Kimye kya Kivuluko—kyo Kimye kya Kwingilako Pakatampe Mwingilo
1. ‘Bijiilo byatongolwa’ byalengelanga bena Isalela baakamwanga Lesa kubapo ka?
1 Pa bimye byatongwelwe mukachi ka mwaka, bena Isalela ba kala bajanga ‘bijiilo byatongolwa bya Yehoba.’ (Levi. 23:2) Kwikalapo na kimye kya kulanguluka pa buwame bwa Lesa wabo kwibaletelanga bingi lusekelo ne kwibatundaika kwikala na mukoyo wa bupopweshi bwa kine.—2 Moba. 30:21–31:2.
2, 3. Mambo ka o kyawamina kuba’mba tukengileko pakatampe mwingilo wetu wa ku mupashi mu kimye kya Kivuluko, kabiji Kivuluko kikekalako ñanyi juba?
2 Mu ano moba etu, mwingilo wetu wa lusekelo utangijilwa na Lesa ubailako bingi pa mwaka pa mwaka mu kimye kya Kivuluko. Kyo kimye kyo tulanguluka pa bupe bwa Yehoba bwakilamo boetupele, Mwananji yenkawa umo. (Yoa. 3:16; 1 Pe. 1:18, 19) Byo tulangulukalanguluka pa butemwe boetutemwa Lesa ne Mwananji, tutundaikwa kutota Yehoba kabiji ne kwibikishako atwe bene mu kuba kyaswa muchima wanji.—2 Ko. 5:14, 15.
3 Uno mwaka Kijiilo kya Nkambo kikekalako pa Kina, March 24 mabanga, panyuma ya kuzhika juba. Pano twakonsha kwingilako byepi pakatampe mu mwingilo mu March, April, ne May?
4, 5. (a) Ki ka kyakwasha bamo kusapwila mambo awama ku bantu bavula? (b) Ñanyi jishinda ja kusapwilamo jingila bulongo koko kwenu?
4 Kusapwila Bantu Bavula: Monaipo mashinda o mwakonsha kusapwilamo bantu bavula kimye kyo mubena kwingila mu mwingilo wa mu bujimi. Nanchi mwakonsha kunengezha kwingilako mwingilo wa ku nzubo ne nzubo kimye bantu bavula kyo baji pa mazubo, nabiji mute nangwa mabanga nyi? Umvwe bamo bo mupwila nabo pa lufunjisho lwa buku bakeba kwingilako mu mwingilo lufunjisho lwa buku sa lukyangye kutendeka, mukulumpe wa lufunjisho lwa buku wakonsha kunengezha kupwila kwa kuya mu mwingilo mu kakimye kacheche ne kwingijila mu nyaunda iji pepi.
5 Jishinda jikwabo ja kusapwila bantu bavula ke kuya mu mapunzha mutanwa bantu bavula. Nyenga umo mu Japan wakebelenga kwingilako bupainiya bwa kukwasha nangwa kya kuba waingilanga nkito ya ku mubiji ya kimye kyonse. Mukulumpe umo mu kipwilo wamubujile kuba’mba juba ne juba saka akyangye kuya ku mingilo yanji ya ku mubiji ne, wakonsha kusapwilako busapwishi bwa mu mukwakwa kwipi na kiteshenyi kya shitima. Byo alekele kumvwa moyo ne kusulako ku mukeyu waambanga bantu bamo bakelelanga ku makito, waikele na mutanchi wa kutwalanga magazini ku bantu nobe 40, kubikapotu ne bantu bakelelanga ku makito, baingijilanga pa kiteshenyi kya shitima, ne baingijilanga mu mashitolo a kipi kipi. Washajikile magazini 235 pa ñondo. Kupichila mu kwisamba na bantu kishinka kimo kya mu Binembelo mu kakimye kacheche pa juba pa juba, watendekele kufunjisha mafunjisho a Baibolo atanu na jimo.
6. Bakyanyike bakonsha kwingilako byepi pakatampe mwingilo wabo wa ku mupashi?
6 Bimye bya Kusapwila: Basapwishi bavula bakyanyike bekala na moba a kukokoloka mukachi ka mwaka. Bino byakonsha kwikala bimye byawama kwingilako bupainiya bwa kukwasha. Kabiji kunungapo, bena Kilishitu bakyanyike bakonsha kwingilako pakatampe mwingilo wabo kupichila mu kusapwila pa sukulu. Umvwe mwibasapwila, bakwenu bo mufunda nabo bakonsha kukebesha bingi kuyuka byo mwaitabilamo. Nga mambo ka a kubula kwingijisha bimye byo mushimikizha mashimikila mu kalasi kwibasapwila bakwenu? Bamo basapwilapo kala byonkabye kupichila mu kwingijisha mavidyo etu. Bakwabo batatula mafunjisho a Baibolo na bakwabo mo bafunjila kabiji ne kwibakwasha kununguluka kufika ku kwipana ne kubatizwa. Ano ke mashinda awama a ku ‘totelamo jizhina ja Yehoba.’—Sala. 148:12, 13.
