“Byabupetu ku Bantu” Bingila Nangovu Kuketa Jitanga ja Lesa
1 Byolwawamapo luno lunengezho lwa Yehoba loanengezha kupichila mu Mwananji lwakupana “Byabupetu ku bantu”! (Efi. 4:8, 11, 12) Bengila mingilo yavula bingi, kabiji babambakana mukuketa jitanga ja Lesa. (1 Pe. 5:2, 3) Atweba bonse tumwenamo muluno lunengezho lukebewa kyakine kine. Nangwa kyakuba bamo babena kwikala namakatazho, bamo baiya katataka mukipwilo, bamonabo bajipo nabimo bibalefula, nangwa basendukamo, abano banabalume baji nalusekelo lwakukwasha bonse kumupashi.—Fili. 2:4; 1 Tesa. 5:12-14.
2 Umvwe bintu bimo byaino ntanda biletesha moyo bituletela kijikila, abano bakafunga ‘bekala nobe kya kuleyelamo mwela kabiji nobe kya kufyamamo pa kwiya kinkunkwila.’ Betukokolosha umvwe twakoka nangwa twaikala nabitunemena ketukebe kutekeneshiwa. Mubimye byauno mutundu bekala nobe “tukola tuji na mema mu ntanda yauma” nangwa “nobe kimfute kya jibwe jikatampe, jiji mu kiselebwa.”—Isa. 32:2.
3 Kukosesha Bakoka: Bakulumpe mukipwilo bengila nangovu kukwasha boba babula kuyayaya mumwingilo nangwa bakoka amba batatule jibiji kwivwangangamo mumingilo yakipwilo yonse. Kwikala namuchima wabutemwe wakufwakesha bano bantu kwakwasha bavula kutatula kutanwanga kukupwila kimye kyonse nekwikala bakosa kumupashi kusapwilanga jibiji mwingilo wamubujimi. Ino yonse mingilo ingila bakulumpe mukipwilo imwesha butemwe bwa Yehoba nebukalama bwawama bwakwa Yesu Kilishitu, washile kyakumwenako kyakwakamwa mikooko yanji yonse yaya mungi nangwa yalubilamo.—Mat. 18:12-14; Yoa. 10:16, 27-29.
4 Bakafunga bamona bimo biyukisha umvwe bamo batatula kubwela panyuma kumupashi. Bonse balefulwa, aba babula kutanwa-tanwa kukupwila, nangwa babula kuyayaya mumwingilo wamubujimi bafwainwa bukwasho kumupashi. Bakulumpe mukipwilo baji nakizaku kyakukwasha bonse batatula kuvwala mvwajilo nenzañwino yakukyalo nangwa basatukila kipwilo. Namambo akwitendekelako nebutemwe bwabo, bakulumpe mukipwilo befukwila ‘kupana myeo yabo’ kukwasha bakoka kutatula jikwabo kutemwa Yehoba.—1 Tesa. 2:8.
5 Bena Kilishitu bepana bamo kunyumakwe balekele kupwañena pamo nakipwilo, balekele kwingila kumupashi mambo amakatazho obajinga nao a butuntulu bwamubiji, bunonshi bwakumubiji, nemakatazhotu amukisemi. Kwakubula kushintauka, bakulumpe mukipwilo bamwesha kifyele mukwibabula kuba’mba Yehoba ulama mikooko yanji yonse kabiji ukebakwasha mubimye byamalwa. (Sala. 55:22; 1 Pe. 5:7) Bakafunga bamikooko bajimuka bakonsha kwiikwasha kuyuka’mba umvwe ‘yafwenya kwipi ne Lesa, ne aye ukafwenya kwipi ne ayo,’ nekwiitekenesha apa kabiji nekwiikokolosha.—Yako. 4:8; Sala. 23:3, 4.
6 “Byabupe ku bantu” byayuka kikatakata kuba’mba balongo babyo bakebewa kajo kakumupashi mukino kimye kyamwaka kya Kivuluko. Onkao mambo, kyawama bingi bakulumpe mukipwilo kwibikako kukwasha bonse baya mungi kwikala jibiji nalusekelo nemutende wamumilanguluko wiya kupichila mukupwañena pamo nakipwilo. Tusangalala bingi umvwe twamona bantu bauno mutundu “bakwetu ba mu lwitabilo” batanwa kukupwila nemumwingilo, batatula jibiji kukosesha lwitabilo lwabo mukitapisho kyankuulo.—Nga. 6:10; Luka 15:4-7; Yoa. 10:11, 14.