Kukonkanya Bantu Bamilaka Yonse
1 Byambo bya Lesa bibena kufikizhiwa! Bantu ‘bamba milaka yapusana-pusana’ babena kwiya mubupopweshi bwakine. (Zeka. 8:23) Nga Bakamonyi bakwa Yehoba babena kukwasha byepi bantu bamu ‘mikoka, nenjimi’ kwikala batokeshiwa kumeso a Yehoba, naluketekelo lwakupuluka “malwa akatampe”?—Lum. 7:9, 14.
2 Jibumba ja Lesa Jakumbula: Jibumba Jitangijila janengezha kuba’mba mabuku alumbulula Baibolo atuntululwenga mumilaka pepi na 380 kuba’mba bantu bonse bamuntanda bayuke bulongo buneme bwa mambo awama. Kunengezha nekupulinta mabuku mumilaka yavula kemwingilo wabaya bingi. Kikebewa kwikala namabumba abaya abasendwe bayuka kutuntulula nekwibakwasha mubintu byobakeba kuba’mba batuntulule mabuku etu muino yonse milaka, kwiapulinta apa bino nekwiatwala koafwainwa. Nangwa byonkabyo, mwingilo mwine mukatampe wingijiwa nabasapwishi ba Bufumu pamuntu pamuntu, basapwila mambo awama amu Baibolo akapulusha bantu.
3 Kwibikako Nakutatala: Ano moba mumapunzha avula mwikala bantu bamba milaka ingi. Bano bantu pakuba’mba basapwilwe mambo awama, bakalume bavula ba Lesa babena kwesekesha nabulume bwabo bonse kuba’mba bafunde mulaka ungi wambiwa mumpunzha yabo. Bakwabo nabo babena kufunda Mulaka wakwamba na Maboko wakina America.
4 Pakuba’mba bano bonse bakumbanenga, ofweshi yamusampi mu Zambia ituma mabuku mubipwilo byafika ku 2,100 mumilaka ya Kibemba, Kichewa, Kifrench, Kikaonde, Kiloshi, Kilubale, Kilunda, Kiportuguese, Kiswahili, Kitonga ne Kizungu. Bantu bamo babujile kumvwapo kala amba Yehoba koaji nebabujile kuyuka Baibolo pano batatula kufunda bukine buji mu Byambo bya Lesa.—Loma 15:21.
5 Abya twakonsha kwingila papelela bulume bwetu kusapwila mambo awama kubantu baji munyaunda yetu bafuma mubyalo binginyi? (Kolo. 1:25) Bipwilo bimo bibena kunengezha kuba’mba bikasapwile mukimasamasa kyamonka mwabo muji bantu bamba milaka ingi. Basapwishi patanshi bakifundako pacheche ñambilo imo, nabiji amba: “Mwabuka mwane. Naiya namba nesambe nenu mambo awama. [Kepo batambika talakiti nangwa buloshuwa wamuyenkao mulaka.] Shalaipo mwane.” Kine, kine, Yehoba ubena kupesha bingi ino ñambilo ipi!
6 Ano mambo awama a Bufumu afika kubantu bonse bamba nemilaka yapusana-pusana. Twayai twikaleko nakimye kyakwisamba nabo ano mambo awama.