7. (a) Mulongo umo waingijishe byepi bimye kusapwilamo bakwabo? (b) Nanchi ne anweba mwaubapo kya uno mutundu nyi?
7 Mu bintu byo muba pa juba pa juba, esekai mashinda apusana pusana kwisamba na bantu pe Lesa wetu wawama kabiji ne milaye yanji ya kukumya. Mulongo umo uya ku nkito kimye kyonse na mashitima atuntu amo usapwila ku bakwabo mo bakelela ku nkito umvwe kyakonsheka. Kya kumwenako, kimye kyo apembelelanga shitima pa kiteshenyi kimo, wasapwilanga nsongwalume umo pa juba pa juba mu maminiti nobe atanu. Kyafuminemo, uno nsongwalume ne mukwabo baswile lufunjisho lwa Baibolo. Wibafunjishanga lufunjisho lwa Baibolo pa lwendo lwabo monka mu shitima. Palutwe kacheche, mwanamukazhi wakikulumpe watelekangako ku mwisambo wabo, wasolomokele uno mulongo ne kulomba lufunjisho lwa Baibolo. Kabiji ne aye ubena kufunda lufunjisho lwanji pa moba o engijisha shitima. Mu jino jishinda uno mulongo wafunjisha bantu jikumi monka mu shitima.
8. Jishinda ka jakonsha kwingijisha boba bakoma nangwa babelabela kwingilako pakatampe mu mwingilo?
8 Ibyepi inge kya kuba’mba bulume bwapelelela na mambo a kukoma nangwa kubelabela? Kwakonsha kwikalako mashinda akwabo o mwakonsha kutotelamo Yehoba pakatampe. Nanchi mwaesekapo busapwishi bwa pa foni nyi? Umvwe kechi mwayuka bya kusapwila pa foni ne, bulai mukulumpe wenu wa lufunjisho lwa buku. Wakonsha kwambilapo basapwishi bengijisha jino jishinda kwingila nenu. Umvwe ke mwingijile pamo, mwakonsha kwifunjisha anwe bene na bene kabiji ne kwikwasha kusapwila bulongo.
9. Twakonsha kukwasha byepi bo tufunjisha Baibolo kuba’mba bafikepo mu kwingijila pamo na kipwilo mu mwingilo?
9 Kutanwa ku Kivuluko kwakonsha kulengela bakatataka kukeba kutota Yehoba pakatampe. Mwakonsha kwibakwasha kushinda moyo ye bakonsha kwikala naye pa mambo a kwingilako mwingilo wa kusapwila kupichila mu kwibashimikizha bintu bitundaikañana bimweka mu mwingilo wa mu bujimi kabiji ne kupichila mu kwibafunjishanga bya kulumbulula mafunjisho a mu Baibolo ne kuzhikijila lwitabilo lwabo. (1 Pe. 3:15) Inge kya kuba ufunda Baibolo wakeba kutendeka kusapwila mambo awama, bulai mukulumpe utangijila mu kipwilo. Ukanengezha kusambakana nanji kumona kana wafikapo kwingijilanga pamo na kipwilo mu mwingilo nangwa ne. Byo kisangajikapo muchima wa Yehoba umvwe bakatataka ke batundaike bumfumu bwanji bwa pa bilengwa byonse!—Mana. 27:11.
10. (a) Mutanchi wanengezhiwa bulongo wakonsha kwitukwasha byepi kwingilako bupainiya bwa kukwasha? (b) Nanchi mwanengezhezhe kwingilako bupainiya bwa kukwasha mwaka wapwa kimye kya Kivuluko nyi? Mwanengezhezhe byepi?
10 Nanchi Mwakonsha Kwingilako Bupainiya bwa Kukwasha Nyi? Maawala 50 akebewa a bupainiya bwa kukwasha afwainwa kulangulukwapo bulongo. (Mat. 5:37) Akino kyatala mu kuba’mba mwafwainwa kunengezha mutanchi wa kwingilanga maawala 12 mu mwingilo wa mu bujimi mulungu ne mulungu. Nanchi pa mitanchi ya kwingijilamo bupainiya bwa kukwasha iji pa peja 5 pajipo ye mwakonsha kwingijisha nyi? Inge kafwapo, nanchi mwakonsha kunengezhapo mutanchi wakonsha kwimukwasha kwingilako bupainiya bwa kukwasha mu March, April, nangwa May nyi? Lombai Yehoba kwimukwasha kwingilako pakatampe mu mwingilo wenu.—Mana. 16:3.
