April—Kimye kya Kwikala Ba Mukoyo mu Kwingila Mingilo Yawama!
1 Kipupu pa kufika kwipi na mpunzha mwikala bantu, kwikala kujimuna bantu bukiji-bukiji pa mambo a lonaiko lubena kwiya. Kipupu byo ke kifwenyeshe pa bwipi, ne lujimuno nalo popo lubayilako. Mambo ka? Mambo bumi bwa bantu buji pa lonaiko! Kimye kimo bantu bamo kechi baumvwine lujimuno lutanshi ne. Bamo nabo kampe baumvwine bino na mambo a mukose kafwako kyo baubilepo ne. Byo biji ne lujimuno lwa bulesa lotwapewa kubijika, “kinkunkwila” kya bukaji bwa bololoke bwa kwa Lesa saka kikyangye kufumyapo mbaji yonse ya ino ntanda ibi. (Mana. 10:25) Bumi bwa myaka ne myaka bwa mabilyoni a bantu buji pa lonaiko ! Lujimuno lwafwainwa kubijikwa. Twafwainwa kwikala “ba mukoyo mu kwingila mingilo yawama.”—Titusa 2:11-14.
2 Pa makumi a myaka, bantu ba kwa Yehoba batundaikwa kulenga kimye kya Kivuluko kwikala kimye kya kwikala na kizaku kiikajila mu mwingilo wa butumwa. Mu bañondo batanshi ba mwaka wa 1939 Infomant ayo pa kino kimye ibena kutelwa’mba Butumwa Bwetu bwa Bufumu yatundaikile kuba’mba: “Pakuba kisalo byo kibafike, kabiji ke kimye kyawama, twaketekela basapwishi mu bipwilo bakavuzha maola a mu mwingilo wa mu bujimi, ne bapainiya nabo kunungako kimye kyabaya mu mwingilo. Ñondo wa April uji na moba a mulungu atanu. Kabiji uji na bibelushi bitanu. Onkao mambo lengai juba ja Kibelushi ne ja Mulungu jonse mu ñondo wa April ... kwikala kimye kiikajila kya busapwishi.” Akyo kyajinga kikonkwanyi kya lusekelo kyo be babikijile balongo betu myaka 60 yapitapo! Uno mwaka, byonka byo kyajinga mu 1939, ñondo wa April uji na mpelo ya milungu ituntulu itanu. Nanchi milanguluko yenu mu uno ñondo iji byepi? Nanchi pa kalenda yenu mu ñondo wa April 2000 mwanembapo ka? Fukulai kwikalamo na lubaji lwanema mu mingilo yawama pamo na bantu ba kwa Yehoba bonse mu uno ñondo wiikajila wa mwingilo wa ku mupashi waya palutwe.
3 Byo Twaketekela Kwingila: Juba janema mu uno mwaka wa 2000 jiji mu uno ñondo. Jino juba ke ja April 19, Kivuluko kya kusekelela lufu lwa kwa Yesu. Twayai twingile papelela ngovu yetu yonsetu kwita bantu bavula kuba’mba bakeye ku Kivuluko. Byonka byo kyaambiwepo mu ñondo wapwa, nembai mutanchi wa mazhina a bantu bakakonsha kutanwa ku Kivuluko ne kumona’mba kafwako washalapo ne. Pa bobo baitwa pafwainwa kwikala basapwishi bakoka, basambi benu ba Baibolo, bonse bomutana mu bipempu bya kubwelako, bo mwafundanga nabo kala, bakwenu ba pa nkito, bakwenu bo mufunda nabo pa sukulu, bo mwikala kwipi, balongo benu, ne bakwenu bakwabotu. Nanchi bonse bakeba kutanwako baji na mwakwendela nyi? Umvwe bafwamo, nanchi mu butemwe mwakonsha kwibakwasha nyi? Pa juba ja Kivuluko, atweba bonse tukekala na jishuko ja kulenga bonse bakatanwako kwiumvwa batambwilwa. Pa nyuma ya Kivuluko,bakasekela bonse botwaichile twakonsha kwibendela ne kwibakwasha lwa ku mupashi jibiji.
