LUFUNJISHO 8

Bishimpi Bifika Bantu pa Muchima

Mateo 13:34, 35

BYO MWAFWAINWA KUBA: Ingijishainga bishimpi byapeela kumvwa pa kuba’mba mufike bantu pa muchima ne kwibakwasha kumvwisha bishinka.

Ingijishainga bishimpi byapeela. Byonka byaubanga Yesu, ingijishainga bishimpi byapeela pa kulumbulula bishinka byanema, kabiji lumbululainga bishinka bikatampe mu jishinda japeela. Kechi mwafwainwa kwingijisha kishimpi kyalepa kabiji kyakobankana ne. Kishimpi kyo mubena kwingijisha kyafwainwa kukwatankana na kishinka kyo mubena kwambapo pa kuba’mba mubule kuvulañanya bantu.

Funjilaiko ku bintu byo mumona moba onse. Funjilaiko ku bilengwa na Lesa, tangainga mabuku etu a bwina Kilishitu ne kuteleka ku balongo bayuka kufunjisha. Kimye kyo mubena kuba bino, funjilaingako bishimpi byo mwakonsha kwingijisha pa kuba’mba ne anweba mufunjishenga bulongo. Nembai bino bishimpi.
Langulukai pa bantu bo mukafunjishanga. Ingijishai bishimpi byaamba pa bintu byayuka bantu bo mubena kufunjisha nangwa byo batemwa. Kechi mwafwainwa kwingijisha bishimpi byakonsha kufichisha bantu ku muchima nangwa kwibalengesha bumvu ne.
Ingijishai kishimpi pa kufunjisha kishinka kikatampe. Mwafwainwa kwingijisha kishimpi pa kufunjisha bishinka byanema, kechi bishinka bicheche ne. Onkao mambo, bantu kechi bafwainwa kuvulukangatu kishimpi kyo mwaingijisha ne, bino bafwainwa kuvuluka ne lufunjisho luji mu kyokyo kishimpi.