaka.’ Panyuma ya bino, Yesu popo alombele kyo akebelenga amba, “Tata, ntumbijikai na lukumo lo najinga nalo nenu saka mukyangye kulenga pano pa ntanda.” Yehoba wakumbwile lulombelo lwa Mwananji kupichila mu kupa Yesu “jizhina jawama kukila” mazhina a bamalaika bonse.—Hebe. 1:4.

‘KUYUKA LESA YENKA WA KINE’

6. Pa kuba’mba batumwa bakekale na bumi bwa myaka, bafwainwe kuba ka, kabiji twayuka byepi kuba’mba batwajijile kuba bino?

⁶ Kabiji Yesu walombele ne pa kyo twafwainwa kuba pa kuba’mba tukatambule bupe bwa bumi bwa myaka ne myaka. (Tangai Yoano 17:3.) Waambile’mba twafwainwa kutwajijila ‘kuyuka’ Lesa ne Kilishitu. Jishinda jimo jo twakonsha kubilamo kino ke kwibikako kufunda byavula pe Yehoba ne Mwananji. Jishinda jikwabo ja kuyukilamo Lesa ke kupichila mu kwimwena bintu byawama bifuma mu kulondela bintu byo etufunjisha. Batumwa baubile bino bintu bibiji, mambo Yesu waambilepo mu lulombelo amba: “Byambo byo mwambujile, ne amiwa nebabulabyo kabiji bebitambula.” (Yoa. 17:8) Bino pa kuba’mba bakekale na bumi bwa myaka ne myaka bafwainwe kutwajijila kulanguluka pa byambo bya Lesa ne kwibilondela mu bwikalo bwabo. Nanchi bano batumwa bakishinka batwajijile na kuba bino kimye kyo bajinga pano pa ntanda nyi? Ee. Twayuka bino mambo mazhina abo onse anembwa pa mabwe 12 a kitendekesho kya Yelusalema Mupya wa mwiulu.—Lum. 21:14.

7. Nga ‘kuyuka’ Lesa kulumbulula ka, kabiji mambo ka o kwanemena?

⁷ Inge tukeba kuba’mba tukekale na bumi bwa myaka, twafwainwa kutwajijila ‘kuyuka’ Lesa. Nga kino kilumbulula ka? Kino kilumbulula’mba twafwainwa kutwajijila kufunda byavula pe aye. Pano bino, kino kyavwangamo byavula, kechi kuyukatu byubilo byanji ne kyaswa muchima wanji ne. Twafwainwa kumutemwa kya kine ne kwikala na bulunda bwawama ne aye. Kabiji twafwainwa kutemwa balongo ne banyenga. Baibolo walumbulula’mba: “Yense ubula kutemwañana kechi wamuyuka Lesa ne.” (1 Yoa. 4:8) Kuyuka Lesa kwavwangamo ne kumukokela. (Tangai 1 Yoano 2:3-5.) Ke kintu kyanema bingi kwikala pa bantu bayuka Yehoba. Pano bino, inge twabula kujimuka, twakonsha konauna buno bulunda byonka byaubile Yudasa Isakaliota. Onkao mambo, twayai twibikeko kukosesha bulunda bwetu ne Yehoba. Inge twauba bino, Yehoba uketupa bumi bwa myaka ne myaka.—Mat. 24:13.

“NA MAMBO A JIZHINA JENU”

8, 9. Ñanyi kintu Yesu kyo anemekele bingi mu mwingilo wanji pano pa ntanda, kabiji ñanyi kisho kya bantangi ba bupopweshi kyo ashikilwe?

⁸ Inge twatanga lulombelo lwa kwa Yesu lwanembwa mu Yoano kitango 17, twakonsha kushiinwa kuba’mba Yesu kechi watemenwetu batumwa banji bonka ne, bino witutemwa ne atweba bonse. (Yoa. 17:20) Nangwa byonkabyo, twafwainwa kuyuka kuba’mba kwitupulusha kechi kyo kintu kyakijilemo kunema mu bwikalo bwa kwa Yesu ne. Kuzhijika jizhina ja Bashanji ne kwijitumbijika kyo kintu kyo anemekele bingi kufumatu ku ntendekelo kufika ne ku mpelo ya mwingilo wanji pano pa ntanda. Byo aambilenga pa mwingilo wanji mu nshinagoga ya ku Nazala, Yesu watangile mu muvungilo wa kwa Isaya amba: “Mupashi wa Yehoba uji pe amiwa mambo wanshinga manyi amba nsapwile mambo awama ku balanda.” Kwa kubula nangwa kuzhinaukatu ne, Yesu watelele jizhina ja Lesa bulongo kimye kyo atangilenga byambo byaamba pa uno mwingilo.—Luka 4:16-21.

