Mashinda a Kwisambilamo

Kutatula Mafunjisho a Baibolo pa Kibelushi Kitanshi mu March

“Tubena kwisamba na balunda netu pa kintu kikamweka pa 14 April. Jino jo juba jo tukavulukanga lufu lwa kwa Yesu. Bamo bakavuluka lufu lwanji mambo bayuka kuba’mba lwanema bingi. Bino, bamo kechi bayuka buneme bwa lufu lwa kwa Yesu ne. Abya mulanguluka’mba lufu lwa kwa Yesu lwanema kwi atweba nyi?” Lekai akumbule. Mweshai kibaba kiji kunyuma ya Kyamba kya Usopa kya March 1 ne kwisamba nanji byambo biji pa bwipuzho butanshi apa bino mutange ne kinembelo kyo bamwesha. Panai magazini ne kulaya kwiya na kwisamba bwipuzho bwalondelapo.

Kyamba kya Usopa March 1

“Bantu bavula balanguluka bingi pa ene mambo Lesa o abujila kufumyapo nshiji ne buyanji pano pa ntanda. Nanchi mulanguluka’mba Lesa kechi wituta muchima ne, nangwa umvwa bulongo inge bantu ke bayande nyi? [Lekai akumbule. Apa bino mutange Yoano 3:16.] Nangwa kya kuba bantu bengijisha kino kinembelo kumwesha kuba’mba Lesa wituta muchima, bino kechi bayuka lufu lwa mwana Lesa byo lwakonsha kwibakwasha ne. Uno magazini walumbulula bulongo lufu lwa kwa Yesu byo lukalengela nshiji ne buyanji pano pa ntanda kupwa.”

Labainga! January–February

“Atweba bavula bintu byo tufuukulapo bimena pa byo tumvwa pa mwela nangwa byo tutanga mu mapepala a byambo. Nanchi mulanguluka’mba byambo byo tumvwa pa mwela ne kutanga mu mapepala a byambo bya kishinka kabiji bya kine nyi? [Lekai akumbule.] Baibolo witujimunako pa bintu byo tumvwa. [Tangai Yoba 12:11.] Uno magazini witubulako bintu bimo byakonsha kwitukwasha kuyuka inge bintu byo tumvwa ne byo tutanga mu mapepala a byambo bya kine nangwa ne.”