‘Kyambo Kyambiwa pa Kimye Kyafwainwa’
1 Nanchi kimukatazha kubulako bakwenu mambo awama a bumi nyi? Abya mwalangulukapo kala kuba’mba mwakonsha kwamba byambo bya mana byakonsha kumvwa bemuteleka nyi? Kimye Yesu kyo atumine bana banji ba bwanga wibambijile’mba: “Kabiji pa kuya, kasa musapwila’mba, Bufumu bwa mwiulu bwafwenya ke pepi.” (Mat. 10:7) Bino byambo kechi byajinga byakatazha ne, byajingatu byapeela pa kwibyamba. Po pamotu ne lelo jino.
2 Javula byambotu bicheche byo bikebewa pa kutatula mwisambo. Filipa byo asambakene ntungu mwina Etiopya, wamwipwizhe’mba: “Mwaumvwa byo mubenakutanganyi?” (Byu. 8:30) Byo ajingapo mwisambo wawama pa nyuma ya kino [“kyambo kyaambiwe pa kimye kyafwainwa”!, NW]—Mana. 25:11.
3 Ne anweba mwakonsha kwingijisha ntatwilo ya byonkabyo mu butumwa bwenu. Mu ñanyi jishinda? Mwakonsha kuba bino kupichila mu kuteleka bulongo kimye kyo mubena kwisamba na muntu ne kusala byambo byafwainwa kwesakana na byubilo bijipo pa kyo kyo kimye. Ipuzhai jipuzho ne kutelekesha ku mukumbu. Nanchi jipuzho ja mutundu ka jo mwakonsha kwipuzha?
4 Mepuzho amo o Mwakonsha Kwipuzha: Pa kutatula mwisambo mwakonsha kweseka kwipuzha jipuzho jiji jonse pa ano:
◼ “Nanchi mulomba Lulombelo lwa Nkambo mu mpopwelo yenu nyi?” (Mat. 6:9, 10) Ambaipo byambo bimo biji mu luno lulombelo, apa bino mwambe’mba: “Bantu bamo bepuzha kuba’mba, ‘Nanchi Lesa jizhina janji ye ñanyi, ajo Yesu jo aambile kuba’mba jizhile?’ Bamo bepuzha kuba’mba nanchi, ‘Ñanyi Bufumu Yesu bo aambile kuba’mba tulombenga?’ Nanchi mwatana kala mikumbu imufwainwa ku ano mepuzho nyi?”
◼ “Nanchi mwakiipuzhapo kala kuba’mba: ‘Nanchi mambo ka o twaikelako?’” Mweshai kuba’mba bwaluluzhi bwa bumi buji mu kuyuka Lesa.—Sapwi. 12:13; Yoa. 17:3.
◼ “Nanchi mulanguluka kuba’mba lufu lukafumishiwapo nyi?” Ingijishai Isaya 25:8 ne Lumwekesho 21:4 pa kukumbula mukumbu waketekelwa.
◼ “Nanchi kujipo jishinda japela ja kupwishishamo malwañano pano pa ntanda nyi?” Lumbululai kuba’mba Lesa ufunjisha’mba ‘saka utemwa mukwenu.’—Mat. 22:39.
◼ “Nanchi kukekalako kya malwa juba jimo kikonauna ntanda yonse nyi?” Ambai’mba Baibolo yalaya kuba’mba ntanda ikatwajijila myaka ne myaka.—Sala. 104:5.
5 Sapwilai mambo awama mu jishinda japela, jakubula kupita mu mbaji kabiji mu meso anteka. Yehoba ukapesha kwibikako kwenu mu kubulako bakwenu “kyambo” kya bukine.