⁹ Kwesakana na kisho kya Bayudea, Yesu saka akyangye kwiya pano pa ntanda, bantangi ba bupopweshi bakanyanga kwingijisha jizhina ja Lesa. Kwa kubula nangwa kuzhinaukatu ne, Yesu washikilwe kino kisho. Waambijile bano bantangi ba bupopweshi amba: “Naishila mu jizhina ja Batata, bino anweba kechi mwantambwila ne; umvwe muntu ungi waishila mu jizhina janji, mukamutambwila.” (Yoa. 5:43) Byo kwashajiletu moba acheche kumwipaya, Yesu waambile pa kintu kyo anemekele bingi mu bwikalo bwanji, byo alombele amba: “Tata tumbijikai jizhina jenu.” (Yoa. 12:28) Luno lulombelo lo tubena kwisambapo lwamwesha kuba’mba kutumbijika jizhina ja Bashanji kyo kintu Yesu kyo anemekele bingi mu bwikalo bwanji.

10, 11. (a) Yesu wayukanyikishe byepi jizhina ja Bashanji? (b) Baana ba bwanga ba kwa Yesu bafwainwa kuta muchima pa kuba ka?

¹⁰ Yesu walombele’mba: “Nejisolola jizhina jenu ku bantu bo mwampele kufuma pano pa ntanda. Bajinga benu kabiji mwibampele, ne abo balama byambo byenu. Kabiji kechi nkiji pano pa ntanda ne, bino abo baji pano pa ntanda kabiji amiwa mbena kwiya ko muji. Anweba Tata Wazhila mwibazhikijilenga na mambo a jizhina jenu jo mwampa, kuba amba bekale umo byonka byo tuji anweba ne amiwa.”—Yoa. 17:6, 11.

¹¹ Yesu waubile bintu byavula pa kuyukanyikisha jizhina ja Bashanji ku baana banji ba bwanga, kechi wijitongolangatu ne. Wibakwashishe kuyuka bulongo Yehoba byo aji, ko kuba’mba kuyuka byubilo byanji byawama ne jishinda jawama jo etulaminamo. (Lupu. 34:5-7) Yesu luno ke Mfumu mwiulu, kabiji watwajijila kukwasha baana banji ba bwanga kuyukanyikisha jizhina ja Yehoba mwaya ntanda yonse. Mambo ka o abena kubila bino? Mambo ukeba kukwasha bantu bavula kuyuka Yehoba, mpelo ya buno bwikalo bwatama saka ikyangye kufika. Mpelo byo ikafika, Lesa ukapulusha Bakamonyi banji bakishinka, kabiji bantu bonse popo bakayuka’mba jizhina ja Yehoba jo jikatampe.—Ezi. 36:23.

“KUBA AMBA BA PANO PA NTANDA BETABILE”

12. Ñanyi bintu bisatu byo twafwainwa kuba pa kuba’mba twingilenga bulongo mwingilo wa kupulusha bantu?

¹² Byo akijinga pano pa ntanda, Yesu waingijile na ngovu kukwasha baana banji ba bwanga kushinda bukoke bwabo. Kuba bino kwanemene bingi pa kuba’mba bengile bulongo mwingilo Yesu ye atendekele. Yesu walombele’mba: “Byonkatu byo mwantumine pano pa ntanda, ne amiwa ne batuma pano pa ntanda.” Pa kuba’mba bengile bulongo uno mwingilo wa kupulusha bantu, Yesu waambile pa bintu bisatu byanema bingi. Kitanshi, walombele kuba’mba baana banji ba bwanga babule kwikala lubaji lwa ino ntanda ya kwa Satana. Kya bubiji, walombele kuba’mba bebazhijike nangwa’mba bekale bazhila kupichila mu kulondela bukine buji mu Mambo a Lesa. Kya busatu, walombele javula bingi kuba’mba baana banji ba bwanga bakwatankane ne kwitemwa byonka Yesu byo betemwa ne Bashanji. Kino kyafwainwa kwitulengela kwipesapesa atweba bene. Atweba bonse twafwainwa kwiipuzha’mba, ‘Nanchi ngubila bintu mwayila bintu bisatu biji mu lulombelo lwa kwa Yesu nyi?’ Yesu washiinwe kuba’mba inge baana banji ba bwanga kebobe bino bintu, ba pano pa ntanda bakatambwila byambo byabo.—Tangai Yoano 17:15-21.

13. Yehoba wakumbwile byepi lulombelo lwa kwa Yesu mu myaka kitota kitanshi?

¹³ Inge twafunda buku wa Byubilo bya Batumwa, twakonsha kumona Yehoba byo akumbwile lulombelo lwa kwa Yesu. Mu bena Kilishitu ba mu myaka kitota kitanshi mwajinga Bayudea ne bantu ba mu bisaka bikwabo, banonshi ne bayanji, bazha ne bantu bajinga na bazha. Akilangulukai pa mabano afwainwe kwikala pakachi kabo. Nangwa byonkabyo, bonse bakwatankene bingi kya kuba Paulo wibesakenye ku binungwa bya mubiji byapusana pusana ne Yesu nobe mutwe wabyo. (Efi. 4:15, 16) Mu ino ntanda ya kwa Satana mwayula mabano, lukwatankano lwa uno mutundu lwaubiwe na mambo a bulume bwa mupashi wazhila wa Yehoba.—1 Ko. 3:5-7.

