Mambo a Lesa bo Bukine
1. Ñanyi byambo byanema biji mu Baibolo?
1 Nyimbi wa masalamo wanembele’mba, “kishina kya mambo enu kyo kya kine kine.” (Sala. 119:160) Kupichila mu byambo byanji byanembeshiwa na mupashi, Yehoba ukumbula mikumbu yaumvwanyika ku mepuzho anema a mu bwikalo. Upana lutekenesho ne luketekelo ku boba baji mu lukatazho. Kabiji witubula ne byo twakonsha kufwenya kwipi ne aye. Mwanamukazhi umo wa lusanchilo waambile’mba: “Kufunda bukine bwa mu Baibolo kuji nobe kufuma mu mpunzha ya mfishi ine ya kabwijibwiji ne kutwela mu kibamba kyawama muji kyeya.” Nanchi mubulako bakwenu bukine bwa mambo a Lesa aji mu Baibolo pa ka kimye kaji konse nyi?
2. Nga Baibolo ipimpula byepi bwikalo bwa bantu?
2 Bulume bwa Kwalula Bwikalo ne Kukebula Bantu: Bukine bwa mu Baibolo buji na bulume bwa kufika bantu pa muchima ne kwalula bwikalo bwabo. (Hebe. 4:12) Nsongwakazhi umo wajizhina ja Rosa, wajinga pite, kutoma malwa bibi, ne kwingijisha bizhima waambile’mba: “Juba jimo jo napopomenwe kya kine kine, Bakamonyi bamulume ne mukazhi bambujile Baibolo byo yakonsha kwitukwasha kupwisha makatazho. Natendekele kufunda Mambo a Lesa, awo o nataine kuba’mba aleta bingi lusekelo. Mu ñondotu umo nakonsheshe kupimpula bwikalo bwami bwajinga buncha. Pano byo nayukile bya kuba mu bwikalo, nalekele kutoma malwa ne kwingijisha bizhima. Kabiji byo nakebeshe kwikala mulunda na Lesa, nebikisheko bingi kwikala mwayila mizhilo yanji. Inge ne maana a mu byambo bya Lesa ne, naketekela kino kimye kyombena kwamba inge neipailetu kala.”—Sala. 119:92.
3. Mambo ka o twafwainwa kubula kuleka kusapwila byambo bya mu Baibolo ku bantu?
3 Kupusanako na mabuku akwabo onse, Baibolo ikebula bantu “ba mu mikoka yonse, ne mu bisaka byonse, ne mu mitundu yonse.” (Lum. 7:9) Lesa ukeba’mba “bantu bonse bapuluke, [bekale na maana alumbuluka abya bukine, NW]” (1 Timo. 2:4) Onkao mambo kechi twafwainwa kulanguluka’mba na mambo a nkomeno ya iwe muntu kuba watambwila mambo awama ne. Mukifulo kya kulanguluka byobyo, sapwilai mambo a Bufumu ku bonse kwingijisha byambo biji mu Baibolo pa kimye kiji kyonse.
4. Twakonsha kwingijisha byepi Baibolo pa kusapwila?
4 Ingijishai Binembelo: Kuji bimye byavula bya kwingijishishamo Baibolo mu mwingilo. Pa kutambika magazini, tangaipo kinembelo kimo kijipo mu byakwamba pakutambika magazini. Pakutambika mabuku a muyewo ñondo, bamo bekimona bulongo kutanga kinembelo kyobaji kunengezha bulongo kuba’mba beye batendekelemo mwisambo. Pa kubwela ku bamwesheshe lusekelo, tangaipo kinembelo kimo nangwa byavula kimye kyo mubena kwisamba nabo kuba’mba mwibakwashe kufunda pachepache maana alumbuluka. Pa kufunjisha lufunjisho lwa Baibolo, tangainga binembelo byashinkamana payewo mwisambo. Nangwatu kechi mwinengezha kuya mu mwingilo ne, ikalai na Baibolo pepi kuba’mba inge mwashukilwapo ka kimye ka kusapwila busapwishi bwa kushukilwa, mwasapwila.—2 Timo. 2:15.
5. Mambo ka o twafwainwa kwesekesha na ngovu kwingijisha Baibolo mu mwingilo wetu?
5 Twayai tukwashe bakwetu kumwenamo mfweto mu bulume buji mu bukine bwa Mambo a Lesa kupichila mu kwingijisha Baibolo pa kimye kyafwainwa mu mwingilo wetu.—1 Tesa. 2:13.