Kutanwa ku Kupwila Kimye Kyonse—Kwafwainwa Kwikala Kutanshi
1 Bisemi bya bwina Kilishitu bitangizhako kutanwa ku kupwila kwa kipwilo kimye kyonse. Pano bintu bikebewa mu bumi ano moba byakonsha kuleta makatazho. Nanchi mingilo ya pa nzubo, mingilo ya ku mubiji, nangwa mingilo ya ku sukulu yatendeka kwingijiwa mu kimye kyo mwanengezhezhamo kupopwela Yehoba nyi? Kumonanga bintu mu jishinda mo ebimwena Yehoba kwitukwasha kutangizhako byafwainwa kwikala bitanshi.—1 Sam. 24:6; 26:11.
2 Mwanamulume umo mwina Isalela byo atolawilenga nsala pa juba ja Sabado, waubijilemotu kyanshiji kubula kwikala na mweno ya Yehoba. Kampe walangulukile’mba waubilenga bino kuba’mba akwashishemo ba mu nzubo yanji nangwa amba kyajingatu kintu kicheche. Bino kupichila mu buchibamambo bwamutongwejilwe, Yehoba wamwesheshe amba kwingila mingilo yabula kunema mu kimye kyatongolwa kupopwelamo ke mambo akatampe bingi.—Bala. 15:32-36.
3 Kushinda Makatazho: Bavula kibashupa bingi pa kubatu’mba mingilo ya ku mubiji ibule kwingijiwanga mu kimye kya kuya na kupwila. Bamo bashinda luno lukatazho kupichila mu kubuula bakulumpe babo ba nkito, kupimpuzhana bimye bya kwingijilamo na bakwabo mo bengijila, kutwela nkito yafwainwa kwibashilamo kimye, nangwa kupeezhako bwikalo bwabo. Kwakubula nangwa kuzhinaukatu ne, kwipana kwa uno mutundu na mambo a mpopwelo ya kine kumutokesha bingi Lesa ku muchima.—Hebe. 13:16.
4 Mingilo ya ku sukulu nayo yakonsha kuleta makatazho. Nsongwakazhi umo waambile’mba: “Ñingila mingilo yami imo ya ku sukulu saka nkyangye kuya na kupwila kabiji ikwabo yashala ngiya na kwiingila inge nabwela ku nzubo.” Umvwe mingilo yonse ya ku sukulu yabula kwingijiwa mu moba ekelamo kupwila, bansemi bamo baya na kulondolwela bafunjishi amba kutanwa ku kupwila kwa bwina Kilishitu kyo kintu kikatampe kyo batangizhako mu kisemi kyabo.
5 Kukwatankana ne kunengezha bulongo byo bintu bikatampe bilengela kupwisha bukiji mingilo ya pa nzubo mu kwinengezha kuya na kupwila kisemi kyonse kwakubula kukelwa ne. (Mana. 20:18) Ne baana bacheche nabo bafwainwa kufunjishiwa kuba amba bavwajilenga jimo ne kwinengezha kuya na kupwila pa kimye kyatongolwa. Bansemi umvwe baikala bakumwenako bawama, bakalengela baana babo kuyuka buneme bwa kupwila.—Mana. 20:7.
6 Makatazho a ino ntanda byo abena kuvujilakotu, kyanema bingi kuba’mba tutanwenga ku kipwilo kimye kyonse. Mwane kine twayai tumwenenga bintu monka moebimwena Yehoba ne kumona kuba’mba twatangizhako kupwila kimye kyonse.—Hebe. 10:24, 25.