Yoba Watwajijile Kwikala wa Kishinka byo Apichilenga mu Meseko

Yoba waikalanga mu kyalo kya Uze kimye bena Isalela kyo bajinga mu buzha mu Ijipita. Nangwa kya kuba kechi wajinga mwina Isalela ne, Yoba wajinga mupopweshi wa Yehoba wa kishinka. Wajinga na kisemi kikatampe, bunonshi kabiji bamunemekele bingi mu kimasamasa mo aikalanga. Wajinga upana maana kabiji mutonyi wabula misalululo. Waubilanga bayanji byawama. Yoba wajinga muntu wa kishinka.

Yoba wamwesheshe kuba’mba Yehoba ye wakijilemo kunema mu bwikalo bwanji

1:8-11, 22; 2:2-5

• Satana wamwene bukishinka bwa kwa Yoba. Wayukile’mba Yoba wakokelanga Yehoba, bino wazhinaukileko byamulengelanga kuba bino

• Satana waambile amba Yoba wingijila Yehoba na mambo a bintu byawama byo amupa

• Pa kuba’mba amweshe amba byaambilenga Satana byajinga bya bubela, Yehoba waswishishe Satana kulukuka Yoba muntu wa kishinka. Satana waletejile Yoba malwa akabotoka

• Yoba byo atwajijile kwikala muntu wa kishinka, Satana wazhinaukile bukishinka bwa bantu bonse

• Yoba kechi walengele mambo ne, nangwa kupamo Lesa mambo amba ye walengela ne