Nemekainga Nekusanchila Bintu Bingijishiwa Mumingilo ya Teokalasi
1 Kimye kyobanengezhezhenga kuwamisha nzubo ya Lesa, Mfumu Yosiya watakaikile boba bakambizhiwe kwingila mwingilo, amba: “Kechi bebepwizhe mo baubijile na mali o bebapele ne, mambo baingijilenga na bukishinka.” (2 Mfu. 22:3-7) Munema wakunemeka bintu byazhila wajinga naboba banabalume wamwekejile mubyobaingijishe mali obebapele kwingijisha. Ano moba, byotubena kwingila mu mambo awama a Lesa, neatweba twafwainwa kwikala bakishinka mukwingijisha mali obetupa.
2 Mumwingilo Wamubujimi: Kumvwisha nekusanchila byambo byanema biji mumabuku etu kabiji nekuyuka mali ataiwapo pakwianemba kwitulengela kwianemeka nekwiasanchila. Kechi twafwainwa kupanaika panaikangatu mabuku etu kubantu babula kumwesha lusanchilo lwakine mubyambo byamu Baibolo ne. Umvwe wamwesha lusekelo lucheche mubukine bwamambo awama, twakonsha kumupa talakiti kukila kumupa mabuku akwabo.
3 Panainga mabuku mujishinda jawama jimwesha’mba mwianemeka. Kechi mwafwainwa kwiashanga mumapunzha mutanyiwa bantu bavula mobakonsha kwiatayaika-tayaikatune. Pakuba’mba mubulenga konauna, balai oo omukiji nao kunzubo saka mukyangye kutambwilapo mabuku akwabo. Umvwe kimye kyonse mwikala namagazini ashalapo paonse omutambula, kyawama mwakepeshako kibelengelo kyamagazini omutambula.
4 Mabuku Akwingijisha Anweba Bene: Twafwainwa kuodatu mabuku onka otubena kukeba. Kechi twafwainwa kuodanga mabuku akuba aonaikilamotune, kikatakata ma Baibolo amutundu wa Deluxe, Reference Bibles, nemabuku akwabo akatampe, nabiji Concordance, Index, mabuku abiji a Insight, nebuku wa Proclaimers, ano onse anengezhewa pamutengo wabaya bingi.
5 Nanchi muvuluka kunemba jizhina nekeyala yenu mumabuku akyenu kyenunyi? Kino kilengela kubula kukebanga mabuku akwabo akupingizha paoo omwabula kuyuka pomwiatulane. Umvwe mwataya lwimbo, Baibolo, nangwa buku yemufundamo, kimo kimye mwakonsha kumutana pabipe byeleka byobasungila mu Nzubo ya Bufumu nangwa pampunzha pekela kupwila kukatampe.—Luka 15:8, 9.
6 Twayai tumonenga kuba’mba tubena kwingijisha mabuku etu bulongo. Jino jojishinda jakumwesheshamo bukishinka bwetu mukwingijisha mali abintu bya Bufumu Yehoba byoetupa.—Luka 16:10.