Ntangi Wetu Wingila Na Ngovu Lelo Jino
“Wayilenga na kushinda amba nkashinde.”—LUM. 6:2.
1, 2. (a) Mwingilo wa bukalama bwa kwa Kilishitu wimenwako na ka mu Baibolo kufuma mu 1914? (b) Bintu ka Kilishitu byo auba kufuma kimye kyo bamubikile pa bufumu?
KILISHITU waikajikilwe ke Mfumu wa Bufumu bwa kwa Yehoba bwa Bumesiasa mu 1914. Nanchi tumufwanyikizha kwikala muntu wa mutundu ka? Abya tulanguluka amba ke mfumu wa maana waikalatu shakata pa jitanda janji ja bufumu, na kutalatalatu panopantanda ne kumona bibena kwingila kipwilo kyanji kimye kyonse nyi? Umvwe byo byo tumulangulukila, twafwainwa kupimpula milanguluko yetu. Mu buku wa Masalamo ne Lumwekesho bamwambapo kwikala mfumu wa bulume wakanjila pa mbili, ubena kuya “na kushinda amba nkashinde,” saka atwajijila na “kushukwa.”—Lum. 6:2; Sala. 2:6-9; 45:1-4.
2 Panyumatu ya kumubika pa bufumu, Kilishitu washinjile “nsuñunyi ne bamalaika banji.” Byo aji Mikela malaika mwine mukatampe ukambizha bamalaika banji, Kilishitu waswatwile Satana ne bandemona banji mwiulu ne kwibataya panopantanda. (Lum. 12:7-9) Kabiji byo aji “muluwe wa lulayañano” wa kwa Yehoba, Yesu ne Shanji bapempwile nzubo ya Lesa ya ku mupashi ne kumona byo yajinga. (Mala. 3:1) Wazhachishe Kilishitendomu, awo wajinga lubaji lwakijilemo kutama lwa “Babilona mukatampe,” pa ku mutana na mambo a kwipayañana ne kuba bukende bwa ku mupashi na bamulwila ntanda ba ino ntanda.—Lum. 18:2, 3, 24.
Kilishitu Watokesha Kalume Wanji Panopantanda
3, 4. (a) Kilishitu waingijile ñanyi mwingilo byo aji “muluwe” wa Yehoba? (b) Kupempula nzubo ya Lesa kwamwesheshenga ka, kabiji byo aji Mutwe wa kipwilo, Yesu walaya ka?
3 Kupempula kwa kwa Yehoba ne “muluwe” wanji kwamwekejile ne mu kipango kya nzubo yanji ya ku mupashi panopantanda, ko kuba amba jibumba ja bena Kilishitu bakine bajiko lelo jino, abo babujile kwikala ku lubaji lwa machechi a Kilishitendomu. Nangwa byonkabyo, ne bena Kilishitu bashingwa, nangwa amba “bena Levi,” bafwainwe kwibatokesha. Kyaikele byonka byaambijile jimo ngauzhi Malakai amba: “[Yehoba] ukekala panshi nobe sendwe usungulula ne kuwamisha siliva, kasa ebawamisha bena Levi, ne kwibatokesha byonka byo boba na ngolode ne na siliva; kepo bakalambulanga milambo kwi Yehoba monka mwafwainwa.” (Mala. 3:3) Yehoba waingijishe “muluwe [wanji] wa lulayañano,” aye Yesu Kilishitu, kutokesha bano bena Isalela ba ku mupashi.
4 Nangwa byonkabyo, Kilishitu wataine bano bena Kilishitu bakishinka bashingwa saka bapana kajo ka ku mupashi ka pa kimye pafwainwa ku ba mu nzubo yanji mu lwitabilo. Kufuma mu 1879 kuya ne kulutwe, mu bimye byawama ne byatama, batwajijila kusampanya bukine bwa mu Baibolo bwa Bufumu bwa Lesa kupichila mu magazini. Yesu waambijile jimo amba, “pa kwiya” na kupempula ba mu nzubo yanji kimye “kya juba jikapelako,” ukatana kalume saka apana “kajo pa kimye pafwainwa.” Ukamwambila awa kalume amba watokwa kabiji “ukamupa bukulumpe bwa bintu byanji byonsetu.” (Mat. 24:3, 45-47) Byo aji Mutwe wa kipwilo kya bena Kilishitu, Kilishitu waingijishe uno ‘kalume wakishinka kabiji wa maana’ kutangijila bintu bya Bufumu panopantanda. Utangijila “ba mu nzubo” yanji bashingwa ne ‘bamikooko ikwabo’ kupichila mu Jibumba Jitangijila.—Yoa. 10:16.
