Tainga Bantu Muchima—Kupichila mu Kusapwila Kwakubula Misalululo
1 Mu kimwesho, Mutumwa Yoano wamwene Malaika sa apita pakachi ka jiulu, “kasa aji na mambo awama a myaka ne myaka a kusapwila ku bekala panopantanda, ne ku mikoka yonse ne ku bisaka byonse ne ku njimi yonse ne ku mitundu yonse ya bantu.” (Lum. 14:6) Abya tulondela kya kumwenako kya uno Malaika kya kusapwila kwakubula misalululo nyi? Apo kampe tuji na milanguluko ya misalululo bino sa twabula kuyuka’mba tuji nayo. Milanguluko yo tulangulukila bantu bo tutana yakonsha kulengela kwibasapwila mambo awama nangwa ne. Onkao mambo twafwainwa kumwesha kutako muchima kya kine kine umvwe tubena kusapwila ku bantu ba bwikalo bwapusana pusana.
2 Langulukai pa Nyaunda Yenu: Abya mujipo bantu bafuma mu byalo bingi nangwa babipuluka bena kwikala mu nyaunda yenu nyi? Kyapela bingi kwibalubako. Kebakebai bano bantu ne kweseka kwi bayuka bulongo. Bintu ka byo bakeba ne byo babula kukeba, kabiji bijikila ka byo baji nabyo? Esekeshai na ngovu kwibasapwila mambo a Bufumu kwesakana na byo baji. (1 Ko. 9:19-23) Byonka byajinga Mutumwa Paulo, ne atweba twafwainwa kwiumvwanga’mba tuji na mutembo wa kusapwila mambo awama ku bantu bonse baji mu nyaunda yetu, kubikako ne boba bafuma mu byalo bingi, aba baji na bisho byapusanako na byetu, bamba milaka ingi, nangwatu boba banonka bingi.—Loma 1:14.
3 Pano mwakonsha kusapwila byepi muntu wamba mulaka ungi? Ingijishai bulongo kabuku ka Good News for People of All Nations. Mwakonsha kusenda matalakiti ne mabuloshuwa aji mu milaka yambiwa mu nyaunda yenu. (Monai Mwingilo Wetu wa Bufumu wa July 2003, pe. 4, mapala. 2-3.) Kununga pa kino, basapwishi bamo babena kweseka bingi na ngovu kufunda bya kwimuna ne bya kutendeka misambo mu milaka ingi. Javula bantu bomvwa bingi bulongo kumvwa muntu sa esekako kwamba mu mulaka wabo nangwa kya kuba ubena kwambatu kya kupampaila, kabiji kino kyakonsha ne kwi balengela kuteleka ku mambo awama.
4 Londai Yehoba: Kupichila mu kusapwila bantu ba bwikalo bwapusana pusana, tulonda Yehoba Lesa wabula misalululo “wasaka’mba, bantu bonse bapuluke, bakayukishe bya bukine.”—1 Timo. 2:3, 4.