Ñondo wa August Ukekala Ñondo wa Mwingilo Mukatampe

1. Ñanyi mukwekele wiikajila ukekalako mu ntanda yonse mu August 2014?

¹ Byo tubena kufika kwipi na myaka 100 kufuma kimye Bufumu bwa Lesa kyo bwatendekele kulama mwiulu, kitufwainwa atweba bonse kupana munema kwi Yehoba kupichila mu kwikala na mukwekele wiikajila. Mu ñondo wa August tukekala na mukwekele wa kusampanya talakiti wa kuba’mba “Bañanyi Bakonsha Kukumbula Mepuzho Anema a mu Bwikalo Bwetu?” Uno talakiti ukatundaika bantu kunyemena ku Baibolo pa kutana mikumbu ya mepuzho akatampe a mu bwikalo, kabiji ukalumbulula keyala wa jw.org byo akonsha kwibakwasha.

2. Twakonsha kubijika byepi na “jiwi jikatampe” ja kutota Yehoba mu ñondo wa August?

² Kutota Lesa na Jiwi Jikatampe: Kukekala lunengezho lwawama lwa kutundaika basapwishi bakengilangako busapwishi bwa kukwasha mu ñondo wa August. Ko kuba’mba mu uno ñondo, basapwishi babatizhiwa bakakonsha kwingilako busapwishi bwa kukwasha bwa kufikizhatu maola 30. Ñondo wa August uji na milungu ituntulu ina ne Bibelushi bitanu. Onkao mambo, basapwishi baya ku makito mukachi ka mulungu bakakonsha kwingilako busapwishi bwa kukwasha pamotu ne basapwishi banyike baya ku masukulu mambo kyo kimye kyo bashinka masukulu. Umvwe mwanenu nangwa muntu ye mufunjisha Baibolo wafikilamo kwikala musapwishi, bulai mukulumpe ukwatankanya jibumba ja bakulumpe mu kipwilo bukiji bukiji. Kyakonsha kuwama bingi inge mwanenu nangwa muntu ye mufunjisha Baibolo waikala musapwishi pa kino kimye kya mukwekele wiikajila. Mu ñondo wa August, bapainiya ba kimye kyonse bavula bekalapo na kimye kya kukokoloka panyuma ya kufikizha maola akebewa pa mwaka. Pano bino, bakonsha kupimpulako mutanchi wabo wa kukokoloka ne kwivwangamo mu uno mukwekele wiikajila. Kabiji kino ke kimye kyafwainwa bisemi kwisamba pa byo ‘bakabijika na jiwi jikatampe ja kutota Yehoba’ mu August.—Eze. 3:11; Mana. 15:22.

3. Ñanyi luketekelo lo tuji nalo pa uno mukwekele wiikajila?

³ Nangwa kya kuba twakiingilapo kala mikwekele ya uno mutundu mu myaka ya kunyuma, twaketekela kuba’mba uno mukwekele ukapusanako ku yonse ya kunyuma. Ibyepi inge mu August twafikizha maola o tukyangye kufikizhapo kala, ne kwikala na basapwishi ne bapainiya ba kukwasha bavula kukila kala? Byo tubena kufika ku mpelo ya mwaka wa mwingilo wa 2014, twalomba Yehoba apeshe bantu banji mwaya ntanda mu mwingilo ye bakengila mu August wa kusapwila kukila bimye byonse bya kunyuma.—Mat. 24:14.