Kunowa Ntanda
5. Mu kimwesho, mutumwa Yoano wamwene mfumu wa Bumesiasa saka oba ka?
5 Mutumwa Yoano wamwene kimwesho kya bintu bikwabo byakonsheshe kuba Mfumu wa Bumesiasa mu “juba ja Nkambo,” panyuma ya kwikala mfumu mu 1914. Yoano wanembele amba: “Namwene, ponkapo ke ku jikumbi jitoka; ne pa jikumbi namwene umo kasa aikala nobe mwana muntu, ne pa mutwe wanji paji munchinya wa ngolode, ne mu kuboko kwanji kikwakwa kyatwa.” (Lum. 1:10; 14:14) Yoano waumvwine malaika wa Yehoba saka ambila awa Unowa kutola kikwakwa ne “kunowa bya panopantanda byapya.”—Lum. 14:15, 16.
6. Ki ka kyaambile Yesu kuba amba kikobiwa kulutwe na lwendo?
6 “Kunowa bya panopantanda” kwituvululamo ka pa mambo a kishimpi kya kwa Yesu kya kajo ne bincha? Yesu wipashañenye mwine ku muntu wabyajile nkunwa yawama mu bujimi kabiji wakebelenga kunowa kunwa yawama yonka yo abyajile, ino nkunwa yaimejilengako ‘baana ba mu bufumu,’ bena Kilishitu ba kine bashingwa bakalama nanji mu Bufumu bwanji. Pano bino bufuku, mulwanyi, aye “Diabola,” wakushilemo bincha mu bujimi, bo ‘baana ba aye mubi.’ Awa wakushile nkunwa waambijile ba mwingilo banji kuleka kajo ne bincha kukomena pamo poso ne kimye kya kunowa mu “juba jikapelako.” Pa kyokya kimye, ukatuma bamalaika banji kwabanya kajo ne bincha.—Mat. 13:24-30, 36-41.
7. Kilishitu ubena kwingila byepi mwingilo wa “kunowa bya panopantanda”?
7 Pa kufika kwa kimwesho kyamwene Yoano, Yesu ubena kutangijila mwingilo wa kunowa wa ntanda yonse. “Kunowa bya panopantanda” kwatendekele na kukonkanya kwa bashalapo ba 144,000 ‘baana ba mu bufumu,’ ko kuba amba “nkunwa” ya mu kishimpi kya kwa Yesu. Lupusano luji pakachi ka bena Kilishitu bakine ne babubela kwamwekeshe panyuma ya Nkondo Itanshi ya Ntanda Yonse, kya kuba kyalengejile kwaikala ne lubaji lukwabo lwa “kunowa bya panopantanda,” ko kuba amba kukonkanya ba mikooko ikwabo. Abano kechi ‘baana ba mu bufumu’ ne, pano bino ke ba “jibumba jikatampe” bepana kwikala bangikazhi ba buno Bufumu. Bebafumya mu “mitundu yonse ne ba mu mikoka yonse ne ba njimi yonse.” Banekenena Bufumu bwa Bumesiasa, bwalengwa na Kilishitu Yesu ne ba 144,000 “bazhijikwa” bakalama nanji mu bufumu bwa mwiulu.—Lum. 7:9, 10; Da. 7:13, 14, 18.
Lutangijilo lwa Kipwilo
8, 9. (a) Ki ka kimwesha kuba amba Kilishitu kechi umonatu byubilo bya kipwilo kyonse ne, bino umona ne bwikalo bwa bonse bajimo pa muntu pa muntu? (b) Byonka byo kyaambiwapo pa jipa 26, ñanyi “byazhika bya kwa Satana” byo twafwainwa kuchinuzhuka?
