Nanchi Mwakonsha Kukwashañana Nyi?
1 Yehoba kimye kyonse umonapo mashinda a kukwashishamo bakalume banji bakishinka. (2 Moba. 16:9; Isa. 41:10, 13) Byo amupashañenyenga ku kafunga wa butemwe, Isaya wanembele’mba: ‘Usenda baana ba mikooko mu maboko anji, kasa ebabukata mu kyaji kyanji, ne kwiitangijila bitende, bitende aya iji na baana.’ (Isa. 40:11) Akimonai mashinda amo mo twakonsha kulonda butemwe bwa Yehoba.
2 Kwashai Bakatataka: Twakonsha kukwashañana kupichila mu kwita bakatataka na kwisambila pamo ne atweba misambo ikoseshañana. (Mana. 13:20) Byo avulukile bakwabo byo bamukwashishe kimye kyo atendekele kupwañena pamo na kipwilo, mulongo umo waambile’mba: “Pa bimye byavula, kisemi kimo kyangitanga kuya na kutanwa ku lufunjisho lwa kyo lwa kisemi. Byo anungulukilenga, bapainiya bamulume ne mukazhi bakyanyike bangitanga kuya na kwingila nabo mu mwingilo kimye kyabaya. Kimye kyonse twisambanga misambo yawama ya ku mupashi.” Wanungilepo amba: “Saka nkyangye kwikala mwina Kilishitu, pa Kitanu ne pa Kibelushi nayanga bufuku na kukaya bya kisangajimbwe. Pano kimye kyo napwañenanga pamo na balongo kyawamine bingi kwi amiwa.” Butemwe bwamwesheshe kipwilo bwakwashishe bingi uno mulongo kujimba ne kukosela monka mu lwitabilo, kabiji luno lo tubena kwamba ke wa mu kisemi kya Betele.—Kolo. 2:6, 7.
3 Ikwashainga Anwe Bene na Bene: Twakonsha kumonapo kimye kya kukwashishamo balongo betu umvwe kebapite mu makatazho. Nanchi mwakonsha kunengezha’mba mwingijile pamo na musapwishi wabela mu busapwishi bwa kwingijisha lamya nangwa kumubula amba emutwaleko ku lufunjisho lwa Baibolo, nangwa kampe kuya na ye mufunjisha ku nzubo ya uno mulwazhi nyi? Nanchi mwakonsha kutemwa kukwashako nsemi uji na baana babacheche kimye kyo aji mu mwingilo nyi? Nanchi kujipo bamo baji na moyo bakonsha kutemwa amba mwibakwasheko pa kubwela ku bamwesheshe lusekelo nangwa pa kwingila mu mbaji ikwabo ya mwingilo nyi? Kutemwa balongo betu kuketutundaika kumonapo mashinda a kwibakwashishamo.—Loma 14:19.
4 Byo tulonda butemwe bwa Yehoba boamwesha ku bakalume banji, twikwasha atwe bene na bene, kabiji tulengela kipwilo kukwatankena pamo mu butemwe, ne kutumbijika Shetu wa mwiulu.—Efi. 4:16.