Ñambilo Yapela Kumvwa yo Ikebewa

¹ Mambo ka bantu kyo bomvwina buluwe bwa Bufumu bwamba basapwishi banyike? Kishinka kimo ke kya kuba’mba ñambilo yabo yapela. Basapwishi bamo balanguluka’mba kwamba na mulambisha ko kukebewa pa kuba’mba basapwile bulongo. Pano bino, mwingilo wetu umwesha kuba’mba ñambilo yapela kumvwa yo ikebewa.

² Yesu wasapwijilenga Bufumu bwa Lesa mu ñambilo yapela kumvwa kabiji wafunjishe ne baana banji ba bwanga kuba byonkabyo. (Mat. 4:17; 10:5-7; Luka 10:1, 9) Waambilenga byambo, kwipuzha mepuzho ne bya kumwenako byapela pa kuba’mba banteleki bomvwishe ne kwibafika pa muchima. (Yoa. 4:7-14) Twafwainwa kumwena kwi aye mu kwamba ñambilo yapela kumvwa.

³ “Mambo awama a bufumu” bo buluwe bo tusapwila. (Mat. 24:14) Kwingijisha mutwe mukatampe wa Bufumu kukemukwasha kwamba ñambilo yapela. Ambai pa bintu byalamata bwikalo bwa banteleki benu. Javula babakazhi bata bingi muchima ku bisemi byabo kukila bya bumulwila ntanda. Bashetu bekala na bijikila bya nkito ne bya kuvimbila bisemi byabo. Bakyanyike bakeba kuyuka byo bakekala kimye kya kulutwe; kabiji bakikulumpe nabo bakeba kuyuka byo bafwainwa kwikala mutende na butuntulu bwa mubiji bwawama. Javula bantu bekala na kijikila kya bintu bibena kubiwa kobekala kechi kungi ne. Pa nyuma ya kwisamba pa bintu byasampukamo bibena kumweka, ambai pa bintu byawama byo bakeyowa bantu balukokelo mu bukalama bwa Bufumu bwa Lesa. Byambo bicheche byapela, byo mwanengezha bulongo kubikapo ne kinembelo bikatundaika banteleki benu kukeba kumvwa byo mubena kwamba.

⁴ Mwakonsha kutatula mwisambo wenu amba:

◼ “Kwakubula nangwa kuzhinaukatu ne, mubena kwitabizha’mba bantu babena kubela bikola bibula kubukwa. Abya mwayuka’mba Lesa walaya kuba’mba katatakatu afumyepo bikola byonse ne lufu nyi?” Lekai akumbule, apa bino mutange Lumwekesho 21:3, 4.

⁵ Mu ñambilo yapela kumvwa, fikai pa milanguluko ne michima ya bantu bavula mu mpunzha yenu, ne kwibakwasha kufunda pe Yehoba ne luketekelo lwa kwiyowa bumi bwa myaka ne myaka.—Yoa. 17:3.