8 Mu mutwe wafumako twamwene Kilishitu byo atele muchima bumupashi bwa bipwilo byonse bya mu myaka kitota kitanshi. Lelo jino, byo aji Mfumu ubena kulama na “lūsa lonse . . . lwa mwiulu ne lwa pano panshi,” Kilishitu Ntangi wetu ye mutwe wa bipwilo byonse mwaya ntanda ne bakalama babyo. (Mat. 28:18; Kolo. 1:18) Yehoba ‘wamupana aye amba ekale mutwe wa byonse ku kipwilo’ kya bashingwa. (Efi. 1:22) Byo aji mutwe wa kipwilo, kafwako kintu nangwa kimo kyubiwa mu bipwilo kukilaila pa 100,000 bya Bakamonyi ba kwa Yehoba kyo abula kuyuka ne.
9 Ku kipwilo kya kukala kya mu Tiyatila, Yesu watumineko byambo bya kuba amba: “Aye Mwana Lesa, ye uji na meso auba nobe lubebe lwa mujilo, waamba bino amba, . . . Nayuka mingilo yobe.” (Lum. 2:18, 19) Wakajipijile bantu bajinga mu kyokya kipwilo pa byubilo byabo byatama, bwikalo buncha bwa kwiubila bintu, kupichila mu kwibambila amba: ‘Amiwa nkebakeba mu mafyo ne mu michima: kabiji nkemupa bonse monka mwayila mingilo yenu.’ (Lum. 2:23) Bino byambo bimwesha kuba amba Kilishitu kechi umonatu byubilo bya kipwilo kyonse ne, bino umona ne bwikalo bwa bonse bajimo pa muntu pa muntu. Yesu watakaikile bena Kilishitu ba mu Tiyatila ‘babujile kwibiyuka byazhika bya kwa Satana.’ (Lum. 2:24) Lelo jino, Kilishitu upesha boba bachinuzhuka kukebakeba “byazhika bya kwa Satana” kupichila mu ma Intaneti, makayo abya bukapondo a pa mavidyo nangwa kwitabizha maana a bantu, kikale banyike nangwa bakulumpe. Byo ekalapo na lusekelo kumona kwibikishako ne kwipana kwa bena Kilishitu bavula lelo jino babena kwibikako kulondela buntangi bwanji mu bwikalo bwabo bonse!
10. Lutangijilo lwa kwa Kilishitu kupichila mu bakulumpe mu kipwilo lwimenwako na ka, pano bino lunengezho ka lukebewa kuyuka?
10 Kilishitu wabikako lutangijilo lwa butemwe mu bipwilo byanji panopantanda kupichila mu bakulumpe batongolwa kulama mu bipwilo. (Efi. 4:8, 11, 12) Mu myaka kitota kitanshi, bonse bakalama mu bipwilo bajinga bashingwa na mupashi. Mu buku wa Lumwekesho bano baimenwako na tubangabanga tuji mu kuboko kwa kwa Kilishitu kwa kilujo. (Lum. 1:16, 20) Lelo jino, bakulumpe mu kipwilo bavula ke ba mu mikooko ikwabo. Batongolwa panyuma ya lulombelo ne na lutangijilo lwa mupashi wazhila, onkao mambo, nabo twakonsha kwibamonanga kuba amba babena kutangijilwa ne Kilishitu, nangwa amba babena kutangijilwa na kuboko kwa bulume. (Byu. 20:28) Pano bino, bayuka kuba amba Kilishitu ubena kwingijisha jibumba jicheche ja banabalume bena Kilishitu bashingwa kwikala Jibumba Jitangijila kutangijila baana banji ba bwanga panopantanda.—Tangai Byubilo 15:6, 28-30.