11. Bakulumpe ne bankwasho bakonsha kukwasha byepi boba bakengilangako bupainiya bwa kukwasha?
11 Bakulumpe ne bankwasho bakemukwasha bingi byo mukengilanga kuba’mba kino kimye kya Kivuluko kikekale kya kutotelamo Yehoba. Kampe bavula ba mwiabo bakengilako bupainiya bwa kukwasha. Bakulumpe bakanengezhapo kupwila kukwabo kwa kuya mu mwingilo, nabiji mu kimye kya mabanga a mute, kimye kya mabanga mu mukachi ka mulungu, ne kumpelo ya mulungu, byonka byo kibena kukebewa. Pa kuba’mba bayuke mpunzha kukekela kuno kupwila ne kimye kabiji ne ukatangijila kuno kupwila, bakulumpe bakonsha kwisamba na boba bakakebesha kwingilako bupainiya nangwa babena kulanguluka kwingilako. Bakulumpe bakengijisha na ngovu kunengezhapo lunengezho lwa kumona kuba’mba pajipo basapwishi bakwabo ba kwingila ne anweba pa moba ne bimye byo mwatanchika bya kwingila mu mwingilo. Mu jino jishinda, mitanchi yonse ikengijiwanga kabiji byavula byakonsha kwingijiwa.—Mana. 20:18.
12. Ki ka kitulengela kutota Yehoba bimye byonse?
12 Ingilai Ponka po Mwakonsha Kupelela: Umvwe kya kuba’mba kechi mwakonsha kwingilako bupainiya bwa kukwasha ne, vulukai kuba’mba Yehoba usanta bingi pa bulume ne milambo yetu yubiwa ‘monka mwayila byo tuji nabyo, kechi mwayila byo twabula ne.’ (2 Ko. 8:12) Tuji na bintu byavula bya kumusanchila Yehoba. Davida kyokyo aambijile’mba: “Nkamutakaikanga Yehoba moba onse: Bya kumutota bikakelwa mu kanwa kami.” (Sala. 34:1) Ne atweba mwane twayai tubenga byonkabye mu kino kimye kya Kivuluko.
[Kitenguluzha pa peja 3]
Mwakonsha Kwingilako Byepi Pakatampe mu Mwingilo?
◼ Sapwilai kimye bantu kyo baji pa mazubo
◼ Sapwilai mu mapunzha mutanyiwa bantu bavula
◼ Sapwilai pa nkito nangwa pa sukulu
◼ Ingilaiko busapwishi bwa pa foni
◼ Ingilaiko bupainiya bwa kukwasha
[Chati pa peja 5]
Mitanchi ya Kwingijilamo Mwingilo wa Bupainiya bwa Kukwasha—Mashinda a Kutanchikilamo Maawala 12 a Mwingilo wa mu Bujimi Mulungu ne Mulungu
Lukelo—Kufuma pa Kimo Kufika pa Kibelushi
Juba ja Mulungu mwakonsha kwijipingizha pa juba jiji jonse panshi po.
Juba Kimye Maawala
Pa Kimo Lukelo 2
Pa Kibiji Lukelo 2
Pa Kisatu Lukelo 2
Pa Kina Lukelo 2
Pa Kitanu Lukelo 2
Pa Kibelushi Lukelo 2
Maawala Onse: 12
Moba Onse Abiji
Moba abiji aji onse mu mulungu akonsha kusalwa (Kwesakana na moba asalwa, uno mutanchi wakonsha kwikalatu na maawala 48 mu ñondo.)
Juba Kimye Maawala
Pa Kisatu Juba Jonse 6
Pa Kibelushi Juba Jonse 6
Maawala Onse: 12
Moba Abiji Mabanga ne Kumpelo ya Mulungu
Moba aji onse abiji mukachi ka mulungu akonsha kusalwa.
Juba Kimye Maawala
Pa Kimo Mabanga 11⁄2
Pa Kisatu Mabanga 11⁄2
Pa Kibelushi Juba Jonse 6
Pa Mulungu Lukelo nangwa mute 3
Maawala Onse: 12
Moba Asatu Mute ne pa Kibelushi
Juba ja Mulungu mwakonsha kwijipingizha pa juba jiji jonse.
Juba Kimye Maawala
Pa Kimo Mute 2
Pa Kisatu Mute 2
Pa Kitanu Mute 2
Pa Kibelushi Juba Jonse 6
Maawala Onse: 12
Mutanchi Wami wa Mwingilo
Tanchikai maawala o mukeba kwingila pa kimye pa kimye.
Juba Kimye Maawala
Pa Kimo
Pa Kibiji
Pa Kisatu
Pa Kina
Pa Kitanu
Pa Kibelushi
Pa Mulungu
Maawala Onse: 12