Fwenyai Kwipi Ne Lesa

“Anweba Mukasaka Kwikala ne Amiwa ye Mwalenga”

KIKOLA bingi ku muchima kumona mulongo wetu na kukolwa ne kyapelako wafwa. Byobyo twalengwa. Nangwa byonkabyo, kitutekenesha bingi kuyuka kuba’mba Mulenga wetu, aye Yehoba Lesa wayuka bulanda bwetu. Kyakilapo kunema, aye utonga kubusha bafwa na bulume bwanji bukatampe. Akiumvwai luketekelo luji mu bino byambo byaambile Yoba pa kinembelo kya Yoba 14:13-15.

Langulukai pa byo kyajinga. Yoba wajinga mwanamulume wa lwitabilo lwakosa wapichile mu lweseko lwabaya bingi, bya bunonshi byanji byaonaikile, baana banji bonse bafwile, kabiji wakolelwe kikola kyatama bingi. Byo ajinga mu bino bya malwa, wamujijile Lesa amba: “Mama! inge mwaji mwaswa kumfya mu kalunga ka bafu.” (Kyepelo 13) Yoba wayukile’mba mu kalunga ka bafu kechi muji buyanji ne. Mu kilende inge waikajile nobe kya buneme kyafya Lesa, kwakubula kuyanda na bikola.a

Nanchi Yoba ukekala mu Kilende myaka ne myaka nyi? Yoba kechi byobyo aitabijile ne. Mu lulombelo lwanji waambile ne kuba’mba: “Mama! inge mwaji . . . kuntongwela kimye kya kumvulukilamo.” Yoba washiinwe kuba’mba kechi ukekajijila mu Kilende ne, kabiji Yehoba kechi ukamuvulama ne. Yoba waesakenye kimye kya kwikala mu kilende ku “mwingilo wakosa,” kulumbulula kimye kyatongolwa kya kupembela. Inge waikelemo myaka inga? Yoba waambile’mba kufika “kimye kya kukasuluka kwami.” (Kyepelo 14) Kuno kukasuluka kwa kufuma mu Kilende, ko kuba’mba kusanguka ku bafu!

Ki ka kyalengejile Yoba kushiinwa’mba ukasangulwa? Mambo wayukile Mulenga wetu byo atemwa bapopweshi banji bakishinka bafwa. Yoba waambile’mba: “Po po mukangita ne amiwa nkemwitaba; ne anweba mukasaka kwikala ne amiwa ye mwalenga.” (Kyepelo 15) Yoba wayukishetu bulongo kuba’mba Lesa ye wamulengele. Mpanyi wa Bumi wamulengele Yoba munda ya bainanji wakonsha kumusangula ku bafu.—Yoba 10:8, 9; 31:15.

Byambo bya kwa Yoba bitubula’mba Yehoba wituta bingi muchima. Watemwa bingi bantu baji byonka byajinga Yoba, baji mu maboko anji, bekepesha kuba’mba ebabumbe pa kuba’mba bekale bantu baitabilwa ku meso anji. (Isaya 64:8) Yehoba wanemeka bingi bapopweshi banji bakishinka. Yehoba ‘usakisha’ kumona bantu banji bakishinka bafwa. Shayuka umo waambile’mba kyambo kya Kihebelu kyatuntululwa’mba ‘usakisha’ kilumbulula “kutonga kwa panshi ya muchima kwa kukebesha kuba kintu.” Kya kine, Yehoba kechi uvulukatu bapopweshi banji ne, bino usakisha ne kwibasangula.

Buku wa Yoba uji pa mabuku a mu Baibolo atanshi kunembwa kabiji tumusanchila bingi Yehoba mambo momo asolwele kuba’mba kusangula bafwa kyo kyaswa muchima wanji.b Yehoba ubena kukebesha’mba mukamonañane na balongo benu bafwa. Kuyuka bino kulengela kuchinchika. Fundai byavula pa uno Lesa watemwa bantu muyuke byo mwakonsha kumuswisha kwimubumba pa kuba’mba mwikale pa bantu baitabilwa bakamonako bikafika kyaswa muchima wanji.

[Tubyambo twa mushi]