4 Kwikala “ba mukoyo mu kwingila mingilo yawama” mu moba a kulutwe ne a kunyuma ya Kivuluko ke jishinda jawama ja kumwesheshamo kuba’mba tusanchila bingi byonse bitubula Yehoba. Byo kiji kimye kyawama, atweba bavula twakonsha kunungako ngovu yetu mu mwingilo wa busapwishi. Umvwe kyakuba mwi painiya wa kukwasha, musa kukeba kwingila maola 50 nangwa kukilapo mu butumwa. (Mat. 5:37) Lamachilai ku mutanchi wenu ye mwatanchikile ku ntendekelo ya ñondo. (Sapwi. 3:1; 1 Ko. 14:40) Lekai atweba bonse bashala twingile papelela bulume bwetu kukwasha bapainiya, kupichila mu kwibatundaika ne mu kwingijila nabo pamo mu bujimi.(Esekanyai na 2 Bamfumu 10:15, 16.) Umvwe mu April twabambakana na kubyala byavula, abya tukaketekela kwikala na lusekelo lukatampe ne mapesho kufuma kwi Yehoba. (Mala. 3:10) Kampepo kino kikekala nobe jishinda ja kutwajijila kwingila bupainiya bwa kukwasha nangwa kwikala bapainiya ba kimye kyonse. Lekai mukoyo wetu wa ku mupashi ye twanugulula mu April atwajijile ne mu bañondo bakalondelapo byo tubena kutwajijila kwikala basapwishi ba Bufumu ba kimye kyonse.
5 Kwakubula nangwa kuzhinaukane biumbi bya bantu ba kwa Yehoba bakatendeka masambijilo avula a Baibolo a pa nzubo mu uno ñondo. Nanchi nenuwa musaka kutendekako jisambijilo jimo nyi? Shinkamikai lulombelo lwenu pa kutendeka jisambijilo, ne kwingila mwayila milombelo yenu. Mwakonsha kuketekela’mba Yehoba ukomvwa lulombelo lwenu lwa mu kwikepesha lwa kwimukwasha kutana muntu wakishinka wa kusambijisha.—1 Yoano 3:22.
6 Aye ñambilo yaesekwa mu bujimi kabiji ingila bingi bulongo pa kutendeka misambo. Tendekai kupichila mu kwipuzha’mba: “Nanchi mulanguluka kuba’mba malwañano aji mu bwikalo bwetu, aikalako na mambo a bademona nyi, inyi na mambo akuba bansemi kechi bafunjisha bana babo ne?” Pembelelai mukumbu. Umvwe wakumbula’mba “mambo a bademona” tangai Lumwekesho 12:9, 12, ne kumulumbwilwila lubaji luji na Diabola mu kutundaika lukatazho pano pa ntanda. Pa nyuma ya byobyo, zhikulai pa lufunjisho 4 mu buloshuwa wa Nanchi Lesa Ukebaka ne kumwipuzha kana wakiipuzhapo kala kwafumine Diabola. Twajijilai kutanga ne kwisamba pa mapalagalafu atanshi abiji. Umvwe muntu wakumbula kuba’mba kyalengela malwañano mu bwikalo ke na mambo a “bansemi kubula kufunjisha bana babo,” tangai 2 Timoti 3:1-3 ne kwamba pa byubilo bibena kutundaika luno lukatazho. Apa bino muzhikule pa lufunjisho 8 mu buloshuwa wa Nanchi Lesa Ukebaka, ne kutanga palagalafu 5, ne kutwajijila na mwisambo. Umvwe mwalaya kubwelako, abya mubena kulenga jishinda ja kutendeka jisambijilo ja Baibolo ja kimye kyonse na yewo muntu. Pa lwendo lwa kibiji, mwipuzhai umvwe wayukapo muntu mukwabo uji yense wakonsha kukeba kumvwako byo abena kufunda.
7 Jishinda jikwabo ja kwikala “ba mukoyo mu kwingila mingilo yawama” mu April ke ja kwingijisha mashinda apusana-pusana a busapwishi. Nanchi mubena kulangulukapo ku kasapwila mu paka nangwa pa mapunzha po bemika myotoka nyi? Pa kiteshoni kya mabasi nangwa kya mashitima nyi? Inyi nangwa mubena kukeba kweseka kusapwila kupichila mu kwingijisha lamya, mu mukwakwa, nangwa mu mpunzha ya bya busulu? Mambo ka o mwabujila kwingijishila ino milanguluko yenu mu uno ñondo? Yehoba ukemukwasha kwikala bachinchika. (Byu 4:31; 1 Tesa. 2:2b) Kimye kimo mwakonsha kulayañana kwingijila pamo na painiya nangwa na musapwishi wapijilwa mu ino mbaji ya butumwa.
