Bukwasho Buji Pepitu
1. Bumupashi bwa muntu bwakonsha kukoka byepi?
1 Anna, nyenga uji na mulume wabula kwitabila kabiji wingila mwingilo utaya kimye kyabaya bingi, kyamushupanga bingi kutanwa ku kupwila kwa bwina Kilishitu, kwingila mwingilo wa kusapwila, ne kufunda Mambo a Lesa kimye kyonse. Nangwa kya kuba’mba watemenwe Yehoba, waishile kukoka. Kya lusekelo, watambwijile bukwasho bwa ku mupashi kufuma ku bakulumpe mu kipwilo bamutele muchima.
2. Mu ñanyi jishinda mwina Kilishitu yense mo akonsha kwikela nkwasho uji pepitu?
2 Kuswa bukwasho bwa ku mupashi bupanwa kupichila mu kipwilo kya bwina Kilishitu kumwesha kuba’mba twakinka manungo mwi Yehoba. Mu kulondela kya kumwenako kya kwa Yesu Kilishitu kya butemwe, bakulumpe mu kipwilo bakeba mashinda a kupainamo lutundaiko ne bukwasho ku boba babena kupita mu makatazho a ku mupashi. (1 Tesa. 5:14) Javula byambo byawama bya lutundaiko byaimena pa binembelo byo bikebewa. Kwitendekelakotu atwe bene kukwasha bakoka, ke mutembo wa bena Kilishitu bonse, kechi bakulumpe mu kipwilo bonkatu ne. Kwakubula nangwa kuzhinaukatu ne, atweba bonse twaumvwapo kala bulume bwa ‘kyambo kyafwainwa kyo baamba pa kimye kyafwainwa.’—Mana. 25:11; Isa. 35:3, 4.
3, 4. Bi ka byavwangwamo mu kukwasha bakwetu, kabiji twakonsha kwibyuba byepi?
3 Itendekelaingakotu Anwe Bene: Pa kumwesha butemwa bwa kukeba kukwasha bantu babena kukebewa bukwasho, kikebewa kwitendekelakotu atwe bene pa kuba’mba twikale ba muchima umo ne na mukovyokovyo wa kukwasha bantu. Kimye Yonafwanyi kyo ayukile malwa ajingamo Davida, “waimene ne kuya kwajinga Davida ku nzumbu ne kumukosesha muchima wanji.” (1 Sam. 23:15, 16) Kwashai bakwenu mu jishinda jawama. Byambo byaambiwa kufuma panshi ya muchima bikwashañana bingi. Kunungapo, Yesu wamwesheshe kuba’mba kutako muchima kukebewa pa kuba’mba mubwezhe jikwabo mulongo nangwa nyenga wa ku mupashi. (Luka 15:4) Kwikala na mukovyokovyo wa kukeba kukwasha mukwetu, kuketulengela kukosako na kupana bukwasho nangwa kya kuba lupimpu kechi lubena kumweka bukiji ne.
4 Byo kiwamapo umvwe twitendekelakotu atwe bene kwita bakwetu, nabiji boba baji mu lufunjisho lwa buku lwetu, kwingila nabo mu mwingilo! Kimye kyo tubena kukwasha mukwetu kwingilako mu mwingilo wa Yehoba, twakonsha kwingijisha kyonka kino kimye kumukosesha kwingilako pakatampe mwingilo wa Lesa. Bimye bya lusekelo bya uno mutundu bya kwingijila pamo mu mwingilo wa Yehoba, bitundaika bingi kikatakata boba babena kubwela jikwabo ku mupashi.
5. Bimye bimo, bakulumpe bakonsha kupana ñanyi bukwasho?
5 Lunengezho lwa Butemwe: Aba babula kwingilako mu mwingilo wa kusapwila nangwa kupwanañena pamo na kipwilo pa moba avula bakonsha kukeba bukwasho bukwabo bwa kukosesha lwitabilo lwabo. Lufunjisho lwa Baibolo lwa pa bunke mu buku wa Popwelai Lesa Yenka Wakine, buku wa Palameni Kuli Yehova, nangwa buku wa Nanchi Baibolo Kine Ufunjisha’mba Ka? lwakonsha kwingila bingi bulongo. Byo kiji kuba’mba uno muntu wabatizwe kala, lufunjisho kechi lwafwainwa kubanda ne. Kometi ya Mwingilo mu Kipwilo yafwainwa kuyukanga bakebewa bukwasho bwa uno mutundu.—Monai tubokoshi tuji mu Mwingilo Wetu wa Bufumu wa Kibemba wa November 1998 ne wa Kikaonde wa November 2000.
6. Nyenga umo wakosele byepi jikwabo ku mupashi?
6 Anna, waambiwapo kala, waswile bukwasho bwamukwashishe bakulumpe mu kipwilo bwa kumupa nyenga wakoma ku mupashi kumufunjisha lufunjisho lwa Baibolo. Bafunjiletu bipungu bina bya mukwashishe kufwenya kwipi jikwabo ne Yehoba. Watendekele jikwabo kutanwa ku kupwila kwa kipwilo kabiji ne kutakaika Yehoba Lesa ku bantu. Uno nyenga wakoma ku mupashi wakwashishe Anna mu mwingilo kupichila mu kuya nanji ku mafunjisho a Baibolo kufikilatu ne kimye kyo akosele kutendeka mwine kuya na kusapwila ku nzubo ne nzubo. Bukwasho bwafwainwa bo bwakebewenga pa kuba’mba atendeke jikwabo mwingilo wanji wa ku mupashi!
7. Bibusa ka bifuma mu kukwasha bakwetu ku mupashi?
7 Kukosesha aba baji mu kukajilwa kuleta bibusa ku bonse. Awa ukwashiwa umona lusekelo lwa kufwenya jikwabo kwi Yehoba kabiji ne kwingilako mingilo ya mu jibumba Janji. Bakulumpe mu kipwilo basangalala bingi pa kumona kuno kukomenako kwa ku mupashi. (Luka 15:5, 6) Kipwilo kikala kyakwatankana na mambo a kumwesha kwita muchima umo ne mukwabo. (Kolo. 3:12-14) Ee kine, tuji na bishinka byawama bya ene mambo o twafwainwa kulondanga Yehoba, nkwasho uji pepitu!— Efi. 5:1.