Painga Lesa Lukumo pa Juba pa Juba

NYIMBI wa masalamo Davida walombele kwi Yehoba amba: “Ñumvwishai amiwa lusa lwenu lukelo. Ngyukishai jishinda jo nafwainwa kwendamo.” (Sala. 143:8) Umvwe mwabuka lukelo ne kusanchila Yehoba pa kwimubusha na bumi, nanchi muba byonka byaubile Davida, kulomba Yehoba kuba’mba emutangijile pa kufuukula bintu ne kulondela jishinda jawama nyi? Bino byo byo muba kwakubula nangwa kuzhinaukatu ne.

Byo tuji bakalume ba Yehoba bepana, ‘nangwa tubena kuja, nangwa tubena kutoma, nangwa tubena kuba kya byepi nangwa kya byepi,’ twibikako ‘byonse kasa twibyubila lukumo lwa Lesa.’ (1 Ko. 10:31) Twayuka kuba amba bwikalo bwetu bwa pa juba pa juba bumwesha kana twanemeka Yehoba nangwa ne. Tuvuluka ne kuba amba Mambo a Lesa aamba’mba Satana ubena kupamo balongo ba kwa Kilishitu mambo, ne bakalume ba Lesa bonse baji panopantanda “mute ne bufuku.” (Lum. 12:10) Onkao mambo, twakebesha kushinawina Satana pa bubela bo abepa kabiji ne kusangajika muchima wa Yehoba kupichila mu kwingijila Shetu wa mwiulu mwingilo wazhila “mute ne bufuku.”—Lum. 7:15; Mana. 27:11.

Twayai twisambe pa mashinda abiji o twakonsha kupelamo Lesa lukumo mu bwikalo bwetu bwa pa juba pa juba. Kya kutendekelapo kyavwangamo kwingila mwingilo wanema, kya bubiji ke kulangulukilako bakwetu.

Kwikela Mwayila Kwipana Kwetu

Kupichila mu kwipana kwi Yehoba, tumwesha kuba’mba tubena kukebesha kumwingijila na muchima yense. Kabiji tumulaya Yehoba kuba amba tukendanga mu mashinda anji “pa juba pa juba,” ko kuba’mba myaka ne myaka. (Sala. 61:5, 8) Pano twikela byepi mwayila uno mulaye? Tumwesha byepi amba twatemwa Yehoba kufuma panshi ya muchima pa juba pa juba?

Mambo a Lesa amwesha patoka mingilo Yehoba yo akeba amba twingile. (Mpitu. 10:12, 13) Mingilo yavula yanembwa mu kakitenguluzha kaamba amba “Mingilo yo Apana Lesa,” kaji pa peja 22. Ino mingilo yonse Lesa ye wiipana kabiji yanema bingi. Tufuukula byepi amba awe ye mwingilo wanemesha ye twafwainwa kwingila umvwe mingilo yavula ibena kukebewa kuba amba twiingile pa kimye kimo?

Tuta muchima ku mwingilo wetu wazhila, awo wavwangamo lufunjisho lwa Baibolo, lulombelo, kupwila kwa bwina Kilishitu ne kusapwila. (Mat. 6:33; Yoa. 4:34; 1 Pe. 2:9) Pano bino, mingilo ya ku mupashi kechi yakonsha kwingijiwa juba jonse ne. Mingilo ya ku mubiji, sukulu ne mingilotu ikwabo ya pa nzubo nayo yafwainwa kuvwangiwamo. Nangwa byonkabyo, tumona’mba twanengezha bulongo mutanchi wa mingilo ya ku mubiji ne mingilo ikwabo mu jishinda jawama pa kuba amba ibulenga kwitulengela kukankalwa kwingila mingilo yazhila, nabiji kutanwa ku kupwila kwa bwina Kilishitu. Kya kumwenako, kimye kyo tubena kusaka kuya na kukokoloka, tweseka na ngovu kumona kuba amba kechi twafumapo kimye kya kufwakasha kwa kalama wa mwanzo, kubuñana kwa juba jimo, kubuñana kwa mwanzo nangwa kushonkena kwa nkambi ne. Bimye bimo, twakonsha kwingila mingilo yetu yonse pa kimye kimo. Kya kumwenako, twakonsha kutanchika kuba amba kisemi kyetu kikawamishenga Nzubo ya Bufumu nangwa kwingijisha kimye kya ku nkito nangwa kusukulu pachaile kusapwila ku bo twingila nabo nangwa ku bakwetu baana basukulu. Kya kine, kimye kyonse kyo tusaka kufuukula bya kuba mu bwikalo bwetu, nabiji kutwela mingilo, kufunda sukulu, kusala balunda, tusaka byo tufuukulapo kwikala bintu byanema mu bwikalo bwetu, ko kuba’mba kupopwela Yehoba, Shetu wa butemwe.—Sapwi. 12:13.

Langulukilaingako Bakwenu

Yehoba ukeba amba tulangulukilengako bakwetu ne kwibobila byawama. Pakuba Satana aye utundaika mupashi wa kwitemwa. Ntanda yanji yayula na bantu ba “kwitemwa abo bene” ne “ba kutemwa bya lusangajiko” kabiji ne boba ‘babyajila buntunshi.’ (2 Timo. 3:1-5; Nga. 6:8) Bantu bavula kechi balangulukisha pa bifuma mu byo boba ku bakwabo ne. “Mingilo ya buntunshi” iji konse konse.—Nga. 5:19-21.

