Sapwilainga kwa Kubula Kuleka
1 Kimye kimo twakonsha ketulanguluke’mba nyaunda yetu yaingijiwamo bingi, kabiji mujitu bantu bacheche bamwesha lusekelo. Nangwa byonkabyo, kuji bintu byavula bitulengela kutwajijila kusapwila.—Mat. 28:19, 20.
2 Mwa Kwibashimwina Bantu: Yesu waambijile jimo kuba’mba mwingilo wa kusapwila Bufumu ukekala lubaji lwanema lwa kiyukilo kya “mpelo ya buno bwikalo” kabiji ne kuba’mba kino kikobiwa “mwa kwibashimwina ba mu mikoka yonse ya bantu.” (Mat. 24:3, 14, NW) Umvwe bantu kebetumone na kusapwila mambo awama a Bufumu, kuba bino kwikala ke bukamonyi ko baji. Umvwe twafuma ku mpunzha ko tubasapwilenga, bantu bamo bakonsha kebetwambepo kampe pa maawala avula nangwa pa mobatu, kikale baji kuteleka ku byambo byetu nangwa ne. Kuyuka ene mambo o twingijila uno mwingilo kuketukwasha kutwajijila na kusapwila nangwa kya kuba tubena kupita mu makatazho. Tutokesha Yehoba pa muchima byo tubena kwingilako mu kufikizha bungauzhi bwa mu Baibolo kupichila mu kushimuna bukamonyi ku bantu ne kwibajimunako pa mambo a lonaiko lubena kwiya luji kulutwe yabo.—2 Tesa. 1:6-9.
3 Twafwainwa Kwikala ba Mukoyo: Byo kiji kuba’mba bantu bajitu na kimye kicheche na mambo a kuba’mba batabankana na bya kubauba, twafwainwa kwikala ba mukoyo pa kwibakwasha kutemwa bintu byo twibabula. Mwanamukazhi umo bamufwakeshanga mulungu ne mulungu pa mwaka umo saka akyangye kufuukulapo kutendeka kutwezha mu nzubo yanji Bakamonyi kuba’mba besambenga nanji misambo ya mu Baibolo. Watemenwe bingi bintu byo bamubujilenga kya kuba waswile ne lufunjisho lwa Baibolo, kutendeka kutanwa ku kupwila kwa kipwilo, kabiji palutwe kacheche wafuukwilepo ne kubatizwa.
4 Bwikalo bwa panopantanda bubena kwalukilakotu, ne michima ya bantu nayo ibena kuya na kwalukilakotu. Bantu bavula bakaine kwitutambulwila kimye kitanshi kyo twibafwakashijile bakonsha kukeba kuteleka ku byambo bya luketekelo bitekenesha byo twambapo. Nangwa kya kuba muntu umotu ye watambwila mambo a Bufumu, kwingila kwetu kwa na mukoyo kusanchilwa bingi.
5 Kuzhokoloka ntanda yonse, bantu bavula babena ‘kwikizha byefu ne kubinza na mambo a bya bunya bibena kubiwa monka.’ (Ezi. 9:4) Bintu bibena kufumamo na mambo a busapwishi bwetu, bibena kumwesha’mba bamichima ya kishinka babena kutambwila mambo a Bufumu. (Isa. 2:2, 3) Onkao mambo, twayai tutwajijile kusapwilanga kwa kubula kuleka kupichila mu kwikala ba mukoyo mu ‘kutwala mambo awama a lusekelo.’—Isa. 52:7; Byubilo 5:42.