Bantu ba Lesa Bafwainwa Kwikala na Mushingi
1 Ano moba, bantu bavula mushingi bafwaye. Mambo ka? Mambo bapayankana bingi kyakuba javula kechi bavulukapo mushingi nabiji kwamba’mba “Mwane,” “Nasanta,” nangwa’mba “Bandekeleko mambo” ne. Byambo bya Lesa byaambijile jimo kuba’mba kubula mushingi kukayanga na kukepelako mu moba akapelako, amba bantu bakekala ‘ba kwitemwa abo bene, ba kwitota, ba kwilemena, ba kubula kusanta, ba kubula muchima wa bumuntu, ba kubula kwilama, ba kubula kutemwa byawama, ne ba lupata lwa kuba bibi.’ (2 Timo. 3:1-4) Byubilo bya yeuno mutundu byo bilengela kubula mushingi. Bena Kilishitu byo baji bantu ba Lesa, bafwainwa kwilama kuchina’mba nabo bakekala nobe bantu ba ino ntanda babula mushingi ku bakwabo.
2 Nanchi Mushingi ye Muka? Mushingi ke kunemeka bantu ne kwikala nabo mutende. Biyukilo bya mushingi ke kulangulukilako bakwenu, kifyele, kuwama muchima ne butekanye. Kikwasha kwikala na bino byubilo, ke kutemwa Lesa ne bantu bakwetu. (Luka 10:27) Bino byubilo byanema bingi pa kwikala bulongo na bakwetu, kechi tutailapo nangwa mali ne.
3 Yesu Kilishitu wajinga kya kumwenako kyalumbuluka. Kimye kyonse wakokelanga Jifunde Jikatampe: “Byonka byo musaka’mba bantu betubile, ne anweba mwibobile pamo.” (Luka 6:31) Abya nanchi kechi tukumya pa kumona Yesu byoalangulukilangako baana banji ba bwanga ne kwibapa mushingi nenyi? (Mat. 11:28-30) Mushingi wanji kechi wafumine mu mabuku a mizhilo ne. Yesu waikele na mushingi kufuma ku bwanyike bwanji ne mu kulondela mafunde a Lesa. Twafwainwa kulondela kya kumwenako kyanji kyawama.
4 Kimye ka bena Kilishitu kyo bafwainwa kwikala na mushingi? Pa bimye bya kupwañanatu na bakwabo nyi, inyi pa kimye kya kukebatu’mba bambe’mba bo baji na mushingi? Nangwa kukeba kutumbalelamotu nyi? Ine! Twafwainwa kwikala na mushingi kimye kyonse. Mu ñanyi mashinda motwafwainwa kumweshesha mushingi pa kupwañana na balongo betu mu kipwilo?
5 Pa Nzubo ya Bufumu: Nzubo ya Bufumu yo nzubo yetu ya kupopwelamo. Yehoba Lesa ye witwita kuya na kutanwako. Ko kuba’mba nanchi twibenyi. (Sala. 15:1) Abya twikala benyi bakumwenako byo tuya ku Nzubo ya Bufumu nyi? Abya tuvwala ne kuzañuna bulongo nyi? Twafwainwa kumona’mba kechi twavwala mvwajilo yabula kufwainwa nangwa kukizhamo ne. Kikale ku kupwila kwa nkambi nangwa kupwila pa kipwilo kwa mulungu ne mulungu, bantu ba Yehoba bayukanyikwa na mwekelo ya mushingi yafwainwa bantu banemeka Lesa. (1 Timo. 2:9, 10) Kuba kino kumwesha mushingi kwi Shetu wa mwiulu ne ku benyi bakwetu boaita.
6 Jishinda jikwabo mo tumweshesha mushingi ku kipwilo ke kufika saka kukiji kimye. Ibyo, kino kechi kyapela ne. Bamo kampe bekala kwalepa nangwa baji na baana bavula bebataila kimye pa kwinengezha. Nangwa byonkabyo, kyatamakotu mu bipwilo bimo, ke kya kuba’mba basapwishi bavula baji na kisela kya kufika pa nyuma ya lwimbo ne lulombelo lwa kushinkwila. Kino kechi kyawama ne. Twafwainwa kuvulukanga’mba mushingi ke kunemeka biumvwa bakwetu. Yehoba witwita na kifyele, witunengezhezha bijiilo bya ku mupashi kuba’mba twikute. Tumwesha lusanchilo ne kuta muchima ku byo eumvwa umvwe ke tufike saka kukiji kimye. Kukelwa ku kupwila kuvulañanya luonde ne kubula kumwesha mushingi ku botwatana baikala kala.
7 Kimye kyo twapwila, nanchi tukenkenta ne kumona bantu bakatataka baiya nyi? Kwibatambwila nako kumwesha mushingi. (Mat. 5:47; Loma 15:7) Kwibemuna na lusekelo, kwibemuna shikoma, kumwemwesela—byonse bye bimweka nobe tuntu twakukaisha-kaishatu, bino byo bimo bituyukanyikisha’mba twi bena Kilishitu bakine. (Yoa. 13:35) Wamulume umo, panyuma ya kutanwa ku Nzubo ya Bufumu kimye kitanshi waambile’mba: “Mu jubatu jimo nataine bantu bo nabula kuyuka nangwatu pacheche, baji na butemwe bwakine kine kukila bantu bonse boneyukile nabo ku chechi konakomejile. Kino kyammwesheshe amba bukine ne butana.” Mu kupita kwa kimye, wapimpwile bwikalo bwanji, kabiji pakupitapo bañondo 7 wabatizwe. Ee, mushingi wakonsha kulengela bavula kwaluka!
