Isambainga na Bantu pa Mambo a “Kyeya kya Panopantanda”
1. Ñanyi kyeya kikatampe kyaambijilwe jimo mu Mambo a Lesa, kabiji kimye ka kyanema kimwesha kino kyeya?
1 Yehoba waambijile jimo kupichila mwi ngauzhi Isaya amba: “Bantu baendelenga mu mfishi bamona kyeya kikatampe; abo baikajile mu kyalo kya kimvule kya lufu, kyeya kibasamina.” (Isa. 9:2) Kino “kyeya kikatampe” kyamwekejile mu byubilo bya Mwana Lesa, aye Yesu Kilishitu. Mwingilo ye aingijile kimye kyo ajinga panopantanda wa kusapwila ne bibusa byafumine mu kitapisho kyanji byawamishisheko bumupashi bwa boba bajinga mu mfishi. Kino kyeya kyo kibena kukeba bantu mu bino bimye bya mfishi. Kijiilo kya Nkambo kya Mabanga kitupa jishuko jiikajila ja kwisamba na bantu pa mambo a “kyeya kya panopantanda.” (Yoa. 8:12) Mwaka wapwa, bantu bavula bamwesheshe lwitabilo lwabo kupichila mu kwivwanga pamo ne atweba mu kukokela mukambizho wa kwa Yesu wa kuba’mba: “Kasa muba bibye mu kundanguluka amiwa.” (Luka 22:19) Byo tubena kunangijila ku Kivuluko kya uno mwaka, twakonsha kwingilako byepi kwita bantu ku kyeya kikatampe akyo Yehoba kyo asamisha?—Fili. 2:15.
2. Twakonsha kumwesha byepi amba tusanta pa kitapisho kya bukuzhi, kabiji ki ka kikafumamo mu kuba kino?
2 Ikalai na Muchima wa Lusanchilo: Kimye kya Kivuluko ke kimye kyawama bingi kya kulanguluka langulukapo pa butemwe bukatampe bwamwesheshe Yehoba ne Yesu kupichila mu kupana kitapisho kya bukuzhi bwa kukula bantu. (Yoa. 3:16; 2 Ko. 5:14, 15) Kwakubula nangwa kuzhinaukatu ne, kuba kino kuketulengela kwikala na muchima wa kusanta pa kikye kimye kyazhila. Bantu ba Lesa bonse bafwainwa kwikalako na kimye kya kutanga ne kulanguluka langulukapo pa mutanchi wiikajila wa kutanga Baibolo mu Moba a Kivuluko, byonka byo anembwa mu kabuku ka Kubalaulabalaula mu Binembelo pa Juba pa Juba. Kulanguluka pa byubilo bya Yehoba bikatampe byamweshiwa bulongo kupichila mu lunengezho lwanji lwa bukuzhi, bitulengela atweba kusangalala pa kwikala Lesa wetu. Kulanguluka langulukapo pa bitulamata bukuzhi pa bunke bwetu, kubaisha butemwe bwetu bwa kufuma panshi ya muchima bo twatemwa Lesa ne Mwananji kabiji ne kwitutundaika kwingila na ngovu yonse mu kuba kyaswa muchima wa Lesa.—Nga. 2:20.
3. Twakonsha kumwesha byepi amba tuji na lusanchilo lwa Kivuluko?
3 Inge twabaisha lusanchilo lwetu lwa kusanta pa lunengezho lwa Yehoba lwa lupulukilo, kiketulengela kutandanya mbila ya Kivuluko ku bafunda Baibolo, kubwelako ku bantu, ku balongo betu ba ku mubiji, bo twikala nabo, bo tufunda nabo, bo twingila nabo, kubikapotu ne bantu bakwabo bo twita ku jino juba jiikajila. (Luka 6:45) Onkao mambo, ibikishaiko kwita bano bantu bonse, kabiji ne kwibapa tubipepala twa kwichilapo bantu ku Kivuluko pa kuba’mba twibavululengamo. Pa kuba’mba babulenga kulubamo, bavula batana kuba’mba jishinda jingila bulongo ke kunemba mazhina a bantu bo beta ku Kivuluko pa mwaka pa mwaka, kabiji ne kunungapo mazhina a bakatataka. Kuba kino mu jishinda jalumbuluka kabiji ne kwibikishako mu kwita bantu baji na lusekelo jikekala jishinda jawama ja kumwesheshamo lusanchilo lwetu kwi Yehoba Lesa pa “kya bupe kyanji kyabulwa ne mwa kwikitelela.”—2 Ko. 9:15.
4. Ki ka kyakonsha kwitukwasha kwingilako pakatampe mu mwingilo mu March ne mu April?
4 Kwingilako Pakatampe mu Mwingilo: Abya mwakonsha kwingilako pakatampe mu mwingilo mu March ne mu April nyi? Kukebesha kwingilako na bakwetu “mambo awama a lukumo lwa Kilishitu” kine mukafuma bibusa bya Lesa. Yehoba, aye nsulo wa kyeya kyonse kya ku mupashi, wakambizha kuba’mba: “Kyeya kisamine mu mfishi.” (2 Ko. 4:4-6) Umvwe kyakebewa, bakulumpe bakanengezha kupwila kukwabo kwa kuya mu mwingilo wa mu bujimi ne kunengezha kusambakena pa mapunzha apusana pusana pa kuba’mba bakakwashe basapwishi bakeba kwingilako pakatampe mu mwingilo. Kino kyakonsha kuvwangamo kusapwila mu mikwakwa lukelo ne mu nyaunda ya busulu ne kusapwila pa foni mute nangwa mabanga. Pa kuba’mba kikemukwasheko kwingilako pakatampe mu mwingilo, ibikilai kikonkwanyi kya maawala afwainwa, ne kwingila na ngovu kuba’mba mukeafikizhe. Ku bamo, kupa Yehoba byawamisha kuvwangamo kwingilako mwingilo wa bupainiya bwa kukwasha.—Kolo. 3:23, 24.
