Funjishai Bakwenu Ñambilo Yafwainwa
1 Nangwa kyakuba Bakamonyi bakwa Yehoba kebantu bafuma mu ‘mikoka, mitundu, munjimi yabantu bapusana-pusana,’ kebantu bakwatankana bingi mubulongo bwabo bwakine bwantanda yonse. (Lum. 7:9) Abo kebantu bakwatankana muino ntanda iji nabantu baabenamo. Mamboka otwakwatankena? Twakwatankana namambo akuba betwalwila ‘ñambilo ke yafwainwa.’—Zefwa. 3:9.
2 Lusekelo Lufumamo: Ino ñambilo yafwainwa yoika? Ino ñambilo kekumvwisha maana abukine aji mu Byambo bya Lesa byaamba pe Yehoba nenkebelo yanji, kikatakata bukine bwa Bufumu bwa Lesa. Byonka byaambijile jimo Yesu, buno bukine bubena kusampanyiwa na ‘kalume wa kishinka ne wa maana’ ubena kwimenako lunengezho lwa panopantanda lumwekana. Kino kyalengela bantu ba “mu mikoka yamba milaka yapusana-pusana” kwiya mubupopweshi bwakine.—Mat. 24:45; Zeka. 8:23.
3 Bantu byobafunda ñambilo yafwainwa kibatundaika kwikala mwayila mizhilo ya Yehoba. Bafunda ‘kulamankana pamo na muchima umo ne milanguluko imo.’ (1 Ko. 1:10) Lufunjisho lwa Lesa lobafunda lwibakwasha nekwikala nabyubilo byawama byalumbuluka, nekwamba bukine kikatakata kubulako bakwabo mambo awama. (Titu. 2:7, 8; Hebe. 13:15) Kuno kupimpulwa kwabyubilo byabo kuleta bingi munema kwi Yehoba.
4 Kyakumwenako kimo kyamwekele kekya mwanamulume umo wajinga namepuzho avula obamukumbwijile kufuma mu Baibolo. Byambo byoaumvwine byamutundaikile kuba’mba afundenga jibiji mumulungu nekutanwanga kukupwila. Wakuminye bingi pakumona byobamutambwijile bulongo nalusekelo lukatampe kubantu bamitundu yapusa-pusana pa Nzubo ya Bufumu. Mukimyetu kicheche, aye nemukazhanji bapimpwile byubilo mubwikalo bwabo nekubatizwa babatizwe. Kufumatu kyokya kimye wakwasha bantu pepi nobe 40 bepana kwingijila Yehoba kuvwangakotu nebalongo banji mukisemi bavula bingi. Nangwa kyakuba kemuntu walemana, katatakatu papo atatwile kwingila mwingilo wabupainiya.
5 Kufunjisha Bakwenu: Bintu bibena kumwekana muntanda bibena kulengela bantu bakishinka bavula kulubuluka mumichima yabo nekupimpula bwikalo bwabo. Byonka byajinga Yesu, neatweba twafwainwa kusakisha kwibakwasha. Kubwelako nemafunjisho a Baibolo byobintu byotwakonsha kukwashishamo bantu bakishinka kufunda ñambilo yafwainwa.
6 Jishinda jamweka kwingila bulongo kubantu bapayankana kekufunjisha lufunjisho lwa Baibolo lwipi kimyetu kyomwasolomoka muntu panzubo yanji. (km-KD 5/02 pe. 1) Mwakyesekapo kala kuba binonyi? Kimye kyomubena kwinengezha kubwelako, mukyamukachi kyamu Mwingilo Wetu wa Bufumu wa January 2002 salaimo ñambilo yafwainwa kukwashishamo yewo mwina nzubo. Mukikye kyamukachi mwanembwa byakumwenako byavula byakutatula mwisambo mu buloshuwa wa Nanchi Lesa Ukebaka nangwa buku wa Kuyuka. Pitulukai mubyomwakonsha kwamba aku nakufwanyikizha byakwamba byobyo byambo pakuba’mba kimukwasheko kuyuka byambo byomwakonsha kutatwilako nebyomwakonsha kuya mumwisambo wakwisamba papalagalafu imo. Salaimo kinembelo kimo nangwa bibiji mupalagalafu kyomwakonsha kutanga nekwisambapo, kabiji mwafwainwa nekunengezhapo jipuzho jomwakonsha kwamba mubyambo byenu byakupezhako. Jino jipuzho jikakwasha kumona pakutendekela mwisambo mupalagalafu yomwalanguluka’mba yomukafundapo kimye kyomukabwelako jibiji.
7 Bantu ba Yehoba babena kumona bintu byawama bingi namambo akufunda ñambilo yafwainwa. Onkao mambo, twayai tukwashe bakwetu ‘kwita pa jizhina ja Yehoba ne kumwingijila na muchima umotu’ pamo neatweba.—Zefwa. 3:9.