“Bantu Bonse Pano pa Ntanda Baambilengatu Mulaka Umo”

11:1-4, 6-9

Mu muzhi wa Babela, Yehoba wavulañenye mulaka waambanga bantu bamusatukijile ne kwibapalañanya. Bino lelo jino, Yehoba ubena kukonkanya jibumba jikatampe ja bantu kufuma mu byalo byonse ne mu njimi yonse, ne kwibapa “mulaka wawama” pa kuba’mba ‘betenga pa jizhina ja Yehoba, ne kumwingijila na muchima umo.’ (Zef 3:9; Lum 7:9) Uno “mulaka wawama” ke bukine bwa mu Binembelo bwaamba pe Yehoba ne pa kyaswa muchima wanji.

Pa kufunda mulaka ungi, kechi tufundatu byambo ne kwibilabijila ne. Twafwainwa kufunda ne kulangulukila monka mulangulukila bantu bamba yewo mulaka. Kyo kimotu ne pa kufunda mulaka wawama wa bukine, twafwainwa kwaluluka ne kupimpula milanguluko yetu. (Lo 12:2) Kupimpula milanguluko kutwajijila pa myaka yavula, kabiji kulengela bantu ba Lesa kukwatankana.—1Ko 1:10.