‘Payankanai’ mu Mwingilo Wenu
1 Byo tutanga kuba’mba mutumwa Paulo waingijilenga mwingilo wa kusona matente mu Kolinda, twakonsha kulanguluka’mba kechi wajinga na kimye kyawana kya kusapwila ne. Pano bino, pa Byubilo 18:5 pashimikizha’mba: ‘Paulo, [wapayankene, NW] na kusapwila, kasa ebabujisha Bayudea amba Yesu ye Kilishitu.’ Mambo ka Paulo kyoapayankejile na mwingilo wa kusapwila? Nangwa kya kuba’mba bavula mu Kolinda bajinga baitabila, Nkambo waambile’mba mu yewa muzhi mwakijinga bantu ne bakwabo bavula bakijinga bakyangye kwikala baana ba bwanga. (Byu. 18:8-11) Nanchi netuwa ye mulanguluko ye tuji nanji wa kwikala bapayankana mu mwingilo wetu nyi? Ee, twafwainwa kusolomoka bantu bavula ne kwibafunjisha bukine.
2 Ikalai na Kimye Kikatampe kya Kwingila Mwingilo mu April: Apo kampe mwibikila kikonkwanyi kya kupayankana mu mwingilo wa kusapwila mambo awama pa ñondo pa ñondo. Pano bino ba ñondo bamo betulengela kwikala ‘bapayankana’ kya kine kine mu uno mwingilo. Kino kibena kuvwangamo ne ñondo wa April, kikatakata mu moba a Kivuluko. Abya bwikalo bwenu bubena kwimuswisha kwingilako bupainiya bwa kukwasha nangwa kwingila na ngovu mu mwingilo mu uno ñondo nyi? Basapwishi bavula babena kuba byo byo basangalala kya kine kine. (2 Ko. 9:6) Umvwe mubena kwingila papelela ngovu yenu, vulukainga’mba Yehoba ubena kusekela mambo mubena kwingila na muchima wenu yense. (Luka 21:2-4) Ke na mambo na bwikalo bwenu ne, ibikilai kikonkwanyi kya ‘kupayankana’ mu mwingilo mu April. Kabiji ku mpelo ya ñondo kange mukalubeko kuleta sawakya wenu wa mwingilo pa kuba’mba akabajilwe pamo na bantu ba Yehoba bonse.
3 Fwakashishai Bapya Batainwe ku Kivuluko: Mwaka wapwa, batainwe ku Kivuluko muno mu Zambia, bajinga 474,933. Kibelengelo kya uno mwaka kikyangye kuyukanyikwa ne. Bino, masawakya abena kumwesha’mba mwingilo wa “kunowa” ko akiji. (Mat. 9:37, 38) Onkao mambo, bukiji-bukiji, fwakashishai bantu bakeba kufunda bukine batainwe ku Kivuluko mwibakwashe ku mupashi. Inge mwabanda kwibafwakashisha ‘mubi ukebasompola mambo akushiwa mu michima yabo.’ (Mat. 13:19) Kwibafwakashisha bukiji-bukiji kukamwesha’mba ‘mwapayankana’ mu mwingilo.
4 Twajijilai Kukwasha Bakoka: Mwingilo wa kukwasha bantu bakoka watatwile mu February. Umvwe paji bamo bobabula kufwakashisha, bakulumpe mu kipwilo bafwainwa kunengezha kuya na kwibamona ñondo wa April saka akyangye kupwa. Bakulumpe bakeseka kumona kyalengela yewo muntu kukoka ne kumonapo jishinda jimo ja kumukwashishamo kutatula jibiji kwingijila Yehoba. Buno bukwasho bwa butemwe bumwesha kuba’mba bakulumpe mu kipwilo batako muchima ku mwingilo wabo wa kulama “jitanga ja Lesa.” (1 Pe. 5:2; Byu. 20:28) Kyamba kya Usopa kya Kibemba, September 15, 1993, pa mapeja 22 ne 23 paji byambo byawama byo bakonsha kwingijisha bakulumpe pa kukwasha muntu wakoka uji na lukatazho lwaesakana na makatazho atanu atongolwapo. Apo kampe bamo bakakwashiwa kutatula kuya mu mwingilo mu April.
5 Kwashai Bavula Kwikala Basapwishi Babula Kubatizwa: Abya baana benu bafikapo kwikala basapwishi bapya ba mambo awama nyi? Ibyepi bakwabo bo mubena kufunda nabo Baibolo? Umvwe bano bantu baswishiwa na bakulumpe mu kipwilo, abya April kechi ukekala ke ñondo wawama kwiabo kutendeka kusapwila nenyi? Kimo kimye umvwe muntu ubena kununguluka wafunda buloshuwa wa Nanchi Lesa Ukebaka ne buku wa Kuyuka, lufunjisho lwa Baibolo lwafwainwa kutwajijila mu buku wa bubiji nabiji wa Baibolo—Cebo ca kwa Lesa Nelyo ca Muntu?, True Peace nangwa Abaikatana mu Kupepa Lesa Umo Eka uwa Cine. Kikonkwanyi kyenu ke kya kukwasha ye mufunjisha Baibolo kuyuka bukine kuba’mba ekale musapwishi wabula kubatizwa ne pa nyuma ya byo byo akekale Kamonyi wa kwa Yehoba wipana wabatizwa.—Efi. 3:17-19; 1 Timo. 1:12; 1 Pe. 3:21.
6 Kwibikako ne lusekelo lwenu lwa kine mu bo mufunjisha Baibolo kwakonsha kwibakwasha kwikala ba bukine. Kamonyi umo wataine bamulume ne mukazhi bakikulumpe baitabile kufunda Baibolo. Pa milungu isatu yalondankene, bano bamulume ne mukazhi bakankazhaminenga kufunda Baibolo. Ko kyakayanga kabafunde. Milungu imo imo kechi bakebelenga kufunda ne. Nangwa byonkabyo, kyapeleleko mukazhi wanungulukile ne kubatizwa. Mulongo wibafunjishenga uvuluka’mba, “uno wamukazhi byo abatizwe wajijile mipolo ya lusekelo, akyo kyalengejile amiwa ne mukazhami netuwa kujila mipolo ya lusekelo.” Kya kine, kwikala ‘bapayankana’ na mambo awama kuleta lusekelo lukatampe!
7 Bungauzhi bwa mu Baibolo ne bibena kumweka mu ntanda bibena kumweshatu patoka amba tuji mukachi ka moba apelako. Kino kyo kimye bantu ba Lesa bonse kyo bafwainwa kwikala ‘bapayankana’ na kusapwila mambo awama ku bantu. Mutumwa Paulo witulaya’mba uno “mwingilo wetu wa mwi Nkambo kechi ye watu ne.”—1 Ko. 15:58.