8 Yense ubena kukeba kunungulula lubaji lwanji mu mwingilo wa busapwishi ukakeba kwikalamo na lubaji mu busapwishi bwa kushukilwa. Javula kikebewatu kutatula kwisamba na muntu mu meso anteka. Letaipo jashi jakonsha ku musekesha, kimye kimo mwakonsha kwingijisha ñambilo iji peulu mu palagalafu 6. Nangwatu tubimye tukepe byepi esekeshai kwitwingijisha bulongo, kukila kwitutayatu mu mema. Mambo ka o mwabujila kwingijisha maminiti 5, 10 nangwa 15 mu busapwishi bwa kushukilwa ne kunemba bino bimye?
9 Kimye kya Kulangulukapo: Langulukai pa bishinka bikatampe byaambiwepo mu kimwesho kya mwaka wapwa pa Kupwila kwa Nkambi kwa “Icebo ca Kusesema ica kwa Lesa.” Kimwesho kyajinga na mutwe wakuba’mba, Ukukatamika Ubupyani Bwesu Ubwa ku Mupashi, kitulengejile kulanguluka pa lupusano lwajinga pakachi ka kwa Yakoba ne Isao. Isao waambile’mba wajinga na lusekelo nabiji lwajinga na Yakoba mu bintu bya ku mupashi, bino mingilo ya kwa Isao kechi yamwesheshe kino ne. (Nte. 25:29-34) Byo lujipo lujimuno lwa ngovu ko tuji! Byonka byajinga Yakoba, twayai twikale bepanza kulwila mapesho a kwa Yehoba. (Nte. 32:24-29) Mambo ka o twabujila kwingijisha ñondo wa April ne ba ñondo bakwabo bakalondelapo kusangula kizaku kyetu, ne kubula kupelula kya buswanyi bwetu bwa ku mupashi kyawamisha?
10 “Aja juba jikatampe ja Yehoba jijitu pepi, jiji pepi kabiji jibenakupelawizha’mba: Mfike.” (Zefwa. 1:14) Mambo awama afwainwa kusapwilwa. Bumi bwa bantu buji pa lonaiko! Lekai uno ñondo ekale ñondo wawama kikatakata ku bantu ba kwa Yehoba bonse byo twakwatankana pamo ne kumwesha kuba’mba twi “ba mukoyo mu kwingila mingilo yawama.”
[Kitenguluzha pa peja 4]
Kivuluko kya uno mwaka kikekalako Pakisatu, pa April 19. Bakulumpe mu kipwilo bafwainwa kutesha muchima pa bino bintu:
Bya kuvululako bya pa Kivuluko
◼ Pa kusala kimye kya kupwila, monai kuba’mba bimpashañano kechi byapishiwamo juba saka jikyangye kuzhika ne.
◼ Bonse, kubikapo ne ñambi kumo bafwainwa kubujiwa kimye ne kifulo kukekela kino kivuluko.
◼ Mwafwainwa kutaina jimo shinkwa wabula mbizho ne waini ukebewa ne kwibikokozhezha jimo.—Monai Ulupungu lwa kwa Kalinda February 15, 1985, peja 19.
◼ Masanyi, makapu atambula, tebulu wanengela ne nsalu ya kwanshikapo byafwainwa kuletewa bukiji-bukiji ku holo ne kwi binengezhezha jimo.
◼ Nzubo ya Bufumu nangwa nzubo ikwabo yo mubena kwingijisha yafwainwa kuwamishiwa bulongo kimye sa kikijiko.
◼ Mwafwainwa kusajila jimo Baasha ne bakupishamo bipashañano ne kwibabujila jimo mingilo yabo ne byakuba.
◼ Mwakonsha kunengezha kutwajila bimpashañano mushingwa yense wakankalwa kutanwako na mambo a kukepelwa kwa ngovu ya kwenda.
◼ Umvwe bipwilo kukila pa kimo bibena kwingijisha Nzubo ya Bufumu imo, abyo bipwilo byafwainwa kukwatankana bulongo, pa kuba’mba kubule kwishindaika pa kibelo, mwakupita, ne pa kwimika myotoka.