14. Nga lulombelo lwa kwa Yesu lwakumbulwa byepi mu ano moba?

¹⁴ Kyataminekotu, batumwa byo bafwile, luno lukwatankano kechi lwatwajijile ne. Byonka byo kyaambijilwe jimo, mafunjisho a bubela atwelele mu kipwilo, kabiji kino kyaletele bingi mabano. (Byu. 20:29, 30) Bino mu mwaka wa 1919, Yesu wakasulwile bena Kilishitu bashingwa kufuma mu buzha bwa bupopweshi bwa bubela ne kwibakonkanya pamo mu “butemwe bukwatankanya bantu bulongo.” (Kolo. 3:14) Ñanyi bintu byafuma mu kukwatankana kwabo mu mwingilo wa kusapwila? Bantu kukila pa 7 milyonyi bafuma “mu bisaka byonse, mu mikoka yonse, mu mitundu yonse ya bantu ne mu njimi yonse” babena kupopwela Yehoba saka bakwatankana na bashingwa. (Yoa. 10:16; Lum. 7:9) Kyamwekeshatu patoka kuba’mba uno ye mukumbu wa lulombelo Yesu lo alombele kwi Yehoba amba, “ba pano pa ntanda bayuke amba mwantumine kabiji mwibatemwa byonka byo mwantemwa amiwa.”—Yoa. 17:23.

BYAMBO BYAWAMA BYO APEZHEZHEKO

15. Ñanyi kintu kyanema Yesu kyo alombejileko baana banji ba bwanga bashingwa?

¹⁵ Mabanga pa juba ja Nisanyi 14, Yesu watumbijikile nangwa’mba wapele baana banji ba bwanga lukumo kupichila mu kulayañana nabo lulayañano lwa kulama pamo ne aye mu Bufumu bwanji. (Luka 22:28-30; Yoa. 17:22) Onkao mambo, Yesu walombejileko bonse bakekala baana banji ba bwanga bashingwa amba: “Tata, mbena kukeba aba bo mwampele kwikala ne amiwa ko nji, kuba amba bakamone lukumo lwami lo mwampa, mambo mwantemenwe, baana saka bakyangye kutatula kusemwa pano pa ntanda.” (Yoa. 17:24) Kino kiletela bingi lusekelo mikooko ikwabo ya kwa Yesu, kechi bomvwa kichima na mambo a mfweto ikatambula bashingwa ne, kino nakyo kimwesha kuba’mba bena Kilishitu bakine lelo jino bakwatankana bingi.

16, 17. (a) Pa kupwisha lulombelo lwanji, Yesu waambile’mba ukatwajijila kuba ka? (b) Twafwainwa kutwajijila kuba ka?

¹⁶ Bantangi ba bupopweshi balengela bantu bavula kubula kuyuka kuba’mba Yehoba ye walengela bantu bamuyuka bulongo kukwatankana. Byo byo kyajinga ne mu moba ajingako Yesu. O ene mambo Yesu o apezhezheko lulombelo lwanji na bino byambo bya kuba’mba: “Anweba Tata waoloka, ba pano pa ntanda kechi bemuyuka ne; pakuba amiwa nemuyuka, ne bano bayuka amba anweba yenu mwantumine. Nejiyukanyikisha jizhina jenu kwi abo kabiji nkejiyukanyikisha kuba amba butemwe pe amiwa bwikale mwi abo, ne amiwa ngikale ne abo.”—Yoa. 17:25, 26.

¹⁷ Kya kine, Yesu wayukanyikisha jizhina ja bashanji. Byo aji Mutwe wa kipwilo, watwajijila kwitukwasha kuyukanyikisha jizhina ja Bashanji ne kyaswa ku muchima wabo. Twayai tutwajijile kukokela buntangi bwanji kupichila mu kulondela mukambizho wanji wa kusapwila ne kulenga baana ba bwanga. (Mat. 28:19, 20; Byu. 10:42) Twayai twibikeko kuzhikijila buumo bwetu. Kuba bino kukamwesha kuba’mba tubena kwikela mwayila lulombelo lwa kwa Yesu, kabiji kukaleta lukumo ku jizhina ja Yehoba ako kuketulengela kwikala na lusekelo myaka ne myaka.

[Kipikichala pa peja 26]

[Kipikichala pa peja 28]

Mupashi wazhila wakwashishe bena Kilishitu batanshi kukwatankana (Monai jifuka 13)

[Kipikichala pa peja 30]

Bantu ba kwa Yehoba kuzhokoloka ntanda yonse bakwatankana (Monai jifuka 14)