Nanchi Mwinengezha ku bya Malwa Biponakotu Bine Nyi?

1. Mambo ka o kyanemena kwinengezhezha jimo ku bya malwa?

¹ Pa mwaka pa mwaka, bantu bavula mwaya ntanda kubikapo balongo ne banyenga yetu bayanda na mambo a bitentanshi, byashi ne miyulo. Byo kiji kuba’mba bya malwa biponakotu bine kechi biyukanyikwa ne, kabiji ne kuba’mba byakonsha kufikila uji yense, kyanema bingi kwinengezhezha jimo.—Mana. 21:5.

2. Mambo ka o twafwainwa kupela bakulumpe mu kipwilo makeyala ne manambala a mafoni etu a katataka?

² Kwinengezhezha Jimo: Kimye kimo kafulumende ujimunako bantu pa mambo a bya malwa biji pepi kumweka. Kyanema bingi kulondela lolo lujimuno. (Mana. 22:⁠3) Umvwe kyaumvwanyika’mba kuji bya malwa bibena kwiya, bakulumpe mu kipwilo bakeseka kwisamba na bonse mu kipwilo kwibakwasha kwinengezhezha jimo. Kabiji panyuma ya bya malwa, bakulumpe bakesekesha kwisamba na bonse mu kipwilo kumona umvwe bajitu bulongo ne kumonapo bukwasho bwakonsha kukebewa. Pakonsha kutayiwa kimye kyabaya bingi umvwe kya kuba bakulumpe mu kipwilo kechi bayuka kwa kutaina muntu ne. Onkao mambo, kyawama bingi basapwishi kupa munembeshi ne mukulumpe wabo wa lufunjisho lwa buku makeyala ne manambala a mafoni abo a katataka.

3. Twakonsha kukwatankena pamo byepi na bakulumpe mu kipwilo umvwe twikala mu mpunzha mukelwa kumweka bya malwa?

³ Umvwe kipwilo kiji mu mpunzha mukelwa kumweka bya malwa, bakulumpe mu kipwilo bakonsha kwambila basapwishi kwibapa jizhina ne nambala ya foni ya mulongo wabo nangwa mulunda nabo ubula kwikala mu yoyo mpunzha kabiji ye bafwainwa kwisamba nanji umvwe kwamweka bya malwa. Kino kikakwasha bakulumpe kuyuka kuji boba banyemamo mu ino mpunzha kuya kungi. Kabiji bakulumpe bakonsha kunengezhapo lunengezho lwawama lwa byafwainwa kuba kipwilo umvwe kwapona bya malwa. Luno lunengezho lwafwainwa kwikala na bintu nabiji mutanchi wa bintu bikebewa bukiji bukiji muntu byo afwainwa kwikala nabyo, lunengezho lwa kuvilula bantu ne mashinda a kukwashishamo boba bakakebewa bukwasho bukatampe. Kukwatankena pamo na bakulumpe mu luno lunengezho lwa butemwe kwanema bingi.—Hebe. 13:17.

4. Ki ka kyo twafwainwa kuba umvwe mu mpunzha mo twikala mwapona bya malwa?

⁴ Panyuma ya bya Malwa: Mwafwainwa kuba byepi umvwe mu mpunzha mo mwikala mwapona bya malwa? Monai kuba’mba bintu bya ku mubiji bikebewa ku kisemi kyenu byanengezhiwa. Kwashaiko ne bakwenu nabo baji mu oo malwa kwesakana na papelela bulume bwenu. Esekai kwisamba na mukulumpe wenu wa lufunjisho lwa buku nangwa na mukulumpetu mukwabo kwa kubula kukwata nangwa ku lusono ne. Mwafwainwa kuba bino nangwa kya kuba kechi mubena kukeba bukwasho ne. Umvwe mukeba bukwasho, yukai amba balongo benu babena kweseka na ngovu yonse kuba’mba bemukwashe. (1 Ko. 13:4, 7) Vulukai kuba’mba Yehoba wayuka lukatazho lo mujimo; muketekelai kuba’mba emukwashe. (Sala. 37:39; 62:8) Monaipo mashinda a kukwashishamo bakwenu ku mupashi ne kwibatekenesha. (2 Ko. 1:3, 4) Alulukilai ku mingilo yenu ya ku mupashi bukiji bukiji.—Mat. 6:33.

5. Bya malwa bitulamata byepi atweba bena Kilishitu?

⁵ Nangwa kya kuba malwa abena kulengela bingi bantu kususubala, twakonsha kwikala na luketekelo mu kimye kya kulutwe. Bya malwa byonse bukumotu bikapite. (Lum. 21:4) Pa kino kimye, twakonsha kumonapo mashinda a kwinengezhezhamo jimo ku bimye bya malwa ne makatazho byo twatwajijila kwikala ba mukoyo mu kusapwila bantu mambo awama.