Nanchi Mwayuka Nyi?

Mambo ka bantu babujile bena Isalela o baikejile mu nzhita ya Mfumu Davida?

BANABALUME bamo bajinga mu nzhita ya kwa Davida bajinga Zeleka mwina Amonyi, Uliya mwina Hiti ne Itama mwina Moabu.a (1 Moba. 11:39, 41, 46) Kabiji mu nzhita ya kwa Davida mwajinga ne “bena Keleta, bena Peleta ne bena Gata.” (2 Sam. 15:18) Kyamweka bena Keleta ne bena Peleta bajinga balongo na bena Filishitiya. (Ezi. 25:16) Bena Gata baikalanga mu muzhi wa bena Filishitiya wa Gata.​—Yosh. 13:2, 3; 1 Sam. 6:17, 18.

Pano mambo ka Davida o aswishishe banabalume babujile bena Isalela kwikala mu nzhita yanji? Washiinwe’mba bajinga ba kishinka kwi aye, kikatakata kwi Yehoba. Kiji bino mambo buku umo waamba pa bena Keleta ne bena Peleta amba: “Batwajijile kwikala ba kishinka kwi Davida byo apichilenga mu makatazho akatampe mu kimye kya bukalama bwanji.” (The New Interpreter’s Dictionary of the Bible) Mambo ka o twaambila bino? “Banabalume bonse bena Isalela” byo balekele kulondela Davida ne kutendeka kulondela “muntu waletanga makatazho wa jizhina ja Sheba,” bena Keleta ne bena Peleta batwajijile kwikala ba kishinka kwi Davida ne kumukwasha kulekesha bunsatuki bwaletele Sheba. (2 Sam. 20:1, 2, 7) Kabiji pa kimye kikwabo, mwana wa mulume wa Mfumu Davida aye Adoniya wakebelenga kwangata bufumu. Bena Keleta ne bena Peleta abo batwajijile kwikala ba kishinka kwi Davida ne kukwasha Solomone kwikala Mfumu Yehoba ye asajile kuswana pa Bufumu.​—1 Mfu. 1:24-27, 38, 39.

Mwanamulume mukwabo wabujile mwina Isalela watwajijile kwikala wa kishinka kwi Davida wajinga Itai mwina Gata. Itai ne bantu banji 600 bakwashishe mfumu Davida kimye mwana wa mulume wa kwa Davida aye Abisalomo kyo asatukile ne kongola michima ya banabalume bena Isalela kuba’mba basatukile mfumu. Davida waambijile Itai kuba’mba kechi wafwainwe kumulwilako nkondo ne, mambo kechi wajinga mwina Isalela ne. Nangwa byonkabyo, Itai waambile’mba: “Byonkatu Yehoba byo aji na bumi ne anweba nkambo mfumu byo muji na bumi, konse ko mukekala anweba nkambo mfumu, nangwa mu lufu nangwa na bumi, ne amiwa kalume wenu ko ko nkekala!”​—2 Sam. 15:6, 18-21.

Nangwa kya kuba bena Keleta, bena Peleta ne bena Gata kechi bajinga bena Isalela ne, bino bayukile’mba Yehoba ye Lesa wa kine kabiji amba Davida wajinga mushingwa wa Yehoba. Kwikala na banabalume ba kishinka ba uno mutundu bamukwashanga, kwatundaikile bingi Davida.