“Iyai, Nkambo Yesu”
11. Mambo ka o tukebesha kuba amba Ntangi wetu eye bukiji?
11 Mu kimwesho kyapainwe kwi mutumwa Yoano, Yesu waambile bimye byavula kuba amba ubena kwiya bukiji. (Lum. 2:16; 3:11; 22:7, 20) Kwakubula nangwa kuzhinaukatu ne, waambilenga pa kwiya kwanji na kuzhachisha Babilona Mukatampe ne ntanda yatama ya kwa Satana. (2 Tesa. 1:7, 8) Byo akebeshenga kumonako kufika kwa bintu byawama byaambijilwe jimo, mutumwa wa kikulumpe aye Yoano waambile amba: “Amena! Iyai, Nkambo Yesu.” Ne atweba tubena kwikala mu ano moba apelako abuno bwikalo bubi, tukebesha kumonako Ntangi kabiji Mfumu wetu byo akeya na bulume bwa Bufumu na kuzhijika jizhina ja Shanji ne kutumbijika bumfumu bwanji.
12. Ñanyi mwingilo Kilishitu ye akapwisha saka bakyangye kulekako luvula lwa lonaiko?
12 Yesu saka akyangye kwiya na konauna bwikalo bwatama bwa kwa Satana, bapelako ba mu ba 144,000 bena Isalela ba ku mupashi bakabikwa tuyukilo twapelako. Baibolo waambishatu patoka kuba amba luvula lwa lonaiko kechi bakelulekako kuba amba lonaune ntanda yatama ya kwa Satana saka bakyangye kupwisha kubika tuyukilo pa ba 144,000 ne.—Lum. 7:1-4.
13. Kilishitu ukayukanyikisha byepi kwikalapo kwanji mu lubaji lutanshi lwa “malwa akatampe”?
13 Bangikazhi bavula panopantanda kechi bayuka “kwikalapo” kwa kwa Kilishitu kutendeka 1914 ne. (2 Pe. 3:3, 4) Nangwa byonkabyo, katatakatu akayukanyikishe kwikalapo kwanji kupichila mu kuleta luzhachisho lwa Yehoba pa mbaji yapusana pusana ya bwikalo bwatama bwa kwa Satana. Luzhachisho lukeya pa “muntu wa bumpupabizhila,” ko kuba amba bantangi ba mu Kilishitendomu, lukekala kiyukilo kya “kumweka kwa kwiya kwanji.” (Tangai 2 Tesalonika 2:3, 8.) Kino kikekala kiyukilo kikatampe kikamweshanga kuba amba Kilishitu ye nchibamambo wa kwa Yehoba. (Tangai 2 Timoti 4:1.) Konaunwa kwa lubaji lwakilamo kutama lwa Babilona Mukatampe ko kukekala ntendekelo ya konaunwa kwa bufumu bwa ntanda yonse bwa bupopweshi bwa bubela. Yehoba ukekibika mu michima ya bakalama ba bumulwila ntanda kya konauna pite wa ku mupashi. (Lum. 17:15-18) Kino kikekala lubaji lutanshi lwa “malwa akatampe.”—Mat. 24:21.
14. (a) Mambo ka lubaji lutanshi lwa malwa akatampe kyo bakeluchibilako? (b) Nga “kiyukilo kya Mwana muntu mwiulu” kikalumbulula ka ku bantu ba kwa Yehoba?
14 Yesu waambile kuba amba ao moba a malwa bakeachibako “na mambo a basalululwa,” ko kuba amba bena Kilishitu bashingwa bashalapo panopantanda. (Mat. 24:22) Yehoba kechi ukaswisha kulukukwa kwatama kwa bupopweshi bwa bubela kufumyapo bena Kilishitu bashingwa ne bakwabo ba mikooko ikwabo ne. Yesu wanungilepo amba “pa kupwa malwa a aa moba,” kukekala biyukilo mu juba, mu ñondo ne mu tubangabanga, “kabiji ponkatu kikamweka kiyukilo kya Mwana muntu mwiulu.” Kino kikalengela mikoka ya bantu panopantanda ‘kwitamina miteto.’ Abino kechi byo kikekala ku bashingwa, baji na luketekelo lwa mwiulu ne bakwabo, baji na luketekelo lwa kwikala panopantanda ne. Abo ‘bakenuna mitwe yabo; mambo bukuzhi bwabo ke buji pepi.’—Mat. 24:29, 30; Luka 21:25-28.
15. Ñanyi mwingilo Kilishitu ye akengila inge waiya?
