Mashinda a Kwisambilamo

Kutendeka Mafunjisho a Baibolo pa Kibelushi Kitanshi mu October

“Tubena kufwakesha balunda na kwisambako nabo pacheche. Bavula bo twisamba nabo baamba’mba kufwisha mutemwe wabo ke kintu kyatama bingi. Nanchi ne anweba byobyo mumvwa nyi? [Mulekai akumbule.] Naketekela kino kibaba kisa kwimutundaika.” Bamweshai kunyuma ya Kyamba kya Usopa kya October 1 ne kwisamba nabo pa kamutwe katanshi ne kutangapo kinembelo kimo pa byo bamwesha. Mupai Kyamba kya Usopa ne kumulaya kimye kyo mukabwela na kwisamba bwipuzho bwalondelapo.

Kyamba kya Usopa October 1

“Tubena kufwakesha bakwetu ne kwibatundaika kutanganga Baibolo. Twayuka’mba bamo batemwa Baibolo bakwabo kechi beitemwa ne. Nga anweba kiji byepi? [Mulekai akumbule.] Baibolo waamba bino. [Tangai 1 Tesalonika 2:13.] Naketekela musakuswa kuba’mba Baibolo ke buku wafuma kwi Lesa. Onkao mambo, kyanema kumutanga. Uno magazini waamba pa biji Baibolo ne byo mwafwainwa kumutangilanga.”

Labainga! September-October

“Atweba bavula tukeba kwikala myaka yavula. Mwalanguluka’mba kuyilako pa lutwe mu bya sayansi kukalengela kwikala myaka ne myaka nyi? [Mulekai akumbule.] Monai uno mulaye wawama. [Tangai 1 Kolinda 15:26.] Pano Lesa ukoba byepi kino, mwalanguluka’mba kupichila mu bya sayansi nangwa mu bintutu bikwabo nyi? Kabiji mambo ka o tukotela ne kufwa? Uno magazini wamwesha Baibolo byo akumbula ano mepuzho.”