Londai Buwame bwa Yehoba
1 Nanchi kwiyowa kotwiyowa inge twaanama na koota kamute kasama bulongo pa kulemba juba nangwa umvwe twaja kajo kapita mukyaji, kechi kitutundaikapo kusanchila Yehoba, Nsulo ya buwame bonse nenyi? (Sala. 119:66, 68; Byu. 14:17) Buwame bwanji bwitutundaika kukeba kwikala ba kumulonda. (Efi. 5:1) Pano nga twakonsha kwikala byepi na kyubilo kya buwame?
2 Ubilai Buwame Bantu Babula Kwitabila: Jishinda jimo jo twakonsha kulondelamo buwame bwa Yehoba ke kuta muchima boba babula bakwetu ba mu lwitabilo. (Nga. 6:10) Kumwesha buwame mu bintu byonse, kwakonsha kukwasha bantu kutemwa Bakamonyi bakwa Yehoba ne kutemwa mambo awama o tusapwila.
3 Kyakumwenako, mulongo umo painiya wakyanyike, wayile ku kipatela. Bantu byo bapembejilenga kumonañana na dokotala, uno kamonyi wamwene inetu umo wakikulumpe wajinga kunyuma yanji wabelele bingi. Kepo amupishishe kulutwe ne kumwambila’mba atwele atambule muchi bukiji bukiji, aye usakutwela panyuma umvwe uno inetu watambula. Juba jikwabo byobasambakene pa kisankanyi, uno inetu watemenwe bingi pa kumonañana na uno mulongo. Nangwa kyakuba patanshi kechi wakebanga kutambwila mambo awama ne, bino pa kino kimye waambile’mba pano wayuka’mba Bakamonyi bakwa Yehoba batemwa bakwabo kya kine. Kabiji watendekele kufunda Lufunjisho lwa Baibolo kimye kyonse.
4 Ubilai Buwame Balongo Betu ba mu Lwitabilo: Kabiji tulonda buwame bwa Yehoba umvwe ke tukwashe bakwetu ba mu lwitabilo. Mu bimye bimweka malwa, twikala pa boba bekala batanshi kunyemenako na kukwasha balongo betu. Tumwesha byubilo bintutu bimo kimye kyo tukwasha aba bakajilwa mu ñendelo pa kuya na kupwila, kufwakesha balwazhi, ne kumwesha lusa ku boba baji mu kipwilo botwabula kuyukisha bulongo ne.—2 Ko. 6:11-13; Hebe. 13:16.
5 Jishinda jikwabo Yehoba joamwesheshamo buwame ke ‘kuswila jimo kulekela mambo.’ (Sala. 86:5) Mu kumulonda, ne atweba twafwainwa kumwesha buwame bwa butemwe bwetu kupichila mu kulekelako bakwetu mambo. (Efi. 4:32) Kino kilengela kupwañena kwetu pamo na bakwetu ba mu lwitabilo ‘kuwama ne kutokesha ku muchima.’—Sala. 133:1-3.
6 Lekai buwame bwavula bwa Yehoba bwitulengele kumutota ne kwikala na lusekelo. Kabiji lekai bwitutundaike kuba’mba twesekenga na bulume bwetu kulonda buwame bwanji mu bintu byonse byotuba.—Sala. 145:7; Yele. 31:12.