Kabokoshi Kamepuzho

◼ Buwameka bujimo mukupwila mukipwilo kingijila munyaunda monka motwikala?

Mumutanchi wakipwilo, momotwikosesha “kwiubisha butemwe ne mingilo yawama.” (Hebe. 10:24, 25) Mukipwilo momo tufunda bukine nekwikala bawaina kwingila mwingilo wetu wakulenga baana babwanga. (Mat. 28:19, 20) Kabiji tutundaikwa kuchinchika nenabukishinka meseko kabiji tuji nabakulumpe babutemwe mukipwilo betukwasha kushinda meseko nebijikila bibena kuvujilako. Kyakine, kipwilo kyanema bingi pakuba’mba twikale bomi kumupashi. Nangwa byonkabyo, nanchi mujipo buwame mukupwila mukipwilo kingijila munyaunda motwikalanyi?

Ngikelo ikelamo bantu umo umo yaenda kupusana-pusana, kabiji bintu nabiji nkito, mwinakwenu wabula kwitabila, neñendelo byobintu bimo byakonsha kulengela umo kufuukulapo kipwilo koakayanga. Pano bino, muji buwame bwakumupashi nekumubiji umvwe muntu keapwile mukipwilo kingijila munyaunda monka moekala. Bakulumpe mukipwilo kyakonsha kwibapelela kumonañana bukiji-bukiji nabasapwishi bonse umvwe kwasombwa kimo. Tubokoshi twamepuzho twakunyumakwe twalumbulula buwame bwavujilako.—May 1991 ne July 1976.

Javula, kituwamina bingi kupwila mukipwilo kiji pepi, pakuba satufika bukiji nekwikalako nakimye kyakwisambako nabakwetu, kunengezhako bintu bikebewa, kabiji nekwivwangamo mulwimbo nelulombelo lwakushinkwila. Umvwe bantu bakatataka bamwesha lusekelo lwakukeba kufunda bukine bekala kipi kipi, kitupelela bingi kwibafwakashisha, kwibafunjisha lufunjisho lwa Baibolo, nekwibabula kipwilo kwakonsha kwibawamina.

Twaketekela namba mitwe yabisemi ikalangulukishapotu bulongo nalulombelo paano mambo, kupalanguzha bishinka byonse byavwangiwamo, nekumona kyakonsha kuwamina kisemi kyabo kumupashi nekumubiji.—1 Timo. 5:8.