8 Umvwe tuji na mushingi ku bantu bo twabula kuyuka botusambakanatu, ibyepi ku “bene bene bonka bakwetu ba mu lwitabilo”? (Nga. 6:10) Mafunde amba’mba: “Umushingike mukote wa mvwi ne kunemeka kilungi kyanji.” (Levi. 19:32) Kechi twafwainwa kusula bantu bayewo mutundu pa kupwila kwetu ne.
9 Kutelekesha: Mu kimye kya kupwila, bamwingilo ba Lesa ba bwina Kilishitu betufunjisha kya bupe kya bumupashi kitukomesha. (Loma 1:11) Umvwe ke tukunuke, kuja jungamu, kwinongotwela na muntu ye twaikala nanji pepi, kuya kiyeyeye ku kyolonyi, kutanga mabuku angi nangwa kuba bintu bikwabo kimye kibena kwambiwa majashi, ko kuba’mba kechi tuji na mushingi ne. Bakulumpe mu kipwilo bafwainwa kwikala ba kumwenako mu bino bintu. Mushingi wa bwina Kilishitu uketukwasha kushingika ñambi ne kuteleka ku jashi ja mu Baibolo jo abena kwamba.
10 Kabiji umvwe tuji na mushingi wa kushingika ñambi ne luonde, kechi twafwainwa kuleka bintu bimo ne maselulafoni kuvulañanya kupwila kwetu ne.
11 Mushingi ne Baana: Bansemi bafwainwa kuta muchima ku bibena kuba baana babo. Umvwe mwana kajile nangwa ke ashupe ne kuvulañanya bantu kimye kibena kwambiwa majashi, kyawama kumutwala pangye bukiji-bukiji na kukamuzhindamikapo. Kimye kimo kyakonsha kukatazha kuba byobyo, bino vulukai’mba kimwesha mushingi ku bibena kwiumvwa bakwenu. Bansemi baji na baana babacheche bajilajila ne kushupa-shupa javula bekela kunyuma pa kuba’mba babule kuvulañanya luonde na mambo a kwimanaimana kimye kibena kwambiwa majashi. Bonse bashala bafwainwa kulangulukilako bansemi baji na baana bajilajila pa kwibashila bipona bya kunyuma kuba’mba bekalepo umvwe bakeba.
12 Kabiji bansemi bafwainwa kuyuka bibena kuba baana babo kupwila saka kukyangye kutatula ne panyuma ya kupwila. Baana kechi bafwainwa kukintaukanga lubilo mu Nzubo ya Bufumu ne, mambo kino kileta mapuso. Kuzhokoloka Nzubo ya Bufumu na kunyema nako kwatama, kikatakata kimye kya mabanga mambo kechi tumwesha palepa ne. Kwamba na kupata kuvulañanya bakwetu baji kipikipi kabiji kwakonsha kusujisha mpopwelo yetu. Bansemi bengila na ngovu kusopa baana babo kikale pangye nangwa mu Nzubo ya Bufumu basanchilwa bingi, mambo kino nakyo kinungako buwame bwa kwikala pamo na muchima umotu.—Sala. 133:1.
13 Pa Lufunjisho lwa Buku: Tusanchila bingi balongo baswisha mazubo abo kuba’mba tupwilengamo. Byo tubena kupwila twafwainwa kumwesha mushingi ne kunemeka bipe byabo. Saka tukangye kutwela, twafwainwa kupukuta bulongo makwabilo etu kuchina kutamisha mu nzubo nangwa kapeti. Bansemi bafwainwa kusopa baana babo, ne kumona’mba bajitu mu mwanzo mwaikela lufunjisho lwa buku. Nangwa kya kuba bantu bekalatu bacheche ne kumweka nobe kechi tubena kupwila ne, kechi twafwainwa kukaisha bipe bya bene ne. Bansemi ya mwana bafwainwa kumutwala ku kyolonyi umvwe wakeba. Kabiji, na mambo a kuba lufunjisho lwa buku ke kupwila, twafwainwa kuvwala byonka byo tuvwala pa kuya ku Nzubo ya Bufumu.
14 Mushingi Wanema Bingi: Kwikala na mushingi wa bwina Kilishitu kechi kunemekatu mwingilo wetu ne, kwitupwizha ne pamo na bakwetu. (2 Ko. 6:3, 4, 6) Byo tuji bapopweshi ba Lesa wa lusekelo, kyawama kumwemweselanga, kwikala na lusekelo ne kuba tumingilo tumo tumweka nobe twakukaisha-kaisha bino tumwesha kifyele ne kuletela bakwetu lusekelo. Bino byubilo bya mushingi bikawamisha bwikalo bwetu byo tuji bantu ba Lesa.