Ikalai na Byubilo Byawama Bitumbijika Lesa

¹ Konse ko tuji, byubilo byetu, mvwajilo ne nzañwino bimwesha byo tuji ne Lesa ye tupopwela. Kino kimweka kikatakata pa kupwila kukatampe kwa bantu ba kwa Lesa, po betumona bantu bavula. Inge twamwesha byubilo byawama, jizhina ja kwa Yehoba jitumbijikwa. (1 Pe. 2: 12) Nangwa byonkabyo, byubilo byatama nangwa milanguluko incha ku bantu bachechetu byakonsha kuleta myendeleko pa jizhina ja kwa Lesa ne pa bantu banji. (Sapwi. 9:18b) Kulabijila kuba’mba bantu bangi bakonsha kuzhachisha jibumba jetu ne Lesa ye tupopwela kupichila mu byubilo byetu kwafwainwa kwitulengela kutako mana ku ‘kubila byonse lukumo lwa kwa Lesa.’—1 Ko. 10:31.

² Mwekelo Yafwainwa pa Kupwila: Kechi mambo na kibamba kyo tubena kwingijisha ne, twafwainwa kwiimona nobe Nzubo ikatampe ya Bufumu pa kimye kya kupwila. Twafwainwa kuvwala ne kuzañuna bulongo byonka byo tuba pa kuya na kupwila ku kipwilo. Pa kimye kya kupwila ne pa nyuma ya kupwila kwa nkambi, balongo ne banyenga kechi bafwainwa kuvwala bya kuvwala byabula kufwainwa nangwa byabula kuyilamo, bimwesha byubilo bya ku kyalo byakonsha kulengela kushupa kwi atweba kumweka bapusanako. Banyenga bafwainwa kumona kuba’mba musango ne bula bwa mashikechi ne madeleshi abo bibena kumwesha mushingi. (1 Timo. 2:9, 10) Kimye kyonse kyo tubena kupwila, kyo tubena kuja mu lesitilanti nangwa kyo tubena kupota mu shitolo twafwainwa kumweka kuba’mba twi bamwingilo ba kwa Lesa, kechi kuba bya kwituntulako bantu ne.—2 Ko. 6:3.

³ Lubatizhilo lukekalako lukelo pa juba ja bubiji ja kupwila. Ulupungu lwa kwa Kalinda lwa April 1, 1995, peja 30, lwatongola byubilo byo twakonsha kwikala nabyo pa kyo kyo kimye. Lwaamba’mba “twafwainwa kushingika lubatizhilo na mushingi waesakana. Kechi kyo kimye kya kwitobwela, kwikala na bijiilo nangwa kusangalala kukizhamo ne. Bino ku lubaji lukwabo kechi kyo kimye kya kupopomenwa nangwa kimye kya kubuka bukaji ne.” Kuvwala bivwalo byafina nangwa byapulangila bibena kumwesha bya mukachi kechi kwawama ku babena kuya ku lubatizhilone, bekale banabalume nangwa banabakazhi. Onkao mambo, bonse bafwainwa kumwesha munema ne lusekelo pa kimye kya lubatizhilo lwa Bwina Kilishitu.

⁴ Petelo wituvululako byo ‘twafwainwa kwikala bantu ba bwikalo bwazhila ne bwa kunemeka Lesa.’ (2 Pe. 3:11) Pa kimye kya Kupwila kwa Nkambi kwa “Ba Kuba Kyambo kya kwa Lesa” twayai tumone kuba’mba ñambilo yetu ne byubilo byetu bikakwashe bantu ba michima ya kishinka baketumonanga, kuyuka ne kupopwela Lesa wetu wa buneme, wafwainwa mushingi yense ne lukumo.—1 Ko. 14:24, 25.