5. Bavula babena kumwenamo byepi kufuma kimye maawala apananga bapainiya bakukwasha kyo beakepesheko?
5 Nanchi Mwakonsha Kwingilako Bupainiya bwa Kukwasha Nyi? Pabapite ne myaka itanu na ibiji kufuma kimye maawala apananga bapainiya ba kukwasha po beakepesheko. Luno lupimpu lwakwasha basapwishi bavula kumona lusekelo luji mu mwingilo wa bupainiya bwa kukwasha. Abya mwamwesekapo kala nyi? Bamo waikala ke muteeto wabo wa kuba kino pa mwaka pa mwaka. Mu bipwilo byavula basapwishi bavula bengijila pamo uno mwingilo, kabiji kino kikala kintu kikatampe kya lusekelo kya mwingilo wa kipwilo mu mwaka. Nanchi mwakonsha kunengezhapo ñondo wa kwingijilamo na lusekelo mwingilo wa bupainiya bwa kukwasha mu kimye kya Kivuluko nyi? Ku bamo ñondo wa April wakonsha kwibawamina bingi, mambo uji na milungu itanu.
6. Lunengezho ka lwawama lwanengezhiwa?
6 Abya kipwilo kyenu bakekifwakashisha ku mukulumpe wa kijiiji mu March nangwa mu April nyi? Umvwe byo byo kiji, jishuko jikwabo janungwako. Byonka byo kyabijikilwe kunyuma, mu mwaka wa mwingilo wa 2006, bonse babena kwingila mwingilo wa bupainiya bwa kukwasha mu ñondo ukafwakashishamo mukulumpe wa kijiiji, bakebeta kutanwako ku kipungu kitanshi kya kupwila kwikalako na bapainiya umvwe mukulumpe wa kijiiji wafwakasha. Kwakubula nangwa kuzhinaukatu ne, byambo bya ku mupashi bikoseshañana bikalako pa kukwe kupwila bikakwasha bapainiya bakukwasha bavula kukanamina bupainiya bwa kimye kyonse. Kunungapo, mu March tukekala balusekelo kukwasha bantu kwiya ku kyeya kya ku mupashi kupichila mu kwingijisha buku wa kufunjishishamo wa bukumo wa Nanchi Baibolo Kine Ufunjisha’mba Ka? Mambo ka a kubujila kwibikila kikonkwanyi kya kutendeka lufunjisho lwa Baibolo mu uno buku wa bukumo?
7, 8. (a) Ki ka kyakonsha kwitukwasha kunengezha mutanchi wa kwingilako bupainiya bwa kukwasha? (b) Kukwatankana kwa kisemi kwakonsha kukwasha byepi, kabiji kisemi kyonse kimwenamo byepi?
7 Kimye kyo mubena kulanguluka pa maawala akebewa ku bapainiya bakukwasha 50, langulukainga pa mutanchi ukemukwasha kusamisha kyeya kya bukine kupichila mu kwingila maawala 12 pa mulungu pa mulungu. Isambai na baingilapo kala bino, kabiji ne na bakwenu. Akino kyakonsha kwibatundaika nabo kwivwangamo. Na lunengezho lwawama, basapwishi babatizwa bakikulumpe ne bakyanyike bekitaine kuba’mba kechi kyashupa kufikizha kino kikonkwanyi kyanema ne. Kibikai mu milombelo. Kabiji umvwe kyakonsheka, inengezhezhai mutanchi, kabiji ne kwiyowa bupainiya bwa kukwasha!—Mala. 3:10.
8 Bisemi bimo bikitana kuba’mba kwingijila pamo mu bukisemi kwakonsha kukwasha nangwa umo kufikizha kino kikonkwanyi. Kisemi kimo kyafuukwile kuba’mba bonse batanu mu kisemi babatizwa banembeshe bupainiya bwa kukwasha. Bakwabo baana babiji babujile kubatizwa bebikileko bingi kwingilako pakatampe mu mwingilo wabo. Kino kisemi kyamwenejilemo byepi mu kwingilako uno mwingilo na mukoyo? Banembele amba: “Wajinga ñondo wawama bingi, kabiji twiumvwine kuba’mba lufungwa wa kisemi kyetu wakosejileko bingi. Twamusanchila Yehoba pa bibusa byanji bikatampe!”
9. Twakonsha kuleka byepi kyeya kyetu kusama mu kikye kimye kya Kivuluko?
9 Abya mwingilo wetu wiikajila wa mu March ne mu April ukekala wa kwitutundaika, kya kuba tukafwenyeshe kwipi ne Shetu wa mwiulu nyi? Kumufikizha uno mutembo kukemena pa kwibikako kwetu bonse pa muntu pa muntu kumwesha butemwe bo twatemwa Lesa ne Mwananji kabiji ne kwingilako pakatampe mu mwingilo. Mwane kufuukula kwetu kwikale byonka byafuukwile nyimbi wa salamo, waimbile’mba: “Amiwa nkamusanchila bingi Yehoba na kyakanwa kyami; ee kine, nkamutota mu jibumba ja bantu.” (Sala. 109:30) Yehoba ukapesha kwingila kwetu kwa na mukoyo mu kikye kimye kya Kivuluko. Onkao mambo twayai tuleke kyeya kikatampe kisamenga pa kuba’mba bantu bavula bafume mu mfishi ne kwikala na “kyeya kya bumi.”—Yoa. 8:12.