Lombai Bukwasho
1 Kyambo kyapuiwamo kya kuba’mba “byakatazha” kitazha ku bimye byetu bya malwa bya ano moba. (2 Timo. 3:1) Onkao mambo, nanchi mwafwainwa kuba byepi inge mwafikilwa na lukatazho lwa ku mupashi lwakonsha kwimulengela kwiumvwa bapelelwa?
2 Nanchi mubena kukeba kwisambapo na kinungwa kimo kya mu kipwilo kyafikapo ku mupashi nyi? Apo kampe bamo bakonsha kukankazhama na mambo a kumvwa bumvu, kulanguluka kuba’mba bakashupañana, nangwa kuzhinauka kuba’mba kafwako wakonsha kwibakwasha ne. Kya kine, twafwainwa kweseka na ngovu kupwisha lukatazho lwetu atweba bene, bino twafwainwa kwiumvwa bakasuluka kulomba bukwasho inge twafikilwa na lukatazho lwa ku mupashi.—Nga. 6:2, 5.
3 Kwakutatwila: Kampepo mukeba kusolomokamo utangijila jisambijilo ja buku ne kumwipuzha umvwe mwakonsha kwingijila nanji pamo mu mwingilo wa mu bujimi. Kino kikemupa jishuko ja kumubula lusako lwenu lwa kukoma ku mupashi. Umvwe kya kuba uno utangijila jisambijilo ja buku, nkwasho wa kipwilo, mubulai ayuke bukwasho bwa ku mupashi bo mubena kukeba kabiji ne aye ukabula bakulumpe kwimukwasha. Nangwa mwafwainwa kubula uji yense wa mu bakulumpe pa mambo a lukatazho lo muji nalo.
4 Nanchi bukwasho bwa mutundu ka bo mubena kukeba? Nanchi paji kintu kimo kya lefula kizaku kyenu nyi? Abya mwinsemi uji bunke ubena kwesekaeseka kuba’mba bana benu batwajijile na kupwila nyi? Nanchi mwiba kikulumpe bena kukeba bukwasho nyi? Nangwa paji lukatazho lumo lubena kwimukatazha nyi? Kwikala mu bimye byakatazha kyakonsha kushupa bingi—bino kechi kyakatezhatu ne. Bukwasho po buji.
5 Bakulumpe byo Bakonsha Kwimukwasha: Bakulumpe bemuta bingi mana. Bakomvwa inge mwibabula lukatazho lo muji nalo. Umvwe kya kuba basapwishi bamo bafikilwa na lukatazho lumotu, bakulumpe bakalangulukapo bya kuba pa bino kimye kya lupempu lwabo lwa bukafunga ne pa kimye kya kufunjisha kipwilo. Byo baji “bakumwenako jitanga,” bepanza kwingijila pamo ne anweba na lusekelo. (1 Pet. 5:3) Kumvwina bano balongo bafikapo byo babena kwamba pa bishina bya Baibolo kukakonsha kwimukwasha kuwamishako butumwa bwenu ne bwikalo bwenu.—2 Timo. 3:16, 17.
6 Yesu witupele “byabupetu ku bantu” byavula. (Efi. 4:8.) Kino kilumbulula kuba’mba bakulumpe bemwingijila. Baikelako kwimukwasha. Kine kine ‘bo benu.’ Onkao mambo mu kifulo kya kuzhindamapotu, lumbululai nzolo kijoma. Lombai bukwasho bo mubena kukeba.—1 Ko. 3:21-23.