Kya Kumwenako kya Bakyanyike ne Bakikulumpe
Nowa wamwenangamo bingi mu bulunda bwa pa muchima bo ajinga nabo ne Lesa. Wipaine na muchima wanji yense kuba kyaswa muchima wa Yehoba. “Waendelenga na Lesa” kabiji wapeshiwe na mambo a kuba kino. Wajinga wakumwenako wawama bakyanyike ne bakikulumpe ye bafwainwa kulondela. (Nte. 6:9) Vidyo ya kuba’mba Noah—He Walked With God [Nowa—Waendelenga na Lesa] isakwimukwasha kufwanyikizha bwikalo bwa kwa Nowa byo bwajinga, kabiji ne ene mambo o afwanyijilwe bibusa bya Yehoba, kabiji ne byo twakonsha kulondela byubilo byanji byawama.
Lubaji lumo lwa DVD ya Vidyo yaamba pe Nowa muji ano “Mepuzho apa Vidyo.” Tambai ino Vidyo ne kwishikisha anweba bene ano mepuzho: (1) Bamalaika bamo balengele ñanyi mambo, kabiji Banefile bajinga bañanyi? (Nte. 6:1, 2, 4) (2) Mambo ka bantu kyo baishijile kwikala na bubi bwavula, kabiji Lesa waumvwine byepi pa kino? (Nte. 6:4-6) (3) Nowa wapuseneko byepi na bakwabo? (Nte. 6:22) (4) Babi baonawinwe byepi? (Nte. 6:17) (5) Nga bwato bwabaile byepi? (Nte. 6:15) (6) Bintu ka bikwabo Nowa byo aubile, kabiji bantu baubilepo ka? (Mat. 24:38, 39; 2 Pe. 2:5) (7) Banyama banga banga batwelele mu bwato? (Nte. 7:2, 3, 8, 9) (8) Mvula wanokele moba anga, kabiji papichile moba anga pa kuba’mba mema ayujile panopantanda ome? (Nte. 7:11, 12; 8:3, 4) (9) Mambo ka Nowa ne kisemi kyanji o bapulukijile? (Nte. 6:18, 22; 7:5) (10) Mpunzha ka kwakashikimenejile bwato? (Nte. 8:4) (11) Nowa wayukile byepi amba pano kijitu bulongo kufuma mu bwato? (Nte. 8:6-12) (12) Nowa waubilepo ka kimye kyo afumine mu bwato? (Nte. 8:20-22) (13) Nga kakongolo kemenako ka? (Nte. 9:8-16) (14) Kilumbulula ka ‘kwenda na Lesa’? (Nte. 6:9, 22; 7:5) (15) Ki ka kyo twafwainwa kuba pa kuba’mba tukamonañane na Nowa mu Paladisa? (Mat. 28:19, 20; 1 Pe. 2:21)
Nga jishimikila ja mu Baibolo jaamba pa bukishinka ne pa lukokelo lwa kwa Nowa, jimufunjishapo ka pa mambo a ‘kwenda na Lesa’ ne kwikala na luketekelo mu bulume bwa Yehoba bwa kupokolola bantu banji ano moba?—Nte. 7:1; Mana. 10:16; Hebe. 11:7; 2 Pe. 2:9.