Byubilo bya boba batangijilwa na mupashi wazhila wa Yehoba byapusanako bingi, mambo bano bamwesha butemwe, lusa ne buwame ku bakwabo. (Nga. 5:22) Mambo a Lesa etutundaika kuta muchima ku bikeba bakwetu kechi ku byetutu ne. Onkao mambo, tuba bintu bimwesha amba twata bakwetu muchima, nangwa kya kuba twafwainwa kujimuka kubula kwivwanga mu bintu byabula kwitulamata. (1 Ko. 10:24, 33; Fili. 2:3, 4; 1 Pe. 4:15) Tuta muchima bena Kilishitu bakwetu pa muntu pa muntu. Kabiji tukwasha ne babula bena Kilishitu bakwetu. (Nga. 6:10) Nanchi mwakonsha kumonapo mashinda a kukwashishamo bantu bo mutana lelo jino nyi?—Monai kakitenguluzha kaamba amba “Balangulukilaingako,” kaji pa peja 23.

Kulangulukilako bakwetu kechi kwakonsha kubiwatu mu bimye bimo, nangwa kana bintu byawama ne. (Nga. 6:2; Efi. 5:2; 1 Tesa. 4:9, 10) Mu kifulo kya byobyo, pa juba pa juba tuta muchima ku bibena kupitamo bakwetu ne kusakisha kwibakwasha umvwe pabena kukebewa bukwasho, nangwa kya kuba kechi kyapela kuba bino ne. Tusaka kwikala bampanyi mu bintu byonse byo tuji nabyo, ko kuba’mba kimye kyetu, bintu bya ku mubiji, byo tupitamo ne kubulañanako maana. Yehoba witulaya kuba’mba umvwe twaikala bampanyi ku bakwetu, ne aye ukekala mpanyi wetu.—Mana. 11:25; Luka 6:38.

Kwingila Mwingilo Wazhila “Mute ne Bufuku”

Nanchi kyakonsheka kwingijila Yehoba mwingilo wazhila “mute ne bufuku” nyi? Ee, kupichila mu kutwajijila ne kwikala na mukoyo wa kwingila mingilo mu mbaji yonse ya mpopwelo yetu. (Byu. 20:31) Twakonsha kwingila mwingilo wazhila mu bwikalo bwetu kupichila mu kulangulukalanguluka pa Mambo a Lesa pa juba pa juba, kulomba kimye kyonse, kutanwa ku kupwila konse ne kusapwila kimye kyonse.—Sala. 1:2; Luka 2:37; Byu. 4:20; 1 Tesa. 3:10; 5:17.

Nanchi ne atweba pa muntu pa muntu tubena kwingijila Yehoba mwingilo wazhila nyi? Umvwe byobyo tuba, muchima wetu wa kukeba kusangajika Yehoba ne kushinawina Satana pa bubela bo abepa kukamwekela mu mbaji yonse ya bwikalo bwetu bwa pa juba pa juba. Tukebesha kupana lukumo kwi Yehoba mu byonse byo tuba ne mu bintu byo tupitamo mu bwikalo bwetu. Tutangijilwa na mafunde anji mu ñambilo ne byubilo ne mu byo tufuukulapo kuba. Tumwesha kusanta pa butemwe bwanji ne lutundaiko kupichila mu kuketekela mwi aye ne kwingila mwingilo wanji papelela ngovu yetu. Tutambwila lujimuno lwanji ne mafunde umvwe twakankalwa kulama mikambizho yanji na mambo a bumbulwa kulumbuluka bwetu.—Sala. 32:5; 119:97; Mana. 3:25, 26; Kolo. 3:17; Hebe. 6:11, 12.

Twayai tutwajijile kupana lukumo kwi Lesa moba onse mu bwikalo bwetu. Umvwe twauba bino, myeo yetu ikakokoloka kabiji tukeyowa butemwe bwa Shetu wa mwiulu myaka ne myaka.—Mat. 11:29; Lum. 7:16, 17.

[Kitenguluzha/Bipikichala pa peja 22]

Mingilo yo Apana Lesa

• Lombainga kimye kyonse.—Lo. 12:12.

• Tangainga ne kufunda Baibolo, kabiji ne kwingijisha byo mutanga.—Sala. 1:2; 1 Timo. 4:15.

• Popwelainga Yehoba mu kipwilo.—Sala. 35:18; Hebe. 10:24, 25.

• Mwenainga ba mu kisemi kyenu bya ku mubiji, ku mupashi ne kwibalama bulongo kwa kubula kwikala na binyenge.—1 Timo. 5:8.

• Sapwilainga mambo awama a Bufumu ne kulenga baana ba bwanga.—Mat. 24:14; 28:19, 20.

• Itainga muchima ku mubiji, ku mupashi ne kukepeshako bijikila, kabiji ne kwikala na kimye kya kukayako makayo awama.—Mako 6:31; 2 Ko. 7:1; 1 Timo. 4:8, 16.

• Taingako muchima kwingila mingilo ya kipwilo.—Byu. 20:28; 1 Timo. 3:1.

• Tutenga muchima mazubo etu ne Nzubo ya Bufumu.—1 Ko. 10:32.

[Kitenguluzha/Kipikichala pa peja 23]

Balangulukilaingako

• Mulongo nangwa nyenga wa kikulumpe.—Levi 19:32.

• Muntu wayanda ku mubiji nangwa uji na bijikila.—Mana. 14:21.

• Wa mu kipwilo ubena kukebewa bukwasho bwa bukiji bukiji.—Loma 12:13.

• Wa mu kisemi kyenu.—1 Timo. 5:4, 8.

• Mwina Kilishitu mukwenu wafwisha mukwabo wa mu masongola.—1 Timo. 5:9.

• Mukulumpe mu kipwilo kyenu wingijisha na ngovu.—1 Tesa. 5:12, 13; 1 Timo. 5:17.