Magazini Etu Beanengezha mu Jishinda ja Kuzakwilamo Bantu Muchima
1. Jibumba ja kalume wakishinka kabiji wa maana jilondela byepi byaubanga mutumwa Paulo?
1 Byonkatu mutumwa Paulo byo ayukile bya kusapwila kwingijisha mashinda apusana pusana pa kuba’mba akwashe “bantu bonse,” jibumba ja kalume wakishinka kabiji wa maana naye ubena kwingijisha magazini etu kukwashishamo bantu baitabila mu bintu byapusana pusana. (1 Ko. 9:22, 23) Pa kuba’mba twingijishenga bulongo magazini a Kyamba kya Usopa ne Awake!, twafwainwa kwiatanga ne kwiomvwisha kabiji ne kuyuka bantu bo banembela ano magazini.
2. Bañanyi bo banembela magazini wa Awake!?
2 Awake!: Uno magazini wanengezhiwa kukwasha bantu ba mutundu umo baambilepo mutumwa Paulo kimye kyo esambilenga na banabalume “bena Atene.” (Byu. 17:22) Bano banabalume bafumine ku bisemi byabula bya bena Kilishitu kabiji kechi bayukishe bulongo binembelo ne. Po pamotu, magazini wa Awake! naye bamunembela bantu babula kuyukisha Baibolo. Bano bantu kampe kechi bakonsha kuyuka mafunjisho a bena Kilishitu ne, kabiji kampe kechi bakonsha ne kuketekala mu bupopweshi nangwa kuyuka buneme bwa Baibolo ne. Nkebelo yine ya kunembela Awake! ke ya kulengela bantu kushiinwa’mba Lesa wa kine koaji. Nkebelo ikwabo ya kunembela uno magazini ke ya kulengela bantu kwikala na lwitabilo mu Baibolo ne kukwasha bantu batanga kuyuka’mba Bakamonyi ba kwa Yehoba bapusanako na mabumba akwabo a bupopweshi.
3. Bañanyi bo banembela Kyamba kya Usopa kya kufundamo?
3 Kyamba kya Usopa: Bantu bo banembela uno magazini wa kusha mu bujimi beseka kumwesha munema wa kunemeka Lesa ne Binembelo. Bayukako pacheche byaamba Baibolo, bino kechi bomvwisha bulongo mafunjisho ajimo ne. Bajitu pamo na bantu Paulo bo aambilepo amba ‘bakamwa Lesa.’ (Byu. 13:14-16) Kyamba kya Usopa kya kufundamo bekinengezhezha kikatakata Bakamonyi ba kwa Yehoba. Paulo wayukile’mba aba batanga makalata anji bayukile Binembelo kabiji ne kwikala na maana a kuyuka bukine. (1 Ko. 1:1, 2) Kyo kimotu, bibaba bya kufundamo bebinengezhezha boba batanwa ku kupwila kwetu kabiji bayuka ne byambo bingijisha Bakamonyi ne byo bilumbulula.
4. Mambo ka o twafwainwa kutangila ne kuyuka biji mu magazini onse abiji o tushila bantu mu bujimi?
4 Nangwa kya kuba tusha magazini onse abiji, pano bino javula twambatu pa imo umvwe tubena kushila muntu. Onkao mambo, saka mutanga ne kuyuka bintu biji mu magazini onse abiji. Kuba bino kukemulengela kwisamba pa bintu biji mu magazini byakonsha kuzakula bantu muchima.