Bakwashai pa kuba’mba Batwajijile Kufunda

¹ Byo tusapwila mambo awama, javula tusambakana bantu babula kwikala mu nyaunda yetu nangwa bamba mulaka ye tubula kwamba, kuvwangakotu ne mulaka wa kwamba na maboko. Bakwabo bo twisamba nabo pa kimye kyabaya misambo ya mu Baibolo bakonsha kufumamo mu nyaunda yetu. Pano twakonsha kunengezha byepi kuba’mba bantu ba uno mutundu batwajijile kufunda? Kupichila mu mwingijisha kapepala ka Twapaapaata Fwayeni Uyu Muntu. (S-43)

² Javujisha bantu batelekesha ku mambo awama umvwe kya kuba aambiwa mu mulaka wabo. (Byubilo 22:1, 2) Onkao mambo, bimye bimo umvwe twasambakana bantu bamba mulaka ungi, twafwainwa kunemba kapepala nangwatu inge kya kuba’mba muntu kechi wamwesha lusekelo mu mambo a Bufumu ne. Nangwa byonkabyo, umvwe ku mpunzha kuji bantu bavula bamba mulaka ungi pano bino bebasapwila kimye kyonse mu mulaka wabo, kechi kyafwainwa kunemba kano kapepala ne, kanatu umvwe kya kuba muntu wamwesha lusekelo.

³ Kunemba Kapepala: Yukai mwakwipwizha muntu kuba’mba emubule jizhina janji, keyala, ne nambala yanji ya foni. Nembai biji lusekelo lo amwesha, kimye kyakuya na kumumona, buku washajikilwe nangwa ye akebele, ne mulaka ye omvwisha. Panyuma ya kunemba kano kapepala, bukiji bukiji kapanai ku munembeshi mu kipwilo, kuba’mba ekatume ku kipwilo nangwa ku jibumba jamba yewo mulaka.

⁴ Kutuma Kapepala: Umvwe kya kuba’mba munembeshi kechi wayuka kipwilo nangwa jibumba jafwainwa kutambwila kano kapepala ne, nangwa umvwe kya kuba kechi uji na keyala ne, wakonsha kutuma foni ku ofweshi wa musampi kumubula bya kuba nangwa kwikatumatu konka ku musampi kuba’mba bengijilepo. Aluno kafwako kubula mukulumpe wa muzhi pa kutama kano kapepala ne.

⁵ Kimye kyonse kipwilo nangwa jibumba po jatambwila kapepala kanembwa ka Twapaapaata Fwayeni Uyu Muntu, bafwainwa kuya na kumona uno muntu bukiji bukiji. Byo tubena kwingila na ngovu, twafwainwa kuketekela’mba Yehoba ukashinkula michima ya boba ‘batongwelwa bumi bwa myaka.’—Byubilo 13:48.