Nyimbo ya Katataka ya Kwingijisha pa Kupopwela!
1 Pa kusambakana kwa pa mwaka pa mwaka kwa Watch Tower Bible and Tract Society of Pennsylvania kwajingako pa October 4, 2014, babijikile kuba’mba babena kukeba kunembulula buku wa nyimbo ye twingijisha luno. Abino byajinga byambo byawama! Bonse bajinga mu luonde bebavulwileko kyanema nyimbo ya Bufumu mu mpopwelo yetu.—Sala. 96:2.
2 Mwakonsha kwamba’mba, ‘Mambo ka o kibena kukebewa kunembulula buku wa nyimbo?’ Kuji bintu byavula bingi byalengela kuba kino. Kintu kitanshi, ndumbulwilo ya Binembelo yatwajijila kwaluka, kabiji kino kyakonsha ne kulengela kwalulako byambo bya nyimbo yetu. (Maana 4:18) Kintu kikwabo kya kwiinembulwila ke: Byambo byavula ne bipelu byo baingijisha mu buku wa nyimbo yo twingijisha luno byafumine mu Baibolo wa kala wa Binembelo bya Ntanda Ipya. Abino byambo biji mu nyimbo bibena kukebewa kwibyalulako pa kuba’mba byesakane na Baibolo ye banembulula. Byo kiji kuba’mba kuba bino kubena kukebewa kwingila na ngovu pa kuba’mba byambo byesakane, bafuukwile kunungako nyimbo icheche ya katataka mu buku wa nyimbo.
3 Nanchi twafwainwa kupembelela amba bakapulinte buku wa katataka wa nyimbo bino apa tukatendeke kwingijisha nyimbo ya katataka nyi? Ine. Twiba lusekelo kwimubula’mba mu bañondo ba kulutwe bakabikapo nyimbo ya katataka pa Keyala wetu wa jw.org. Inge babikapo lwimbo wa katataka, ukekalanga kwapela mutanchi wa Kupwila kwa Mwingilo na byambo bya kuba’mba “lwimbo wa katataka.”
4 Bya Kufunda Nyimbo ya Katataka: Kikatazha bingi pa kufunda lwimbo wa katataka. Byonka byajinga nyimbi wa masalamo, tukeba kwimba bingi pa kupwila “kwa kubula kuzhindamapo” ne. (Sala. 30:12) Pa kuba’mba mufunde lwimbo wa katataka, londelai ano mashinda.
Telekainga ku nyimbo ya bijimba yo bakabika pa Keyala wetu. Inge mwateleka ku ino nyimbo pa kimye kyabaya, kikemupelela kwiivulukamo.
Pitulukai mu byambo bya nyimbo ne kweseka kwibilabijila.
Imbai nyimbo ya mu bijimba pamo na byambo bya nyimbo. Twajijilai kuba kino kufikatu ne byo mukalabijila uno lwimbo.
Imbainga nyimbo ya katataka pa kimye kicheche pa Kupopwela kwa Kisemi kufikatu ne kisemi kyenu byo kikembanga bulongo.
5 Inge lwimbo wa katataka ye ye musa kwimba pa kushinka Kupwila kwa Mwingilo, kipwilo kisa kuteleka ku uno lwimbo jimo. Apa bino kipwilo kimbile pamo na bijimba, byonka byo kikala kimye kyonse pa kwimba nyimbo ikwabo.
6 Inge mwalanguluka pa kino, kwimbila pamo na lusekelo pa kupwila kwetu kwitulengela kukwatankana mu kupopwela Yehoba. Onkao mambo, kechi twafwainwa kwikala na kisonso kya kulupuka pangye inge twatendeka kwimba lwimbo pa kupwila kwetu kwa bwina Kilishitu ne.
7 Kuji ne jishinda jikwabo jo twakonsha kumwesheshamo kuba’mba tusanta bingi pa nyimbo yetu yazhila. Pa kutendeka kipungu kyonse kya kubuñana ne kushonkena, bitendeka na nyimbo. Jibiji mu mwaka, balongo ne banyenga bepana bengijisha mali abo kuya ku Patterson, New York, pa kuba’mba bembe nyimbo ya kwingijisha mu mpopwelo yetu. Onkao mambo, umvwe wa kumupando witwambila kwikala ne kuteleka ku nyimbo, twafwainwa kuba byonkabyo. Inge twauba bino, tukanengezha michima yetu kuteleka ku byambo bikalondelapo.—Eze. 7:10.
8 Pa kupwisha kuno kupwila lelo, tusa kwimbako lwimbo umo wa katataka uji na mutwe wa kuba’mba “Bufumu Bubena Kulama—Bwiye!” Byambo biji mu uno lwimbo, byo byaambilwengapo pa kushonkena kwa kijiiji kwajingako uno mwaka, wasombelwe na mambo a kuba’mba Bufumu bwafikizha myaka 100 kufuma po bwaikajikilwe.
9 Kya kine ino nyimbo ya katataka ke “bintu byawama” byafuma kwi Yehoba. (Mat. 12:35a) Twayai nanchi twibikengako kufunda ino nyimbo ya katataka ne kwimbanga kufuma panshi ya muchima, ne kupana lutotelo ne munema kwi Lesa wetu!—Sala. 147.1.