15 Saka akyangye kupwisha kushinda, Mwana muntu ukeshila mu jishinda jikwabo. Waambijile jimo amba: ‘Kabiji Mwana muntu byo akeya mu lukumo lwanji, ne bamalaika bonse pamo, kepo akekala pa jitanda janji ja lukumo. kabiji mikoka yonse ya bantu ba panopantanda ikakungulukila ko aji: ne aye ukebabanya umo ku mukwabo, umo ku mukwabo, byonka byo abanya kafunga mikooko ne bambuzhi; kabiji ukeifungila mikooko konka ku kilujo kyanji, ne bambuzhi nabo ku kipiko kyanji.’ (Mat. 25:31-33) Buno bungauzhi bubena kwamba pa kwiya kwa kwa Kilishitu byo aji Mutonyi na kwabanya ba “mikoka yonse ya bantu ba panopantanda” mu mabumba abiji, ‘mikooko,’ ke boba batundaika balongo banji ba ku mupashi (bena Kilishitu bashingwa baji panopantanda) kabiji “bambuzhi,” ke boba “babula kukokela mambo awama a Nkambo yetu Yesu.” (2 Tesa. 1:7, 8) Mikooko yalumbululwa amba “baoloka,” ke boba bakekala na “bumi bwa myaka” panopantanda, pakuba bambuzhi ke boba “bakaya ku lukabisho lwa myaka,” nangwa amba ku lonaiko.—Mat. 25:34, 40, 41, 45, 46.
Yesu Wapwisha Kushinda
16. Kilishitu Ntangi wetu ukapwisha byepi kushinda?
16 Panyuma ya kuba bonse bamfumu ne bañanga bo akalama nabo babikwa tuyukilo kabiji ne mikooko yayukanyikwa ne kubikwa ku kuboko kwanji kwa kilujo kwa lupulukilo, Kilishitu ukaya na ‘kushinda amba akashinde.’ (Lum. 5:9, 10; 6:2) Kabiji kwakubula nangwa kuzhinaukatu ne, kupichila mu kwingijisha nzhita ya bamalaika, balongo banji bakasangulwa, Kilishitu ukonauna bumulwila ntanda bonse bwa kwa Satana, nzhita ya bashilikale ne bya busulu bya panopantanda. (Lum. 2:26, 27; 19:11-21) Kilishitu ukashinda umvwe waonauna bwikalo bwatama bwa kwa Satana. Panyuma ya kuba bino ukakasa Satana ne bandemona banji myaka kiumbi kimo.—Lum. 20:1-3.
17. Mu Bukalama bwa Myaka Kiumbi, Kilishitu ukatangijila mikooko ikwabo ku ka, kabiji twafwainwa kwibikishako kuba ka?
17 Byo aambilenga pa “jibumba jikatampe” ja mikooko ikwabo, bakapuluka malwa akatampe, mutumwa Yoano waambijile jimo amba ‘Mwana mukooko uji mu bukata bwa jitanda ukekala kafunga wabo, kabiji ukebatangijila kuji masulo atupauka a mema a bumi.’ (Lum. 7:9, 17) Ee, mu Bukalama bwanji bwa Myaka Kiumbi, Kilishitu ukatangijilanga mikooko ikwabo, bomvwa jiwi janji, ne kwibatangijila ku bumi bwa myaka. (Tangai Yoano 10:16, 26-28.) Twayai twibikishengako kulondela Ntangi wetu wakishinka lelo jino kufikatu ne kimye kyo tukatwela mu ntanda ipya yo etulaya Yehoba!
Kupitulukamo
• Ki ka Kilishitu kyo aubile panyumatu ya kwikajikwa pa jitanda?
• Kilishitu ubena kwingijisha bañanyi kutangijila bipwilo?
• Ñanyi mashinda Kilishitu Ntangi wetu mo akeshila?
• Kilishitu ukatwajijila byepi kwitutangijila mu ntanda ipya?
[Kipikichala pa peja 29]
Lonaiko lwa bwikalo bwatama bwa kwa Satana lukayukanyikisha kwikalapo kwa kwa Kilishitu